وتكەن اپتادا جاڭاقورعان اۋدانىندا حالىق اقىنى ماناپ كوكەنوۆتىڭ 90 جىلدىعىنا وراي مادەني شارا ءوتتى.
ماناپ كوكەنوۆ 1928 جىلى 20 مامىردا قىزىلوردا وبلىسى, جاڭاقورعان اۋدانىندا دۇنيەگە كەلگەن. 15 جاسىندا ءدۇبىرلى دودالارعا قاتىسقان بولاشاق حالىق اقىنى, 16 جاسىنان قىزىل وتاۋ مەڭگەرۋشىسى بولىپ قىزمەت اتقاردى. كوزى تىرىسىندە-اق ايتىس مەكتەبى اشىلعان اقىننىڭ شاكىرتتەرى زامادين يبادۋللاەۆ, نياتوللا رامانقۇلوۆ, ەلەنا ابدىقالىقوۆا, ءابىلحايىر سىزدىقوۆ ايتىستىڭ ەرەن جۇيرىكتەرىنە اينالدى. م.كوكەنوۆ ايتىس اقىنى عانا ەمەس, مادەني جانە تاريحي ەسكەرتكىشتەردى زەرتتەۋشى, حالىق مۇراسىن قاستەرلەپ جيناۋشى جانە ناسيحاتشى بولا ءبىلدى. «ازىرەت سۇلتان» قورىق-مۇراجايىنىڭ كىتاپحاناسىن 3-4 عاسىرلىق تاريحى بار 14 كىتاپ پەن دەرەكتى قۇجاتتارمەن تولىقتىردى. سول سەكىلدى سۇگىردىڭ ۇستازى كومپوزيتور الشەكەي بەكتىباەۆتىڭ 14 كۇيىن زەرتتەپ, ونىڭ 9 كۇيىن قازاق تەلەراديوسى ارقىلى ەفيرگە شىعاردى.
اقىننىڭ 90 جىلدىعىنا ارنالعان مەرەيلى مەرەكەدە ماناپ اۋىلى تۇرعىندارىنا تاماشا تارتۋ جاسالدى. 100 ورىندىق اللا ءۇيىنىڭ اشىلۋ سالتاناتىندا «اقمەشىت-سىرداريا» مەشىتىنىڭ باس يمامى بولاتبەك ءابۋوۆ ىزگى تىلەگىن ءبىلدىرىپ, قۇران كىتابىن تارتۋ ەتتى. وبلىستىق ءماسليحاتتىڭ حاتشىسى ناۋرىزباي بايقاداموۆ, اۋدان اكىمى عالىم امىرەەۆ پەن بىرقاتار ارداگەر جىلى لەبىزىن ءبىلدىرىپ, اق باتاسىن بەردى.
مەرەيتويعا جينالعاندار «ماناپ سالعان ىزبەنەن» اتتى ەتنو-كورمە قالاشىعىن ارالاسا, «اقىن الەمى» تەاترلاندىرىلعان قويىلىم كوپشىلىك كوڭىلىنەن شىقتى. بۇل كەشتە «سۇلەيلەردىڭ سوڭعى تۇياعى» اتتى اقىننىڭ تاڭدامالى جيناق كىتابى مەن «Manap.kz» سايتىنىڭ تۇساۋى كەسىلدى.
ال م.كوكەنوۆ اتىنداعى اۋداندىق مادەنيەت ۇيىندە حالىق اقىنىنىڭ ءبيۋستى اشىلدى. سونداي-اق ايتىستىڭ اقتاڭگەرىنە ارنالعان رەسپۋبليكالىق رەترو ايتىس ءوتتى, وعان اباش كاكەنوۆ, ايتاقىن بۇلعاقوۆ, داۋلەتكەرەي كاپ ۇلى, بەكارىس شويبەكوۆ, ءابىلحايىر سىزدىقوۆ سىندى ايتىس ساڭلاقتارى قاتىستى. اقىننىڭ مەرەيتويىنا وراي ۇيىمداستىرىلعان شارالار سپورت سايىستارىمەن جالعاسىن تاپتى. 2006-2013 جىلى تۋعان جاسوسپىرىمدەر اراسىندا تاەكۆوندودان وبلىستىق اشىق تۋرنير ءوتتى. سپورتتىق شاراعا قىزىلوردا قالاسى, شيەلى جانە جاڭاقورعان اۋدانىنان كەلگەن سەگىز كوماندانىڭ 163 سپورتشىسى قاتىستى.
باقتيار تايجان,
«ەگەمەن قازاقستان»