اقتوبەدە 23-24 قازان ارالىعىندا وبلىستىڭ ەڭ ۇزدىك كوماندالارىنىڭ قاتىسۋىمەن تۇڭعىش رەت سىبايلاس جەمقورلىق تاقىرىبىندا جوعارى ليگا جارتىلاي فينالدىق ويىندارى ءوتتى.
اقتوبە وبلىسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى, جاستار ساياساتى باسقارماسىنىڭ جانە «قازاقستان كۆن وداعى» وبلىستىق فيليالىنىڭ ۇيىمداستىرۋىمەن استانا قالاسىنىڭ 20 جىلدىعىنا جانە مەملەكەتتىك قىزمەت ورگاندارىنىڭ 20 جىلدىعىنا ارنالعان سايىستا 7 كوماندا باق سىناستى.
«كوررۋپتسياسىز بولاشاققا» دەپ ۇرانداتقان س. بايشەۆ اتىنداعى قۇراما, «وسال ەمەس», «فەنومەن», «35 ويشىلدارى», ء«سوز جوق», «دەجاۆيۋ», «جۇبانوۆ قۇراماسى» اتتى كوماندالار ەل دامۋىنا كەسىرىن تيگىزەتىن ىندەتتىڭ قوعامدا الاتىن ورنىن, ونىمەن قالاي كۇرەسۋ قاجەتتىلىگىن كورەرمەندەرگە ءازىل ارقىلى جەتكىزۋگە تىرىستى.
اقتوبە وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ورىنباسارى رافحات بيسەنوۆتىڭ ايتۋىنشا, بۇل شارا ەلباسى جولداۋىندا اتالىپ وتكەن سىبايلاس جەمقورلىقتان ادا وڭىرگە اينالۋ جولىندا ىسكە قوسىلعان «اقتوبە – ادالدىق الاڭى» جوباسى اياسىندا وتكىزىلۋدە.
ء«بىز وسكەلەڭ ۇرپاقتىڭ سىبايلاس جەمقورلىققا قارسى ساياساتتى قالىپتاستىرۋدا ەرەكشە ءرولىن ەسكەرە وتىرىپ, بۇگىنگى شارانى ۇيىمداستىرۋدى ۇسىندىق. سول ارقىلى قوعامدا, ەلىمىزدە, الەمدە بەلەڭ الىپ وتىرعان وزەكتى ماسەلەنى كوتەرىپ, اششى ءازىل ارقىلى ءار ازاماتقا جەتكىزگىمىز كەلەدى»,- دەدى ر.بيسەنوۆ.
ويىن ناتيجەسىندە جوعارى ليگا جارتىلاي فينالدىق ويىندارىنىڭ جەڭىمپازى بولىپ ء«سوز جوق» كومانداسى تانىلىپ, اقتوبە وبلىسى جوعارعى ليگا چەمپيونى اتاعىنا يە بولدى.
تەمىر قۇسايىن,
«ەگەمەن قازاقستان»