ماڭعىستاۋ وڭىرىنە ەلباسىنىڭ «بولاشاققا باعدار – رۋحاني جاڭعىرۋ» اتتى ماقالاسىنان تۋىنداعان «وزگەرىستەردى وزىڭنەن باستا» كىشى باعدارلاماسىن وڭىرلەردە جۇزەگە اسىرىلۋىنا جاڭا سەرپىن بەرۋ ماقساتىندا ىسساپارمەن كەلگەن اگەنتتىكتىڭ جۇرتشىلىقپەن بايلانىس جونىندەگى دەپارتامەنتىنىڭ ديرەكتورى ارمان بەردالين جانە رەسپۋبليكالىق ارنايى مونيتورينگ توبىنىڭ مۇشەسى, ەلىمىزگە بەلگىلى ەتنوديزاينەر ىرزا تۇرسىنزادا ىسساپارمەن كەلىپ, ەڭ الدىمەن قر پرەزيدەنتى جانىنداعى مەملەكەتتىك باسقارۋ اكادەمياسىنا ات باسىن تىرەدى.
ەلورداسى استانادان كەلگەن قوناقتار فيليال ۇجىمى جانە تىڭداۋشىلارىمەن كەزدەسىپ, ءبىلىم ورداسىنىڭ قىزمەتىمەن تانىستى.
ءىس-شاراعا سونداي-اق اگەنتتىكتىڭ اۋماقتىق دەپارتامەنتىنىڭ باسشىسى نۇرگۇل جاننازاروۆا, وبلىستىق ارنايى مونيتورينگ توبى ءتورايىمىنىڭ ورىنباسارى اسەت مانوۆ جانە «سىبايلاس جەمقورلىققا قارسى ءبىرىنشى مەديا-ورتالىعى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ وكىلى بەكنار بەكەنتاەۆ قاتىستى.
زاماناۋي تالاپتارعا ساي ينتەراكتيۆتى تاقتالار, جاڭا اۋديو-ۆيدەو تەحنيكامەن جابدىقتالىپ, كوركەم بەزەندىرىلگەن اۋديتوريالار, جانە فيليال كىتاپحاناسىن ارالاپ شىققان استانالىق وكىلدەر ءوز اسەرلەرىمەن ءبولىسىپ, جىلى لەبىزدەرىن ءبىلدىردى.
ايتا كەتۋ قاجەت, 500-دەن استام مەملەكەتتىك قىزمەتشى قايتا دايارلاۋ جانە بىلىكتىلىگىن كوتەرۋ كۋرستارىنان ءوتىپ جاتقان اكادەميا فيليالى جاڭا ستاندارتتارعا سايكەس جابدىقتالعان عيماراتقا كوشىپ, جاڭاشىل فورماتتاعى مەملەكەتتىك قىزمەتشىلەردى دايىنداۋعا ءوز سەپتىگىن تيگىزۋدە.
بۇدان باسقا, ورتالىقتىڭ وكىلدەرى ن. ءجانتورين اتىنداعى وبلىستىق مۋزىكالىق دراما تەاترىنىڭ ۇجىمىمەن جانە جاس مەملەكەتتىك قىزمەتشىلەرمەن كەزدەسۋ وتكىزدى.
العاشقى كىرىسپە سوزىندە اۋماقتىق دەپارتامەنتتىڭ باسشىسى نۇرگۇل جاننازاروۆا جۇرتشىلىققا استانادان كەلگەن قوناقتاردى تانىستىرا وتىرىپ, وسىنداي بەيرەسمي فورماتتاعى كەزدەسۋلەردىڭ «وزگەرىستەردى وزىڭنەن باستا» كىشى باعدارلاماسىن جۇزەگە اسىرۋ شەڭبەرىندە مەملەكەتتىك قىزمەتشىلەردىڭ الەۋەتىن اشۋعا, كۇندەلىكتى قىزمەت بارىسىندا تۋىندايتىن ماسەلەلەردىڭ الدىن الۋعا, قىزمەت ساپاسىن كوتەرۋگە سەبەپ بولاتىندىعىن جانە اۋماقتىق دەپارتامەنت تاراپىنان بەيرەسمي فورماتتاعى كەزدەسۋلەردىڭ داستۇرگە اينالعاندىعىن جەتكىزدى.
سونىمەن بىرگە, اۋماقتىق دەپارتامەنت باسشىسى ن.ءجانتورين اتىنداعى وبلىستىق-مۋزىكالىق دراما تەاترىندا سىبايلاس جەمقورلىق سيپاتىنداعى قىلمىستىق ىستەردى ومىرمەن بايلانىستىرىپ, ساحنا تورىنە شىعارۋدى ۇسىندى.
ءوز كەزەگىندە, اگەنتتىك وكىلى ارمان بەردالين تەاتردىڭ ازاماتتاردىڭ بويىنا ۇلتتىق قۇندىلىقتاردى دارىتۋعا بىردەن ءبىر رۋحاني تاربيە قۇرالى ەكەندىگىن ايتا وتىرىپ, اگەنتتىكتە بەلگىلى اقىن-جازۋشىلار, كومپوزيتورلار مەن وزگە دە ونەر مايتالماندارىمەن كەزدەسۋلەر ءجيى ۇيىمداستىرىلاتىنىن باسا ايتتى.
- «بولاشاققا باعدار – رۋحاني جاڭعىرۋ» اياسىندا «وزگەرىستەردى وزىڭنەن باستا» جوباسى بويىنشا اگەنتتىك ۇلكەن جۇمىستار اتقارىپ جاتىر. وسى ساپار بارىسىندا ونەر, تەاتر, مادەنيەت سالاسىنىڭ قىزمەتكەرلەرىمەن, قايراتكەرلەرىمەن كەزدەسىپ, جەمقورلىقتى جەڭۋ جولىندا بىرىگىپ جۇمىس ىستەۋگە ۇندەۋ تاستاپ جاتىرمىز. بابالارىمىز «اۋىرىپ ەم ىزدەگەنشە, اۋىرمايتىن جول ىزدە» دەيدى. دەمەك ساحنا ارقىلى ۇرپاقتى, ۇلتتى تاربيەلەۋىمىز كەرەك. بۇل كىسىلەر ساحناداعى قويىلىمدارى ارقىلى حالىققا ۇرلىقتىڭ ءتۇبى قورلىق بولاتىندىعىن, جاقسىلىققا اپارمايتىندىعىن جەتكىزەتىن بولسا, ونداي دۇنيە كورەرمەندەردىڭ ساناسىنا تەز جەتەدى دەگەن ويدامىز, دەپ تۇيىندەيدى ا.بەردالين.
رەسپۋبليكالىق ارنايى مونيتورينگ توبىنىڭ مۇشەسى ىرزا تۇرسىنزادا سىبايلاس جەمقورلىققا قارسى ءىس-قيمىل, بويىنشا ءوز ويىمەن ءبولىستى. بەلگىلى ەتنوديزاينەردىڭ ايتۋىنشا, قازاقتىڭ تەكتىلىگى نامىسشىلدىعى, ار-وجدانى ۇرپاققا قايتا ورالسا, ءوز تۋعان جەرىندە ءومىر ءسۇرىپ جۇرگەن ەشبىر پەندە پاراعا ۇرىنبايدى. بۇل دەرتكە قارسى تۇراتىن ءبىزدىڭ رۋحىمىز, نامىسىمىز, بولمىسىمىز عانا. ول پارا الىپ, ءىستى بولىپ, جازاسىن وتەگەندە ەمەس, ول سول جاعدايعا جەتكىزبەي ءار ادامنىڭ جۇرەگىنىڭ تۇبىندە ويانۋ كەرەك.
ونەر ورداسىنىڭ ديرەكتورى, قازاقستان رەسپۋبليكاسىنىڭ ەڭبەگى سڭگەن قايراتكەرى, «قۇرمەت» وردەنىنىڭ يەگەرى نۇرنياز مۇقانوۆ تەاترلىق قويىلىمدارعا جۇرتشىلىقتىڭ ىقىلاسى كۇننەن-كۇنگە ارتىپ كەلە جاتقاندىعىن, اۋماقتىق دەپارتامەنتپەن بىرلەسىپ قوعامدا سىبايلاس جەمقورلىققا قارسى مادەنيەتتى قالىپتاستىرۋعا ىقپال ەتۋگە دايىن ەكەندىكتەرىن ايتتى.
اسەرلى اڭگىمە, كەلەلى كەزدەسۋ, جايدارلى جۇزدەسۋ تەاتر قىزمەتكەرلەرىنىڭ ونەرىن تاماشالاۋمەن, ەركىن فورماتتاعى سۇحبات الاڭىمەن جالعاسىن تاپتى.
اگەنتتىك جانە رەسپۋبليكالىق ارنايى مونيتورينگ توبىنىڭ وكىلدەرى سول كۇنى اقتاۋ قالاسى اكىمدىگىندە جاس مەملەكەتتىك قىزمەتشىلەرمەن كەزدەستى.
ءىس-شاراعا اگەنتتىكتىڭ اۋماقتىق دەپارتامەنتىنىڭ باسشىسى نۇرگۇل جاننازاروۆا, وبلىستىق ارنايى مونيتورينگ توبىنىڭ جانە بۇقارالىق اقپارات قۇرالدارىنىڭ وكىلدەرى قاتىستى.
اگەنتتىك وكىلى ا.بەردالين رەسپۋبليكالىق ارنايى مونيتورينگ توبىنىڭ ماقساتى مەن مىندەتتەرىنە, ورتالىق دەڭگەيدە قولعا الىنعان جوبالارعا جانە جىل باسىنان بەرگى رەسپۋبليكا بويىنشا سىبايلاس جەمقورلىق دەرەكتەر بويىنشا ستاتيستيكالىق مالىمەتتەرگە توقتالىپ, سىبايلاس جەمقورلىققا قارسى ءىس-قيمىلدى ءتيىمدى جۇرگىزۋ ءۇشىن, قوعامدا سىبايلاس جەمقورلىققا قارسى مادەنيەتتى قالىپتاستىرۋدىڭ, جاس ۇرپاقتى تاربيەلەۋدىڭ ماڭىزدىلىعىنا توقتالدى.
بۇدان باسقا, سپيكەردىڭ ايتۋىنشا Facebook الەۋمەتتىك جەلىسىندەگى جەكە پاراقشاسىنا كەز-كەلگەن تۇرعىننىڭ ءوز كوكەيىندەگى وي-پىكىرىن جولداۋعا تولىق مۇمكىندىگى بار, جۇرتىشىلىقپەن كەرى بايلانىس مەحانيزمدەرىن جەتىلدىرۋ باعىتىنداعى قولعا الىنعان بۇل باستامالار ۋاكىلەتتى ورگاننىڭ اشىقتىعىنىڭ دالەلى.
سپيكەردىڭ توقتالعان تاعى ءبىر ماسەلەسى ەلباسىنىڭ «بولاشاققا باعدار – رۋحاني جاڭعىرۋ» ماقالاسىنان تۋىنداعان «وزگەرىستەردى وزىڭنەن باستا» كىشى باعدارلاماسىنىڭ ايماقتاردا جۇزەگە اسىرىلۋى. اگەنتتىكتىڭ بۇل باعىتتاعى ۇستانىمى – ءار وبلىستا باعدارلامانى جۇزەگە اسىراتىن جاس مەملەكەتتىك قىزمەتشىلەردەن قۇرالعان توپتار قۇرۋ جانە جاڭاشىل, كرەاتيۆتى يدەيالار ارقىلى وزگەرىستەردى مەملەكەتتىك ورگاندار قىزمەتكەرلەرىنىڭ وزدەرىنەن باستاۋ.
رەسپۋبليكالىق ارنايى مونيتورينگ توبىنىڭ مۇشەسى ىرزا تۇرسىنزادانىڭ پىكىرىنشە ۇلت بولىپ ۇيىسۋدىڭ باستى تەتىگى – رۋحاني تاربيە, ياعني جاس ۇرپاقتىڭ بويىندا ادامگەرشىلىك, ادەپتىلىك, ادالدىق سياقتى قاسيەتتەردى قالىپتاستىرۋ. سوندا عانا سىبايلاس جەمقورلىق سياقتى تەرىس قۇبىلىستىڭ قوعام ومىرىندە جولى كەسىلەدى.
ءىس-شارا بارىسىندا اگەنتتىك پەن ارنايى مونيتورينگ توبىنىڭ وكىلدەرى كوكەيىندەگى مەملەكەتتىك قىزمەتشىلەردىڭ سۇراقتارىنا جاۋاپ بەرىپ, ۇسىنىس-پىكىرلەرىن تىڭدادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى