«التاي» الەم چەمپيوناتىنا قاتىسادى

بۇل جارىسقا ءتورت كوماندا بىردەن جولداما الىپ وتىر. ولار – ازيانىڭ كلۋبتىق چەمپيوناتىنىڭ جەڭىمپازى «سۋپريم» (تايلاند), چەمپيوندار ليگاسىنىڭ جەڭىمپازى «ۆاكىفبانك» (تۇركيا), وڭتۇستىك امەريكانىڭ ۇزدىگى «ميناس» (برازيليا) جانە الاڭ يەلەرى رەتىندە «جەجيانگ» (قىتاي). ال قازاقستاننىڭ «التاي», تۇركيانىڭ «ەكزاچيباشي ۆيترا», فرانتسيانىڭ «ۆولەرو لە كانن» جانە برازيليانىڭ «پرايا» كوماندالارى «wildcard» ارنايى شاقىرتۋ قاعازىنا يە بولدى.  

الەمنىڭ كلۋبتىق چەمپيوناتى 1991 جىلدان بەرى ۇيىمداستىرىلىپ كەلەدى. وسى ۋاقىتقا دەيىن 11 مارتە جالاۋى جەلبىرەگەن جارىستا تۇركيانىڭ كوماندالارى بەس مارتە توپ جارعان ەكەن. ءۇش رەت برازيليالىق ارۋلاردىڭ باعى جانسا, يتاليا, ءازىربايجان جانە رەسەيدىڭ ۆولەيبولشىلارى ءبىر-ءبىر رەتتەن دارا شىقتى. ال بىلتىر جاپونيانىڭ كوبە قالاسىندا ۇيىمداستىرىلعان دودادا  ىستامبۇلدىڭ «ۆاكىفبانكى» جەڭىمپاز اتانسا, ريو دە جانەيرونىڭ «رەكسونا-سەسك» جانە تسيۋريحتىڭ «ۆالەرو» كلۋبتارى جۇلدەگەرلەر قاتارىنان كورىندى.

عالىم سۇلەيمەن,

«ەگەمەن قازاقستان»