قۇرلىقتىق حوككەي ليگاسىندا (قحل) كۇش سىناسىپ جۇرگەن استانانىڭ «بارىسى» قاتارىنان ءۇشىنشى كەزدەسۋدە جەڭىسكە جەتىپ, ءوز كورەرمەندەرىن تاعى دا قۋانتتى.
بۇل جولى جەرلەستەرىمىز مينسكىنىڭ «ديناموسىن» جەڭدى. ءبىرىنشى كەزەڭدە ايتۋلى كوماندالار الما-كەزەك بىرنەشە قاۋىپتى شابۋىلدار ۇيىمداستىرعانىمەن, قوس قاقپاشىنىڭ اسقان شەبەرلىگىنىڭ ارقاسىندا تابلوداعى ەسەپ وزگەرگەن جوق. ۇزىلىستەن كەيىن ايدىن يەلەرى قارقىنىن كۇرت كۇشەيتىپ, قاتارىنان ەكى رەت نىسانانى ءدال كوزدەدى. بۇل گولدىڭ اۆتورلارى – دميتري شەۆچەنكو مەن اندرە پەتەرسسون. ءۇشىنشى كەزەڭدە دەنيس وسيپوۆ ەسەپ ايىرماشىلىعىن قىسقارتقانىمەن, 48 مينۋتتا داستين بويد باسەكەنىڭ سوڭعى نۇكتەسىن قويدى. ەسەپ– 3:1.
قازىر قحل-دىڭ تۇراقتى بىرىنشىلىگىنىڭ جارىس كەستەسىندە «بارىس» 10 ورىندى يەلەنۋدە. ولار 18 كەزدەسۋ وتكىزىپ, 26 ۇپاي جيىپ وتىر. ەندى استانالىقتار وزدەرىنىڭ كەلەسى كەزدەسۋىن الداعى جۇما كۇنى ءوز مۇز ايدىنىندا پودولسكىنىڭ «ۆيتياز» كلۋبا قارسى وتكىزەدى.
عالىم سۇلەيمەن,
«ەگەمەن قازاقستان»