استانادا پاۆلودار وبلىسى ەكىباستۇز قالاسىنداعى بالالار كوركەمسۋرەت مەكتەبى – يۋنەسكو كلۋبى تاربيەلەنۋشىلەرىنىڭ ديپلوم جۇمىستارىنان تۇراتىن «تۋعان ولكەم» كورمەسىنىڭ اشىلۋى ءوتتى. كورمەگە ۇسىنىلعان جۇمىستار استانالىقتاردى مەكتەپتە وقىتىلاتىن بەينەلەۋ ونەرى تەحنيكاسىنىڭ سان الۋان تۇرىمەن قاۋىشتىردى.
جاس سۋرەتشىلەردىڭ ءبىرى ادەمى جەتپىسوۆانىڭ شىعارماشىلىعىنىڭ ارقاۋى – اۋەن مەن سۋرەت تۇتاستىعى. ونىڭ كوركەم تۋىندىلارىنان جاستىق پەن جىگەر وتى الاۋلايدى. ادەمى يدەيا مەن مازمۇندى الىستان ىزدەپ اۋرە بولعان ەمەس, سازدى اۋەن شۋاقتى سيۋجەتتى لىقسىتىپ اكەلىپ قىلقالام ۇشىنا توگىلتەدى.
– سكريپكا تۋرالى سيۋجەت بۇرىننان ويىمدا جۇرەتىن. اۋەن مەن سۋرەت – مەن ءۇشىن ءبىرتۇتاس دۇنيە. سكريپكادا الدەبىر شىعارمانى ويناپ تۇرعانىمدا كومپوزيتسيا كورەتىن بولدىم جانە ونى انىق سۋرەت قىلىپ سالعىم كەلەتىن. وسىلايشا سۋرەت ونەرىنە كەلدىم, – دەيدى ادەمى جەتپىسوۆا. جالپى ەكىباستۇز قالاسىنداعى كوركەمسۋرەت مەكتەبىنىڭ نەگىزى 1984 جىلى قالانىپ, 2009 جىلى شىعارماشىلىق جولىندا جەتكەن جەتىستىكتەرى ءۇشىن يۋنەسكو كلۋبى مارتەبەسىنە يە بولعان.
مادەني شارانىڭ اشىلۋ سالتاناتىندا ءسوز العان ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا «تۋعان ولكەم» باعدارلاماسىنىڭ شەڭبەرىندە وتەتىن بارلىق كورمەلەر استانانىڭ 20 جىلدىق مەرەيتويىنا ارنالعاندىعىن ايتتى.
– ءبىز وسى جىلى ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىن ناسيحاتتاۋ جولىندا ۇلكەن جوبامىزدى باستادىق. جوبا اياسىندا ەكىباستۇز قالاسىنان كورمەگە ۇسىنىلعان تۋىندىلارعا قاراپ, بولاشاعىمىزدىڭ جارقىن ەكەنىن بايقاۋعا بولادى. ويتكەنى بۇل كورمەدەن تەك دارىندى جاستاردىڭ عانا ەمەس, ۇستازداردىڭ دا جۇمىس ناتيجەسىن كورە الامىز. سوندىقتان كورمەگە قولداۋ كورسەتىپ كەلىپ جاتقان اتاقتى سۋرەتشىلەر مەن ۇستازدارعا العىسىمدى بىلدىرەمىن, – دەدى ول.
تاۋەلسىزدىك كۇنى كارساڭىندا جىل بويى وتكىزىلگەن كوركەمسۋرەت مەكتەپتەرى تاربيەلەنۋشىلەرىنىڭ ۇزدىك ديپلوم جۇمىستارى كورمەسىنىڭ قورىتىندى فەستيۆالى وتكىزىلمەك.
ايا ءومىرتاي,
«ەگەمەن قازاقستان»