قازاقستان پرەزيدەنتىنىڭ وزگە ەلدەرگە ساپارى بارىسىندا شەتەلدىك بيزنەس وكىلدەرىمەن كەزدەسۋ ۇيىمداستىرۋى داستۇرگە اينالعان. وسىنىڭ ارقاسىندا ەلىمىزگە ينۆەستورلاردىڭ قىزىعۋشىلىعى, الەم ەلدەرىمەن ساۋدا-ەكونوميكالىق ستراتەگيالىق سەرىكتەستىگىمىزدىڭ اۋقىمى جىلدان-جىلعا كەڭەيىپ كەلەدى. مەملەكەت باسشىسى ايتىپ وتكەندەي, سوڭعى جىلدارى ەۋروپا ەلدەرىمەن تاۋار اينالىمى تۇراقتى تۇردە ءوسىپ كەلە جاتىر. قازاقستاندا ەۋروپا كاپيتالىنىڭ قاتىسۋىمەن ءتۇرلى سالالاردا 3 مىڭعا جۋىق كاسىپورىن جۇمىس ىستەيدى.
ەلباسىنىڭ وسى جولعى ساپارى بارىسىندا دا ەۋروپالىق بيزنەس وكىلدەرىمەن كەزدەسۋى قازاقستاندا قولايلى ينۆەستيتسيالىق كليمات قالىپتاسقانىن جانە ەكىجاقتى ارىپتەستىك ءتيىمدى شارتتار نەگىزىندە جۇزەگە اسىرىلاتىنىن جوعارى دارەجەدە تاعى ءبىر ناقتىلادى.
بۇگىندە ەۋروپالىق ينۆەستورلاردىڭ قازاقستانعا قىزىعۋشىلىعى جوعارى. ول تەك قانا شيكىزات سالاسىنا قاتىستى ەمەس, ەلىمىزدىڭ گەوگرافيالىق تۇرعىدان ورنالاسۋى دا – تارتىمدىلىقتى ەسەلەي تۇسەتىن فاكتور. مەملەكەت باسشىسى وسى ماسەلەگە ەرەكشە كوڭىل ءبولىپ, قازاقستان ەۋروپا مەن ازيا اراسىن بايلانىستىراتىن كوپىر بولۋعا دايىن ەكەندىگىن باسا ايتتى. ەگەر سوڭعى ۋاقىتتا ەۋروپا جانە ازيا ەلدەرى اراسىنداعى بايلانىس قارقىندى دامىپ كەلە جاتقانىن ەسكەرسەك, مۇنداي ۇسىنىس قازاقستانعا ءتيىمدى ناتيجە الىپ كەلەرى ءسوزسىز.
ايتا كەتەرلىگى, بريۋسسەلدە وتكەن «ازيا-ەۋروپا» فورۋمىنىڭ 12-ءشى ءسامميتىنىڭ نەگىزگى تاقىرىبى دا ازيا مەن ەۋروپا اراسىنداعى بايلانىستى كۇشەيتۋگە ارنالدى. سول سەبەپتى بۇل ماسەلە توڭىرەگىندەگى پىكىر الماسۋ سامميت شەڭبەرىندە دە جالعاسىن تاپتى. تۇتاستاي العاندا, ەلباسىنىڭ ەۋروپانىڭ ىسكەر توپتار وكىلدەرىمەن كەزدەسۋى ەلىمىزدىڭ ساۋدا-ەكونوميكالىق بايلانىستارىنا سەرپىن بەرەتىن ماڭىزدى شارا بولدى.
جانىبەك ارىنوۆ,
الەمدىك ەكونوميكا جانە ساياسات ينستيتۋتىنىڭ ساراپشىسى