سەمەيدە «ەكى جۇلدىز» بايقاۋى ءوتتى

سەمەي قالاسىنداعى مادەنيەت سارايىندا 10 قازان كۇنى مۇمكىندىگى شەكتەۋلى جانداردىڭ شىعارماشىلىق قابىلەتتەرىن دامىتۋ, ونەرگە دەگەن قۇشتارلىقتارىن ارتتىرۋ, قوعامعا كىرىكتەندىرۋ تاجىريبەسىن تاراتۋ ماقساتىندا ۇيىمداستىرىلعان 5-ءشى «ەكى جۇلدىز» شىعارماشىلىق بايقاۋى وتكىزىلدى. بۇل بايقاۋ 2014 جىلدان باستاپ ورتالىق ديرەكتورى رىمجان تىنىسوۆانىڭ باستاماسىمەن قولعا الىنعان بولاتىن. العاشقى جىلدارى قالالىق, ايماقتىق دەڭگەيدە قالاعا جاقىن ورنالاسقان ايماقتاردىڭ جانە قالاداعى قوعامدىق بىرلەستىكتەردىڭ, كومەكشى-مەكتەپ ينتەرناتتارىنىڭ تاربيەلەنۋشىلەرى مەن ورتالىعىمىزدىڭ قىزمەت الۋشىلارى اراسىندا, وتكەن جىلدان بەرى وبلىستىق  دەڭگەيدە وتكىزىلىپ كەلەدى.

جىلدان جىلعا بايقاۋعا  قاتىسۋشىلار سانى ءوسىپ, بەس جىل ىشىندە قامتىلعان مۇمكىندىگى شەكتەۋلى جاندار سانى 74-كە جەتتى. ارناۋلى الەۋمەتتىك قىزمەتتەر كورسەتۋ ورتالىعىنىڭ باستاماسىمەن سەمەي قالاسىنىڭ اكىمدىك تاراپىنان قولداۋ تاۋىپ, مادەنيەت سارايىنىڭ قىزمەتكەرلەرىمەن بىرلەسە وبلىستىق دەڭگەيدە وتكىزىلگەن بايقاۋعا بيىل وبلىستىڭ 7 اۋدانىنان (زايسان, اياگوز, اباي, كوكپەكتى, جارما, ءۇرجار, تارباعاتاي), قالانىڭ قوعامدىق بىرلەستىكتەرى, سونىمەن قوسا سەمەي قالاسىنىڭ «ارناۋلى الەۋمەتتىك قىزمەتتەر كورسەتۋ ورتالىعى»  كمم-نەن بارلىعى 22 تالاپكەرلەر قاتىسۋعا ءوتىنىش ءبىلدىردى.

بايقاۋدىڭ العاشقى كەزەڭى ءار مەكەمەنىڭ ءوز قابىرعاسىندا وتكىزىلىپ, ەكىنشى ىرىكتەۋ كەزەڭىنىڭ قورىتىندىسى بويىنشا 9 جۇپ ارنايى ديپلومدارمەن جانە سىيلىقتارمەن ماراپاتتالىپ, 13-جۇپ گالا-كونتسەرتكە جولداما العان-دى.

مەرەكەگە كەلگەن ونەرپازدار  مەن قوناقتاردى كوڭىلدى كەيىپكەرلەر قارسى الدى. «قولونەر» ۇيىرمەسىنە قاتىسۋشى مۇمكىندىگى شەكتەۋلى جەتكىنشەكتەردىڭ قولدان جاساعان بۇيىمدارىنان كورمە ۇيىمداستىرىلىپ, شىعارماشىلىق جۇمىستارى كوپشىلىك نازارىنا  ۇسىنىلدى.

ءومىردى وزىنشە تانىپ, ىشكى جان دۇنيەسىمەن سەزىنە بىلگەن مۇمكىندىگى شەكتەۋلى جاندار ونەر الەمىنە دەگەن قۇلشىنىستارىن تاماشا انمەن جەتكىزىپ, كورەرمەندەردىڭ ىستىق ىقىلاسىنا بولەندى. جىگەرلى دە باتىل جانداردىڭ قايسارلىقتارىنىڭ الدىندا باس ءيىپ, ەرەكشە جان ەكەندەرىن كۇمانسىز مويىندادى.

ءىس-شارا سوڭىندا جاس ەرەكشەلىكتەرىنە قاراي ءار سانات بويىنشا جەڭىمپاز جۇپتار انىقتالدى. سەمەيلىك اياجان داۋلەتقىزى مەن دارىن ايتقازين, زايساندىق دارحان قاسەيىنوۆ باس جۇلدەنى يەلەندى. شار, كوكپەكتى, زايساننان كەلگەن قاتىسۋشىلار 1 ورىندى جەڭىپ السا, 2 ورىندى  اياگوز, جارما اۋداندارى ءوزارا ءبولىستى. سەمەي, ءۇرجار, كوكپەكتىدەن قاتىسقان ونەرپازدار 3 ورىنعا يە بولدى. شارا سوڭىندا جەڭىمپازدارعا باعالى سىيلىقتار مەن ديپلوم تابىستالىپ, مەرەكەلىك داستارحان ۇيىمداستىرىلدى.

ازامات قاسىم,

«ەگەمەن قازاقستان»

سەمەي