قوستاناي وبلىسىنان سايلانعان سەناتورلار جەڭىس نۇرعاليەۆ پەن سەرىك بەكتۇرعانوۆ ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە جاقىندا قۇرىلعان «پاراسات» تسيفرلىق حابىندا بولىپ, ستۋدەنتتەرمەن كەزدەستى.
حاب ماماندارى اۋىل شارۋاشىلىعى كاسىپورىندارىنا, اۋىلدارعا بارىپ, تسيفرلاندىرۋ تەحنولوگيالارى جونىندە اڭگىمەلەر وتكىزەدى, تەحنولوگيالارمەن تانىستىرادى.
«بىزدە قازىر تسيفرلاندىرۋدىڭ بەس تەحنولوگياسى بار. سولاردى شارۋاشىلىقتارعا كورسەتىپ, ولاردىڭ پايداسى جونىندە اقپاراتتار بەردىك, قازىر ولاردى الىپ جاتىر» دەيدى «پاراسات» تسيفرلىق حابىنىڭ جەتەكشىسى المابەك باتىرجان ۇلى. سەناتورلار وعان ۇلكەن باعا بەردى. ءبىلىم ورداسىنىڭ ەلىمىزدەگى ەڭ وزەكتى «تسيفرلىق قازاقستان» باعدارلاماسىنا وسىلاي ۇلەس قوسۋى وتە قۇپتارلىق ەكەنىن ايتتى.
مۇنان كەيىن سەناتورلار ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنداعى, اسىرەسە جاستارعا قاتىستى ماسەلەلەر, تۋرالى ايتتى.
«جاستار تۋرالى ەلباسىنىڭ بۇرىنعى جولداۋلارىندا دا ايتىلىپ ءجۇر. مەملەكەتتىك «بولاشاق», «نۇرلى جەر», «نۇرلى جول», «7-20-25» باعدارلامالارىنىڭ بارلىعى دا جاستاردان سىرت اينالىپ كەتپەيتىن. ەندى ەلباسى وسى جولعى جولداۋىندا 2019 جىلدى جاستار جىلى دەپ اتاۋدى ۇسىندى. مۇنداي شارا بۇرىن ەلىمىزدە بولعان ەمەس. جاستار وسى باعدارلامالاردى ءتيىمدى پايدالانىپ, ونىڭ جۇزەگە اسۋىنا ۇلەسىن دە قوسۋى ءتيىس» دەدى سەناتور جەڭىس نۇرعاليەۆ.
سەناتورلار ەلباسىنىڭ وسى جولعى جولداۋى نەگىزىنەن ەلدىڭ الەۋمەتتىك تۇرمىسىن كوتەرۋگە ارنالعاندىعىنا توقتالدى.
«ەكونوميكا مينيسترلىگىنىڭ ەسەپتەگەنى بويىنشا, ەلىمىزدە 1 ميلليون 300 مىڭ ادامنىڭ جالاقىسى ەڭ تومەنگى جالاقىدان دا تومەن دەڭگەيدە بولعان. جولداۋدا ەڭ تومەنگى جالاقىنى 1,5 ەسە ءوسىرۋ تۋرالى ايتىلدى. ال ونى العان ادامدار جالاقىسىنان, ياعني سول قوسىلعان 42 مىڭ تەڭگەدەن تابىس سالىعى ۇستالمايدى. مۇنداي كومەك 9 ميلليونداي ادامعا قاتىستى. بۇل مەملەكەت ءۇشىن ماسەلەلەر, قانشاما قارجىعا تۇسەدى, ادامدارعا ۇلكەن قامقورلىق» دەدى سەناتور سەرىك بەكتۇرعانوۆ.
سەناتورلار حابتا ستۋدەنتتەردىڭ سۇراقتارىنا جاۋاپ بەردى.
ءنازيرا جارىمبەت,
«ەگەمەن قازاقستان»
قوستاناي