سەنات دەپۋتاتتارى بىرعانىم ءايتىموۆا, ەربولات مۇقاەۆ جانە ناريمان تورەعاليەۆ ەلباسى جولداۋىن ءوڭىر تۇرعىندارىمەن تالقىلاۋ ماقساتىمەن باتىس قازاقستان وبلىسىندا ءجۇر.
سەناتورلاردى باتىس قازاقستان وبلىسىنىڭ اكىمى التاي كولگىنوۆ قابىلداپ, مەملەكەت باسشىسىنىڭ بيىلعى جولداۋىندا قويىلعان جاڭا مىندەتتەردى وڭىردە قالاي جۇزەگە اسىرۋ ءجايى تالقىلاندى.
- ەلباسىنىڭ جولداۋى ءوڭىرىمىزدىڭ دامۋىنا تىڭ سەرپىن بەرەدى. وبلىستا نەگىزگى پروبلەمالار – تازا اۋىز سۋ, جول, گازبەن قامتۋ بويىنشا جۇمىستار جۇرگىزىلۋدە. وسى جۇمىستاردى جولداۋعا سايكەس الداعى جىلدارى دا قارقىندى اتقاراتىن بولامىز, – دەدى التاي كولگىنوۆ.
سول كۇنى سەناتورلار ورال قالاسىنداعى بىرقاتار نىساندى ارالاپ, اپاتتى ۇيلەردىڭ ورنىنا مەملەكەتتىك-جەكەشەلىك ارىپتەستىك اياسىندا سالىنىپ جاتقان جاڭا ۇيلەردىڭ قۇرىلىسىمەن تانىستى. اپاتتى ءۇيدىڭ ءبىرى – گاگارين كوشەسىندەگى 12 پاتەرلىك ەكى قاباتتى كونە عيمارات ەدى. بۇگىندە ول جەردە توعىز قاباتتى 126 پاتەرلىك ءۇي سالىنىپ جاتىر. ەسكى ءۇيدىڭ تۇرعىندارى جاڭا ۇيگە كوشىرىلىپ, قالعان پاتەرلەر «7-20-25» باعدارلاماسى بويىنشا بەرىلەتىن بولادى.
قۇرىلىستىڭ جاي-جاپسارىمەن تانىسقان بىرعانىم ءايتىموۆا تۇرعىن ۇيدەگى كوممۋنالدىق شارۋاشىلىق جۇمىستارىن جۇرگىزۋدەگى ماسەلەلەر قالاي شەشىلەتىنىن سۇرادى. ساۋالعا جاۋاپ بەرگەن قالا اكىمى مۇرات مۇقاەۆ بۇل ۇيگە تۇرعىندار مەن پاتەر يەلەرى كووپەراتيۆىنىڭ ءوزارا بايلانىسىن جاقسارتىپ, پيك-تەر جۇمىسىنىڭ اشىقتىعىن قامتاماسىز ەۋگە باعىتتالعان «ە-پيك» جۇيەسى ەنگىزىلەتىنىن ايتتى.
سەناتورلار قۇرمانعازى كوشەسىندەگى №198 كوپ قاباتتى تۇرعىن ءۇي قۇرىلىسىمەن دە تانىستى. بۇل دا اپاتتى ءۇي ورنىنا سالىنىپ جاتقان عيمارات. مەملەكەتتىك-جەكەشەلىك ارىپتەستىك ارقىلى سالىنىپ جاتقان بۇل ءۇيدىڭ پاتەرلەرى بۇرىن وسى جەردەگى سۇرىلگەن قوس ءۇيدىڭ 16 پاتەر تۇرعىندارى مەن «7-20-25» باعدارلاماسىنا قاتىسۋشىلارعا بەرىلمەك.
– ەل ارالاپ شىققان ءبىز ەلباسى جولداۋىن ءتۇسىندىرىپ قانا قويماي, ءار ايماقتاعى ءتۇرلى ماسەلەلەردى تىڭداپ, زاڭ تالاپتارىنىڭ ورىندالۋىن قارايمىز. ەلباسى بيىلعى جولداۋىندا حالىقتى ساپالى ءارى قولجەتىمدى تۇرعىن ۇيمەن قامتۋ جونىندە باسا ايتقان بولاتىن. تاياۋ جىلدارى ەكى ميلليونعا جۋىق قازاقستاندىق باسپانالى بولادى. ارينە, ەكى ميلليون ۇلكەن كورسەتكىش. بىراق بىزدە دەموگرافيالىق كورسەتكىش جاقسى. تۇرعىنداردى باسپانامەن قامتۋ ماسەلەسى ەل ۇكىمەتى مەن اكىمدىكتەردىڭ كۇن تارتىبىنەن ۇزاق جىل بويى تۇسپەيدى دەپ ويلايمىن. مەملەكەتتىك-جەكەشەلىك ارىپتەستىك اياسىندا «7-20-25» باعدارلاماسى وڭتايلى پايدالانىلىپ وتىرعانىن كوردىك. ءار ايماقتا بولىپ جۇرسەك تە, ورالداعىداي دۇرىس شەشىمدى ءبىرىنشى رەت كورىپ تۇرمىن. ەسكى ءۇيدىڭ ورنىنا قالانىڭ ورتاسىندا ءارى جاڭا باسپانادا تۇرۋ وتە ىڭعايلى. بۇل اپاتتى جانە ەسكى ۇيلەردىڭ ماسەلەلەرىن شەشۋ ءۇشىن ەلىمىز بويىنشا بولىسۋگە تۇراتىن جاقسى تاجىريبە دەپ بىلەمىن. سەنات دەپۋتاتتارى باتىس قازاقستاندا وسىنداي جۇمىستار بار ەكەنىن ايتىپ جۇرەتىن بولامىز, – دەدى سەنات دەپۋتاتى بىرعانىم ءايتىموۆا.
بۇدان كەيىن سەناتورلار ورال گاز, مۇناي جانە سالالىق تەحنولوگيالار كوللەدجىنىڭ پەداگوگيكالىق ۇجىمىمەن كەزدەستى. بۇگىن قازتالوۆ اۋدانىنا ساپار شەگىپ, اقپاتەر اۋىلى اۋماعىنداعى كيروۆ-شەجىن سۋ ارناسى, جالپاقتال اۋىلىنداعى تۇرعىن ءۇي قۇرىلىسىمەن تانىسادى. سونداي-اق مەكتەپ, اۋرۋحانا, بالاباقشا ۇجىمدارىمەن كەزدەسۋ جوسپارلانعان.
قازبەك قۇتتىمۇرات ۇلى
«ەگەمەن قازاقستان»
سۋرەتتى تۇسىرگەن ا.كۋپريەنكو
باتىس قازاقستان