قىرعىزستان رەسپۋبليكاسىنىڭ پرەزيدەنتى سوورونباي جەەنبەكوۆ تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆكە «داناكەر» وردەنىن تابىستادى, دەپ حابارلايدى قىرعىزستان پرەزيدەنتىنىڭ ءباسپاسوز قىزمەتى.
ەستەرىڭىزگە سالساق, سوورونباي جەەنبەكوۆ 2018 جىلدىڭ 30 تامىزىندا تۇركىتىلدەس مەملەكەتتەر مەن قىرعىزستان رەسپۋبليكاسىنىڭ ىنتىماقتاستىعىنا, مادەني جانە دوستىق قارىم-قاتىناس ورناتۋىنا سىڭىرگەن ەڭبەگى ءۇشىن «دۇيسەن قاسەيىنوۆتى «داناكەر» وردەنىمەن ماراپاتتاۋ» تۋرالى جارلىعىنا قول قويعان بولاتىن.
قىرعىزستاننىڭ مەملەكەت باسشىسى دۇيسەن قاسەيىنوۆ باسقارىپ وتىرعان تۇركسوي حالىقارالىق ۇيىمىنىڭ تۇركىتىلدەس مەملەكەتتەردى جالعاۋشى رۋحاني كوپىر بولىپ سانالاتىنىن ايتتى.
سونىمەن بىرگە, پرەزيدەنت تۇركسوي باس حاتشىسىنا 2018 جىلدى «شىڭعىس ايتماتوۆ جىلى» دەپ بەلگىلەپ, قىرعىز اقىندارى مەن جازۋشىلارىنىڭ كىتاپتارىن باسىپ شىعارعانى ءۇشىن ريزاشىلىعىن ءبىلدىردى.
دۇيسەن قاسەيىنوۆ سوورونباي جەەنبەكوۆكە جوعارعى ماراپاتى ءۇشىن العىس ءبىلدىرىپ, 2018 جىلدى «شىڭعىس ايتماتوۆ جىلى» دەپ بەلگىلەۋ ۇسىنىسىن ۇيىمنىڭ بارلىق مۇشەسى قولداعانىن ايتتى. تۇركسوي حالىقارالىق ۇيىمىنىڭ باس حاتشىسىنىڭ ايتۋىنشا, قاراشا ايىندا قىرعىزستان رەسپۋبليكاسىنىڭ كومەگىمەن جاپونيا مەملەكەتىندە ايتماتوۆقا ارنالعان بىرنەشە ءىس-شارالار وتپەك.