جاقىندا ۇلتتىق مۋزەيدىڭ ماماندارى قىتاي حالىق رەسپۋبليكاسىنىڭ قازاقستانداعى ەلشىلىگى مەن قىتاي مادەنيەت مينيسترلىگىنىڭ ۇيىمداستىرۋىمەن بەيجىڭ, چانچۋن, حاربين قالالارىندا مۋزەي ءىسىن جۇرگىزۋ بويىنشا جوعارى توپقا ارنالعان سەمينارعا قاتىسىپ قايتتى. مۋزەي ماماندارىنىڭ ءوزارا تاجىريبە الماسۋى ماقساتىندا ۇيىمداستىرىلعان مۇنداي سەمينار وسىدان ەكى جىل بۇرىن وتكىزىلگەن بولاتىن.
بيىلعى جيىنعا ۇلتتىق مۋزەيدەن 15 مامان ارنايى شاقىرىلىپ, اپتا بويى كورشى ەلدىڭ تاريحي-مادەني مۇرالارىمەن تانىستى. ودان بولەك, سەمينار بارىسىندا قىتاي مۋزەيلەرى تۋرالى جالپى ماعلۇمات بەرىلىپ, ونداعى مۇراجايلاردىڭ حالىقارالىق دەڭگەيدەگى قىزمەتى تۋرالى دارىستەر تىڭدالدى.
قحر مادەنيەت مينيسترلىگى ورتالىق كادرلار اكادەمياسى پارتيا كوميتەتىنىڭ حاتشىسى دۋان چجوۋ قازاقستاندىق دەلەگاتسيانى قابىلداۋ كەزىندە قىتاي تاراپى ء«بىر بەلدەۋ, ءبىر جول» ستراتەگيالىق باعدارلاماسى بويىنشا قازاقستاندى سەنىمدى سەرىكتەس سانايتىندىعىن, قوس ەل اراسىنداعى مادەني ىنتىماقتاستىقتى دامىتۋ باستى ماقسات ەكەنىن اتاپ ءوتتى. ءار ەلدىڭ تاريحىن جادىگەر ارقىلى ساقتاپ, ۇرپاققا جەتكىزۋدە قاشاندا ءرولى ايرىقشا سانالاتىن مۋزەي سالاسىنا كەڭىنەن توقتالدى. «مۋزەي – كەشەگى وتكەن تاريحىمىزدى بايانداپ, كەلەشەك ۇرپاققا جەتكىزۋشى قادىرلى ورىن. سوڭعى جىلدارى قىتايداعى مۋزەي قىزمەتى قارقىندى دامىپ, جوعارى ناتيجەگە قول جەتكىزدى. بۇگىندە ولار ەكسپوناتتى ساقتاۋمەن قاتار, زەرتتەۋ, كورمەلەر ۇيىمداستىرۋ جانە جۇرتشىلىق نازارىنا ۇسىنۋمەن اينالىسادى. وسى باعىتتا قازاقستاندىق مۋزەي ماماندارىمەن تاجىريبە الماسىپ, بۇدان ءارى دە مادەني قارىم-قاتىناسىمىزدى جالعاستىرا بەرگىمىز كەلەدى», دەدى.
قازىرگى كەزدە قحر-دا جالپى سانى 4873 مۋزەي بار. ونىڭ ىشىندە مەملەكەتتىك مۋزەي – 4873, جەكەمەنشىك مۋزەي سانى – 1297. جەكەمەنشىكتەرى جالپى مۋزەيلەردىڭ 30 پايىزىن قۇرايدى. ءبىر ەرەكشەلىگى, ولاردىڭ 80 پايىزى حالىققا تەگىن قىزمەت كورسەتەدى. سوندىقتان دا بولار, قازاقستاندىق مۋزەي قىزمەتكەرلەرى باس سۇققان قىتاي ۇلتتىق, گۋگۋن, مانچجو́ۋ-گو «قۋىرشاق مەملەكەتى», تسزيلين, حەيلۋنتسزيان مۋزەيلەرىنىڭ قاي-قايسىسىنا دا كەلۋشىلەر كوپ. ورتا ەسەپپەن جىلىنا مۋزەيدى تاماشالاۋشىلار سانى 500-600 ملن-دى قۇرايدى ەكەن. ال ءبىر جىلدا وتكىزىلەتىن كورمە سانى ورتا ەسەپپەن – 22 000, ال 2016 جىلى ەڭ جوعارعى كورسەتكىش بويىنشا كورمە سانى 30 مىڭعا جەتكەن. قىتاي مۋزەيلەرىندە ساقتالىپ تۇرعان ەكسپوناتتار سانى شامامەن – 306 ملن. ال كەيىنگى كەزدەرى جىلدان-جىلعا دامىپ كەلە جاتقان مۋزەي سالاسى بويىنشا جوو-دا جاڭا ماماندىقتار اشىلعان. 2016 جىلعى كورسەتكىش بويىنشا 47 ۋنيۆەرسيتەتتە باكالاۆريات, 34 ۋنيۆەرسيتەتتە ماگيستراتۋرا نەگىزىندە ماماندار دايارلانۋدا.
اتالعان ءىسساپار بارىسىندا ۇلتتىق مۋزەي ماماندارى شەتەلدىك مۋزەيلەر ءىسىن تانىپ, كوپ ماعلۇمات الىپ قايتتى. قازاقستانعا ارنايى كەلەتىن ساياحاتشىلاردىڭ ەلدىڭ تاريحىنا, مادەنيەتىنە, سالت-داستۇرىنە دەگەن قىزىعۋشىلىعىن ارتتىرۋ ءۇشىن بۇل سالاداعى قىزمەتكەرلەرگە الەمدىك دەڭگەيدەگى تاجىريبە ارتىقتىق ەتپەيدى.
ءلايلا نوعايبەكقىزى,
ۇلتتىق مۋزەيدىڭ قىزمەتكەرى