قازاقستاندا حالىقتى تۇرعىن ۇيمەن قامتاماسىز ەتۋ ماسەلەلەرىنە ەرەكشە كوڭىل بولىنۋدە. ەلىمىزدە ەكىنشى جىل قاتارىنان «نۇرلى جەر» مەملەكەتتىك باعدارلاماسى ىسكە اسىرىلىپ جاتىر. بىلتىر 11,2 ملن شارشى مەتر تۇرعىن ءۇي پايدالانۋعا بەرىلسە, 2018 جىلدىڭ جوسپارى — 12,1 ملن شارشى مەتر, دەپ حابارلايدى پرەمەر-ءمينيستردىڭ ءباسپاسوز قىزمەتى.
وسى جىلدىڭ سەگىز ايىندا اتقارىلعان جۇمىس ناتيجەسى قر ينۆەستيتسيالار جانە دامۋ مينيسترلىگىنىڭ بەرگەن اقپاراتىنا سايكەس ازىرلەنگەن ينفوگرافيكادا كورسەتىلگەن.
بيىل مەملەكەت باسشىسى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا باسپانامەن قامتۋ كورسەتكىشىن ءبىر تۇرعىنعا شاققاندا 2030 جىلعا قاراي 30 شارشى مەترگە دەيىن جەتكىزۋ مىندەتىن قويدى. اتالعان مىندەتتى ورىنداۋعا قاجەتتى بارلىق جاعدايلار جاسالعان, تۇرعىن ءۇي جانە يپوتەكالىق باعدارلامالار تەتىكتەرىن جاقسارتۋ جونىندەگى بارلىق شارالار قابىلدانعان.
ەلىمىز تاۋەلسىزدىك العان ۋاقىتتان بەرى 26 جىل ىشىندە 1,1 ملن تۇرعىن ءۇي سالىنسا (جىلىنا شامامەن 40 مىڭ), «نۇرلى جەر» باعدارلاماسىن ىسكە اسىرۋدىڭ 15 جىلىندا 1,5 ملن تۇرعىن ءۇي, ياعني 2,5 ەسە كوپ نەمەسە جىلىنا 100 مىڭ تۇرعىن ۇيدەن سالۋ جوسپارلانعان.
وسى جىلدىڭ سەگىز ايىنىڭ قورىتىندىسى بويىنشا 7,7 ملن شارشى مەتر تۇرعىن ءۇي پايدالانۋعا بەرىلگەن, بۇل 2017 جىلدىڭ سايكەس كەزەڭىنىڭ 112% قۇرادى, ال جىلدىق جوسپار 64%-عا ورىندالعان. جىل قورىتىندىسى بويىنشا جوسپاردى تولىق كولەمدە ورىنداۋ كوزدەلگەن. رەسپۋبليكا بويىنشا بارلىعى 67 055 تۇرعىن ءۇي پايدالانۋعا بەرىلگەن, سونىڭ ىشىندە 26 665 — جەكە ءۇي.