قوستانايدا «ۇلكەن ەل – ۇلكەن وتباسى» اتتى جالپىرەسپۋبليكالىقجوبا شەڭبەرىندە قازاقستان حالقى وبلىستىق اسسامبلەياسى «قوعامدىق كەلىسىم» مەكەمەسى ۇيىمداستىرعان قازاق ۇلتتىق مادەني كۇنى مەەركەگە اينالدى. وندا ءبىرىنشى رەت تاقيا كۇنى اتالىپ ءوتتى.
حالقىمىزدىڭ باس كيىمى وزگە دە تۇركى حالىقتارىنا دا ورتاق. ولار سول ۇلتتىڭ تىلىندە تۇرلىشە اتالادى. مىسالى, كەلۋشىلەر كورمەدەن قازاقتىڭ تاقياسىنان وزگە ازەربايجاننىڭ اراحچىنىن, تاتاردىڭ ءتۇباتايىن, وزبەكتىڭ دۋپپىسىن تاماشالادى. ۇلتتىق قازاق داستارحانىندا حالقىمىزدىڭ جەنت, قۇرت, باۋىرساق سەكىلدى ۇلتتىق تاعامدارى كورسەتىلىپ عانا قويماي, كەلۋشىلەر اۋىز ءتيدى. سونىمەن قاتار, باۋىرساق تا تۇركى حالىقتارىندا تۇرلىشە ءپىسىرىلىپ, تۇرلىشە اتالاتىنىن قوستانايلىقتار مەن قالا قوناقتارى وسى مەرەكەدەن كوردى.
شارا قازاق ۇلتتىق مادەني كۇنى اتالعانىمەن, وندا قوستاناي ءوڭىرىن جەرۇيىق مەكەن ساناعان ءتۇرلى ۇلىستاردىڭ دا مادەنيەتى, ونەرى, ءداستۇرى قوسا ۇسىنىلدى. ولار ءبىرىن-ءبىرى تولىقتىرا ءتۇستى. حالقىمىزدىڭ قولونەرى جان-جاقتىلىعىمەن, بايلىعىمەن تاڭقالدىرادى. اعاش شەبەرى تاڭاتقان بوجاقوۆ ءتۇرلى اعاشتان جاسالعان ىدىستارىن ۇسىندى. تاڭاتقان اعانىڭ اڭگىمەسى دە جۇرتتى ۇيىتتى. ول ىدىستاردى اعاشتىڭ ءتۇر-تۇرىنەن جاسايدى, ءار اعاشتان قانداي ىدىس جاساۋعا بولاتىنىن, ولاردىڭ تاعامنىڭ بۇزىلماي ساقتايتىن قاسيەتتەرىنە دەيىن ايتىپ بەردى.
«ەرتەدە ۇستا اتالارىمىز نان سالاتىن, ىدىستى كوك تەرەكتەن جاساعان. كوك تەرەكتىڭ ناندى كوگەرىپ كەتۋدەن ساقتايتىن قاسيەتى بار. وسى سياقتى ۇمىتىتىلعان تۇرمىستىق سالتتارىمىز تولىپ جاتىر. اتالارىمىز تەك دالادا عانا ەمەس, اعاشتى, ورماندى جەرلەردى دە جايلاعان عوي, سوندا ايتۋلى اعاش ۇستالارى بولعان» دەيدى اعاش شەبەرى تاڭاتقان اعاي.
شاراعا جينالعاندار قازاق جانە ءتۇرلى ۇلىستار اندەرى مەن كۇيلەرىنەن تۇراتىن كونتسەرتتى تاماشالادى.
ءنازيرا جارىمبەت,
«ەگەمەن قازاقستان»
قوستاناي