قازىر بالالاردىڭ جان-جاقتى دامۋىنا تولىق مۇمكىندىك بار. مەكتەپ وقۋشىلارىنىڭ عىلىم-ءبىلىمنىڭ قىر-سىرىن ەرتە جاستان مەڭگەرۋلەرىنە «نۇر وتان» پارتياسى دا ەرەكشە ءمان بەرىپ, جاقسى باستامالارعا ۇيىتقى بولىپ كەلەدى. جاڭا وقۋ جىلىندا اتىراۋدا وسى باعىتتاعى جۇمىستار جاندانا باستادى. ايتالىق «جاس وتان» جق مەن «بولاشاق» قاۋىمداستىعى قولعا العان «English for Jastar» اتتى جوبا جوعارىداعى سوزىمىزگە ايقىن دالەل. اۋىل بالالارىنا اعىلشىن ءتىلىن ۇيرەتۋ ماقساتىندا قولعا الىنعان جوبا بويىنشا يساتاي, يندەر, ماحامبەت, ماقات, جىلىوي اۋداندارىندا 12 ەرىكتى جۇمىس ىستەپ جاتىر. ولارعا بارلىق جاعداي جاسالىپ, باسپانا, تاماقتانۋ, تاسىمال ماسەلەلەرى دە شەشىلگەن. – «English for Jastar» پارتيالىق جوباسى ەكى ايعا ەسەپتەلگەن. ەرىكتىلەر 20 قىركۇيەك پەن 20 قاراشا ارالىعىندا اۋىل بالالارىمەن جۇمىس ىستەپ, اۋدان جاستارىنىڭ اعىلشىن تىلىندە سويلەۋ ماشىعىن دامىتادى. جوبا اياسىندا 500-دەن استام بالانى قامتۋ جوسپارلانىپ وتىر, – دەيدى «نۇر وتان» پارتياسى اتىراۋ وبلىستىق فيليالىنىڭ ءباسپاسوز حاتشىسى ەلميرا تۇنعاتاروۆا.
سونداي-اق پارتيا باستاماسىمەن بالالارعا ارنالعان IT-سىنىپتار اشىلدى. بريتاندىق «Love to code» باعدارلاماسىنىڭ حالىقارالىق ءبىلىم فرانشيزاسى پايدالانىلعان بۇل جوبا بويىنشا ارنايى سىنىپتا 8-16 جاس ارالىعىنداعى وقۋشىلار ءبىلىم الادى. وقۋشىلار ورتالىعىنىڭ باسشىسى ايزادا تۇسىپقاليەۆا جوبا اياسىندا التى توپ اشىلعانىن, بالالاردىڭ اتالعان سالاعا قىزىعۋشىلىقتارى جوعارى ەكەنىن ايتادى. جالپى «تسيفرلى قازاقستان» باعدارلاماسى نەگىزىندە وبلىستا 10 IT-سىنىپ بالالار يگىلىگىنە جۇمىس ىستەۋدە.
ودان بولەك – اتىراۋ قالاسىندا العاش رەت مەكتەپ جانىنان بالالار كوۆوركينگ ورتالىعى پايدالانۋعا بەرىلدى. №2 مەكتەپتەگى جاڭادان اشىلعان ورتالىقتا بالالاردىڭ بوس ۋاقىتتارىن ءتيىمدى وتكىزۋلەرىنە بارلىق جاعدايلار قاراستىرىلعان. ەندى وقۋشىلار مەن اتا-انالارعا ارنالعان ءتۇرلى ترەنينگتەر, ينتەللەكتۋالدىق سايىستار, ساباقتار وسى جەردە وتەدى. «قازاقستان كىتاپحانالارى – ءبىلىم ورتالىقتارى» پارتيالىق جوباسى اياسىندا اتىراۋداعى 10 كىتاپحانا جانىنان كوۆوركينگ ورتالىقتارى اشىلعان ەدى. ال جاڭا ورتالىققا اتىراۋ قالالىق ءماسليحاتىنىڭ دەپۋتاتى الىبەك سەمعاليەۆ دەمەۋشى بولدى.
بالالاردىڭ قارىم-قابىلەتتەرىن دامىتۋ ماقساتىندا وبلىستا جۇزەگە اسىپ جاتقان يگى جوبالار بارشىلىق. وسىنداي جۇمىستاردىڭ ناتيجەسىندە بيىل قوسىمشا ءبىلىم بەرۋمەن قامتۋ كورسەتكىشى 8,6 پروتسەنتتەن 22,4-كە كوتەرىلدى.
باقىتگۇل باباش,
«ەگەمەن قازاقستان»
اتىراۋ