«BLIND RACE ASTANA – PARIS» قۇرلىقارالىق ۆەلومارافونىنا قاتىسۋشىلار قازاقستانعا ورالدى. «سپورتتا شەكارا جوق» دەگەن ۇرانمەن وتكەن بۇل ءىس-شاراعا كوزى مۇلدەم كورمەيتىن جانە ناشار كورەتىن سپورتشىلار قاتىستى. ولار ەرىكتىلەرمەن بىرگە استانادان پاريجگە دەيىنگى 5 مىڭ شاقىرىم جولدى ۆەلوسيپەدپەن ءجۇرىپ ءوتتى.
بۇل جوبانىڭ جۇزەگە اسۋىنا «نۇر وتان» پارتياسى قولداۋ كورسەتكەن ەدى. سوعان وراي كەشە ۆەلومارافون قاتىسۋشىلارى پارتيا توراعاسىنىڭ ءبىرىنشى ورىنباسارى ماۋلەن اشىمباەۆپەن كەزدەستى. بەس مىڭ شاقىرىم جول, 6 مەملەكەت جانە 30 قالا. وسىنشاما قاشىقتىقتى باعىندىرعان ۆەلومارافونشىلار قازاقستان, رەسەي, بەلارۋس, پولشا, گەرمانيا, فرانتسيا ەلدەرىن باسىپ ءوتتى.
بۇل جوبا ءوزىنىڭ قاتىسۋشىلارىمەن ەرەكشە. سەبەبى ولار وسىنداي باتىل قادام ارقىلى قوعامنىڭ مۇمكىندىگى شەكتەۋلى جاندارعا دەگەن كوزقاراسىن وزگەرتۋدى جانە ءوز بويلارىنداعى كۇدىك پەن كۇماندى جەڭۋدى الدارىنا باستى ماقسات ەتىپ قويعان. ۆەلومارافون بارىسىندا قاتىسۋشىلار كۇنىنە 100-200 شاقىرىم جول ءجۇرىپ وتىرعان. زاعيپ جاندار نەگىزىنەن ەكىكىسىلىك ۆەلوسيپەدتە ستوكەردىڭ (ارتقى ورىندىقتا وتىرىپ جۇرگىزەتىن ۆەلوسيپەدشى) مىندەتىن اتقارعان. ال پيلوتتىڭ ءرولىن ەرىكتىلەر اتقاردى. سوعان بايلانىستى ولارعا نەگىزىنەن جولدى باعدارلاۋ, ۆەلوسيپەدتى باسقارۋ سياقتى مىندەتتەر جۇكتەلسە, باستى كۇش ستوكەرلەرگە تۇسكەن. سوندىقتان مۇمكىندىگى شەكتەۋلى جانداردىڭ بۇل ارەكەتىن باتىلدىققا بالاۋعا تولىق نەگىز بار.
م.اشىمباەۆ سپورتشىلاردى مارافوننىڭ ءساتتى اياقتالۋىمەن قۇتتىقتاپ, بۇل باستاما ەلىمىزدى الەمگە تانىتۋعا, قازاقستاندا پاراليمپيادالىق سپورت تۇرلەرىنىڭ دامۋىنا جانە مۇمكىندىگى شەكتەۋلى جاندار اراسىندا سالاماتتى ءومىر سالتىن ناسيحاتتاۋعا ۇلكەن ۇلەسىن قوساتىن يگى ءىس ەكەنىن ايتتى.
– قاتارىنان 3 جىل بويى وتكىزىلىپ كەلە جاتقان ۆەلومارافونعا بيىل «نۇر وتان» پارتياسى دا قولداۋ كورسەتىپ, ونىڭ تابىستى جۇزەگە اسىرىلۋىنا اتسالىستى. سونىڭ ناتيجەسىندە جوبا قۇرلىقارالىق دەڭگەيگە كوتەرىلىپ, قاتىسۋشىلار ەۋروپانىڭ 6 مەملەكەتى مەن 30 قالاسىن باسىپ ءوتتى. وسى جولداعى سىزدەردىڭ قاجىر-قايراتتارىڭىز, ومىرگە دەگەن قۇشتارلىقتارىڭىز بەن جەڭىسكە دەگەن قۇلشىنىستارىڭىز, توزىمدىلىكتەرىڭىز بەن تاباندىلىقتارىڭىز جانە ەرىك-جىگەرىڭىز – بارشا حالىققا, اسىرەسە جاستارعا ۇلگى بولاتىن ونەگەلى ءىس. حالىق وزدەرىڭىزدەي رۋحى مىقتى جانداردى قاشاندا قۇرمەت تۇتىپ, ماقتان ەتەدى. الداعى ۋاقىتتا دا پارتيا وسىنداي يگى باستامالارعا قولداۋ كورسەتۋ ءىسىن جالعاستىرا بەرەدى, – دەدى م.اشىمباەۆ.
سونداي-اق ول پارتيا قىزمەتىن جاڭعىرتۋ اياسىندا قايتا جاندانعان «كەدەرگىسىز كەلەشەك» پارتيالىق جوباسىنا دا توقتالىپ ءوتتى.
– بۇگىندە پارتيا مۇمكىندىگى شەكتەۋلى جاندارعا قولداۋ كورسەتۋ ماقساتىندا «كەدەرگىسىز كەلەشەك» جوباسىن جۇيەلى جۇزەگە اسىرىپ كەلەدى. بۇل جوبا پارتيا قىزمەتىن جاڭعىرتۋ اياسىندا جاندانىپ, جاڭاشا قارقىن الدى. سونىڭ ناتيجەسىندە ناقتى باسىمدىقتار انىقتالدى. ياعني, مۇمكىندىگى شەكتەۋلى جاندارعا ارنالعان كەدەرگىسىز ورتا قالىپتاستىرۋ, ولاردىڭ ينكليۋزيۆتى ءبىلىم الۋلارىنا ىقپال ەتۋ, جۇمىسقا ورنالاسۋلارىنا قولداۋ كورسەتۋ جانە وسى سالاعا قاتىستى زاڭنامالاردى ودان ءارى جەتىلدىرۋگە ايرىقشا كوڭىل ءبولىپ وتىرمىز. سونداي-اق پارتيا ەلىمىزدەگى ساياسي ومىرگە بەلسەنە ارالاسىپ, ءماسليحات, ءماجىلىس سايلاۋلارىنا قاتىسقىسى كەلەتىن مۇمكىندىگى شەكتەۋلى جاندارعا دا قولداۋ كورسەتۋگە دايىن, – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
ۆەلومارافوننىڭ ۇيىمداستىرۋشىسى, «سپورتتا شەكارا جوق» جوباسىنىڭ جەتەكشىسى باقتيار بازاربەكوۆتىڭ ايتۋىنشا, بۇل شارانىڭ ماقساتى – سالاماتتى ءومىر سالتىن جانە تابيعي تازا كولىك ءتۇرى سانالاتىن ۆەلوسيپەدتى ناسيحاتتاۋ, سونداي-اق ەكوتۋريزمدى دامىتىپ, مۇمكىندىگى شەكتەۋلى جانداردىڭ سپورتپەن شۇعىلدانۋىنا جاعداي جاساۋ.
وسى رەتتە بۇل – اتالعان توپتىڭ ءۇشىنشى ءىرى ۆەلوشەرۋى ەكەنىن اتاپ وتكەن ءجون. العاشقى ەكەۋى الماتى – استانا جانە الماتى – ىستىقكول باعىتتارى بويىنشا وتكەن ەدى. ۆەلومارافون كەزىندە كوماندا قۇرامى 17 ادامنان تۇردى. ونىڭ ىشىندە 6 ستوكەر (كوزى مۇلدەم كورمەيتىن جانە ناشار كورەتىن جاندار), 6 پيلوت (ۆەلوتاندەمدە جول نۇسقاۋشى ەرىكتىلەر) جانە 5 ەرىكتى (وپەراتور, جۇرگىزۋشى, اسپاز, مەديتسينا قىزمەتكەرى) بولدى. ولار 5 ەكى كىسىلىك جانە 2 ءبىر كىسىلىك ۆەلوسيپەدپەن ءجۇرىپ وتىردى.
جولدىباي بازار,
«ەگەمەن قازاقستان»