ءبىراز ۋاقىت بۇرىن ءمالىم بولعانداي, «حابار» اگەنتتىگى «Junior Eurovision – 2018» حالىقارالىق ءان بايقاۋىنا قاتىسۋ ءۇشىن ۇمىتكەرلەر اراسىندا رەسپۋبليكالىق ىرىكتەۋ وتكىزگەن بولاتىن. وسىعان وراي قىركۇيەك ايىنىڭ العاشقى اپتاسىندا ىرىكتەۋدىڭ ءبىرىنشى كەزەڭىنەن وتكەن ون ءفيناليستىڭ ەسىمى انىقتالعانى بەلگىلى. سوڭعى كەزەندە «ايالاعان استانا − 2015», «گولوس. دiتي», «نادەجدى ەۆروپى», «BraVo», ت.ب. وتاندىق جانە حالىقارالىق بايقاۋلاردىڭ جۇلدەگەرى دانەليا تولەشوۆا دا باعىن سىناپ, 946 داۋىسپەن ۇزدىك شىقتى. ەندىگى كەزەكتە دانەليا بيىل مينسكىدە وتەتىن «Junior Eurovision – 2018» بايقاۋىندا ەلىمىزدىڭ اتىنان ءان شىرقايدى. تومەندەگى شاعىن سۇحباتىندا دانەليا ىرىكتەۋ كەزەڭى بارىسىنداعى ساتتەرىمەن بولىسكەن ەدى.
– دانەليا, جەڭىسكە جەتۋىڭمەن قۇتتىقتايمىز. «Junior Eurovision – 2018» ۇلتتىق ىرىكتەۋ كەزەڭىنە دايىندىق وتە قىسقا مەرزىمدە وتكەنى بەلگىلى. ءوزىڭ دايىندىق بارىسىن قالاي وتكىزدىڭ؟
– ارينە, ۋاقىت وتە تىعىز بولدى. وقۋ جىلى دا باستالىپ كەتتى. مەكتەپتەن ۇزاق ۋاقىتقا قول ءۇزىپ قالا المايتىندىعىم انىق ەدى. بىراق تىم قىسقا مەرزىمگە قاراماستان, ساباعىما دا, ءان ايتۋعا دا ۇلگەردىم. فينالعا شىققان باسقا دا بالالار وسىنداي ۋاقىتتىڭ تىعىزدىعىن سەزىنە وتىرىپ دايىندالدى. مەنىمەن بىرگە ىرىكتەۋ كەزەڭىنە قاتىسقان بالالاردىڭ بارلىعى تالانتتى. از عانا ۋاقىتتىڭ ىشىندە ءبىر-بىرىمىزگە باۋىر باسىپ, وتە جاقىن دوستارداي بولىپ كەتتىك.
– دانەليا, وسىعان دەيىن دە اۋەزى جاعىنان, ءماتىنى تۇرعىسىنان دا كۇردەلى اندەردى تاڭداپ ءجۇرسىڭ. بۇل جولى دا سولاي بولدى. نەلىكتەن «وزىڭە سەن!» ءانىن تاڭدادىڭ؟
– بۇل ءان مەنىڭ جان دۇنيەمە وتە جاقىن سەزىلدى. ىشكى رۋحاني الەمىممەن ۇيلەسىم تاپقان ءاندى قانداي كۇردەلى بولسىن, مەن جەڭىل ورىنداپ شىقتىم. ارينە, كورەرمەننىڭ الدىنا شىققاندا قاتتى تولقىعانىم راس. ال «وزىڭە سەن!» ءانى كەز كەلگەن ءجاسوسپىرىمنىڭ بويىندا بولاتىن سەنىمسىزدىك ارەكەتتەردى جەڭىپ, قانداي دا ءبىر كۇش-قۋات بەرەتىنى ءسوزسىز. ال ونداي كەزدە سەنىمدىلىك تە ايقىن, ارمانىڭا دا نىق قادام باساسىڭ. ءاندى جازۋ بارىسىندا مەنىڭ پىكىرىم, ويلارىم, ۇسىنىستارىم نازارعا الىندى.
– بىلۋىمشە, ءاننىڭ ءسوزىن كاميللا دايروۆا, اۋەزىن يۆان لوپۋحوۆ جازدى ەمەس پە؟ وسىنداي شىعارماشىل جانداردى قالاي كەزدەستىردىڭ؟
– قازاق تىلىندەگى ءماتىننىڭ اۆتورى كاميللا دايروۆامەن ۇستازىم ارقىلى تانىسسام, ال اعىلشىن تىلىندەگى ءماتىندى جازعان ارتەم كۋزمەنكوۆ جانە كومپوزيتور يۆان لوپۋحپەن ۋكرايندا «گولوس.دiتي» بايقاۋىندا تانىسقان ەدىم. اۆتورلار ماعان شابىت بەرىپ, ەرەكشە ءبىر شىعارماشىلىق ساتتەر سىيلادى.
– ءاندى ايتۋعا قانشا ۋاقىت دايىندالدىڭ؟
– ۇستازىم, ناتاليا چۋراكوۆامەن ەكى اپتا بويى تىنىمسىز دايىندىقتا بولدىق. ارينە, ءاندى مەڭگەرۋ وڭاي بولعان جوق, دەگەنمەن تىڭدارماندارعا ۇنادى دەپ ويلايمىن.
– دانەليا ءان ونەرىنە دەگەن قۇشتارلىق سەنىڭ بويىڭدا قالاي پايدا بولدى؟
– وتباسىندا اكەم فورتەپيانودا وينايدى, ال مەن ول ورىنداعان اندەردى ۇيىپ تىڭدايمىن.ءۇش جاسىمنان ءان ايتقاندى ۇناتتىم دەسەم دە بولادى. ۇيدە ءىنىم جانە سىڭلىممەن شاعىن كونتسەرتتەر ۇيىمداستىراتىنبىز.
– ەندى, مىنە, كىشكەنتاي دانەليا ۇلكەن بايقاۋلاردىڭ جەڭىمپازى بولىپ ءجۇر. الدا قانداي جوسپارلارىڭ بار؟
– مەنىڭ جوسپارىم, وقۋ جانە ءان ايتۋ شەبەرلىگىمدى شىڭداي ءتۇسۋ. مەكتەپتى وتە جاقسى باعاعا اياقتاسام, ءارى قاراي ۋاقىت كورسەتە جاتار دەپ ويلايمىن.
– ون جاسىڭدا «گولوس. دiتي» بايقاۋىنا قاتىسىپ, ەرەكشە اندەرىڭدى كوپشىلىك ۇيىپ تىڭدادى. دميتري موناتيكتىڭ شىعارماشىلىق ۇجىمى دا سەنىڭ ورىنداۋىڭا ءتانتى بولدى. قازىرگى كەزدە وسى ۇجىممەن شىعارماشىلىق بايلانىستار بار ما؟
– ديما Monatik ءوز سالاسىنىڭ كاسىپقويى. بايقاۋ بارىسىندا ول بىزدەرمەن كۇنىنە بىرنەشە ساعات بويى دايىندالاتىن. مەن كوپ نارسە ۇيرەندىم. بايقاۋدان كەيىن كونتسەرتتەرگە دە بىرگە شىقتىق. ال قازىرگى كەزدە بايلانىسىمىز ۇزىلگەن جوق, ءجيى حابارلاسىپ تۇرامىز.
– كۇنى كەشە وتكەن ىرىكتەۋ كەزەڭىنەن كەيىن كورەرمەندەر «دانەليا – «جۇلدىز!» دەپ سەنىڭ مارتەبەڭدى كوتەرىپ جاتتى. «جۇلدىز» ۇعىمىن قالاي تۇسىنەسىڭ, ول قانداي بولۋى كەرەك؟
– ماعان سەنىم ارتقان تىڭدارماندارعا ۇلكەن راحمەت. ال جۇلدىز بولۋ كاسىبي تۇرعىدان ۇلكەن جاۋاپكەرشىلىكتى تالاپ ەتەدى. قاراپايىمدىلىق پەن ەڭبەكقورلىق تا قاجەت. مەن ءۇشىن جۇلدىزدار – ديماش قۇدايبەرگەن, دجەننيفەر لوپەس, Monatik سياقتى ەڭبەكقور جاندار.
– شەتەلدەرگە بايقاۋلارعا بارعاندا قازاقستان تۋرالى سۇراسا قالاي جاۋاپ بەرەر ەدىڭ؟
– مەن قازاقستانىممەن ماقتانار ەدىم. ەلىمىزدە قانشاما تالانتتى بالالار بار. ولار دا الەمگە تانىلسا دەپ ارماندايمىن. سونىمەن قاتار جەر جۇزىندەگى ەڭ كورىكتى قالا – الماتىنى ماقتان ەتەر ەدىم!
– اڭگىمەڭە راقمەت. سەنەن زور ءۇمىت كۇتەمىز. حالىقارالىق بايقاۋدان تەك جەڭىسپەن ورالۋىڭا تىلەكتەسپىن. ەلۆيرا سەرىكقىزى,
«ەگەمەن قازاقستان»