بىلتىرعى جىل باسىنان بەرى مونوپولياعا قاتىستى 34 زاڭ بۇزۋشىلىق انىقتالعان. بۇل تۋرالى ۇلتتىق ەكونوميكا مينيسترلىگىنە قاراستى تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ استانا قالاسى بويىنشا دەپارتامەنتى وتكىزگەن ءباسپاسوز ءماسليحاتىندا ايتىلدى.
كوميتەتتىڭ ەلوردالىق دەپارتامەنتىنىڭ ءبولىم باسشىسى داستان دۋمان ۇلى تەرگەۋلەردىڭ قورىتىندىسىن جاريالادى. وتكەن جىلعى تاركىلەنگەن تابىس پەن ايىپپۇل سوماسى 15 ملن تەنگە شاماسىندا بولسا, بيىلعى جىلدىڭ ءبىرىنشى جارتىجىلدىعىندا بۇل كورسەتكىش 33 ملن تەڭگەگە جەتىپتى. د.دۋمان ۇلىنىڭ ايتۋىنشا, بىلتىر جانار-جاعارماي قۇيۋ بەكەتتەرىندە سۇيىتىلعان گازدى جانە اي-92, 95 بەنزينى مەن ديزەل وتىن بولشەك ساۋدادا ساتۋ سالاسىندا زاڭ بۇزۋشىلىقتار ورىن العان. اتالعان تەرگەۋلەردىڭ ناتيجەسىندە نارىق سۋبەكتىلەرىنە قاتىستى اكىمشىلىك ىستەر قوزعالىپ, اكىمشىلىك جاۋاپكەرشىلىككە تارتىلىپ, ايىپپۇل سالىنعان. وتكەن جىلى تۇرعىندار تاراپىنان استانا قالاسىنداعى اۋەجاي اۆتوتۇراعىنىڭ باعاسى قىمبات بولۋىنا بايلانىستى شاعىمدار تۇسكەن. تەكسەرىس ناتيجەسىندە, اۆتوتۇراق باعاسى نارىقتاعى باعادان 20 پروتسەنتكە ارتىق ەكەندىگى انىقتالعان. بۇل ماسەلە بويىنشا تەرگەۋ جۇرگىزىلىپ, ءتيىستى شارالار دەر كەزىندە قولدانىلدى. ال بيىل كومىردى جانە گازگولدەردى تولتىرۋ ءۇشىن سۇيىتىلعان گازدى بولشەك ساۋدادا ساتۋ بويىنشا شيكىلىكتەر شىعىپ, ءتيىستى شارالار قابىلدانىپتى. قالا تۇرعىندارىنىڭ باسىم كوپشىلىگى ەلەكتر ەنەرگياسىنىڭ دۇرىس ەسەپتەلمەۋىنە قاتىستى ءجيى شاعىمدانادى ەكەن. الداعى ۋاقىتتا تۇسكەن ارىز-شاعىمدار بويىنشا جۇمىس جۇرگىزىلمەك.
ەركەجان ايتقازى,
«ەگەمەن قازاقستان»