گرۋزيادا پرەزيدەنتتىككە ۇمىتكەرلەردى تىركەۋ پروتسەسى اياقتالدى. 28 قازاندا وتەتىن سايلاۋعا قاتىسۋعا نيەت بىلدىرگەن 46 ۇمىتكەردەن 25-ءى رەسمي تۇردە تىركەلدى. بۇل جونىندە جەكسەنبى كۇنى بريفينگتە ورتالىق سايلاۋ كوميسسياسىنىڭ ءباسپاسوز-سپيكەرى اننا ميكەلادزە مالىمدەدى.
25 ۇمىتكەردىڭ 19-ى ساياسي پارتيالار, 6-ۋى باستاماشى توپتاردىڭ اتىنان قاتىسۋدا. سايلاۋعا قاتىسۋعا رۇقسات الۋ ءۇشىن ءار ۇمىتكەر كەم دەگەندە 25 923 سايلاۋشىنىڭ قولىن جيناۋى ءتيىس. «زاڭناماعا سايكەس, پرەزيدەنتتىككە تىركەلگەن ۇمىتكەر سايلاۋعا 12 كۇن قالعانشە (16 قازاندى قوسقا العاندا) وسك-عا جازباشا ءوتىنىش بەرىپ, ءوز كانديداتۋراسىن الىپ تاستاي الادى. اتالعان مەرزىم اياقتالعان سوڭ بارلىق ۇمىتكەرلەر سايلاۋ بيۋللەتەندەرىنە ەنگىزىلەتىن بولادى», - دەدى ميكەلادزە. وسك-عا تىركەلۋ ءۇشىن بارلىعى 46 سۋبەكت ءوتىنىش بىلدىرگەن: 26-ى باستاماشى توپتاردان, 20-ى ساياسي پارتيالاردان. ال ءارتۇرلى قۇقىقتىق نەگىزدەر سەبەبىنەن 21 ۇمىتكەردى تىركەمەۋگە تۋرا كەلگەن.