قوستاناي وبلىستىق ىشكى ىستەر دەپارتامەنتىنىڭ اعا سەرجانتتارى سارسەنباي نۇرماعامبەتوۆ پەن ىبىراي راقىمعاليەۆ جول بويىندا ايەلدى اجالدان امان الىپ قالدى.
قوستاناي وبلىستىق ىشكى ىستەر دەپارتامەنتىنىڭ قۇرامىندا اعا سەرجانتتار سارسەنباي نۇرماعامبەتوۆ پەن ىبىراي راقىمعاليەۆ بار جول-پاترۋلدىك باتالونىنىڭ ءاۆتوپاترۋلى تۇنگى ساعات 22.00-دە التىنسارين اۋدانىنىڭ زۋەۆكا پوسەلكەسىنىڭ تۇسىندا جول جيەگىندە توقتاپ تۇرعان ماشينانى بايقادى. ءتارتىپ ساقشىلارى كولىكتىڭ مەزگىلسىز توقتاۋىنىڭ سەبەبىن ءبىلۋ ءۇشىن دەرەۋ جەتتى. كولىك جۇرگىزۋشىسى دەنيس تاراسوۆ سالوندا اۋىر حالدە 53 جاستاعى اناسىنىڭ وتىرعانىن حابارلادى. ايەلدى جەدەل اۋرۋحاناعا سالۋ كەرەك بولاتىن.
پوليتسەيلەر تاراسوۆتىڭ ماشيناسىن جول ەرەجەسىنە سىيىمدى تاسىلدەرمەن ءتۇرلى-ءتۇستى شامدارىن جاعىپ, كەدەرگىسىز ءجۇرۋ بەلگى بەرە وتىرىپ, شۇعىل وبلىستىق اۋرۋحاناعا جەتكىزدى. ەگەر پوليتسەيلەر شۇعىل شارا قولدانباعاندا ايەلدىڭ جاعدايى تىم قيىندايتىن ەدى, وعان اۋرۋحانادا جەدەل جاردەم كورسەتىلىپ, ەم الا باستادى.
«پوليتسەيلەرگە دە, دارىگەرلەرگە دە ايتار العىسىم شەكسىز. پوليتسەيلەر انامدى دەر ۋاقىتىندا اۋرۋحاناعا جەتكىزۋگە كومەكتەستى.تالما اۋرۋىندا ءار مينۋت قىمبات ەكەنىن اناما دا, ماعان دا بەلگىلى ەدى» دەيدى دەنيس.
سارسەنباي نۇرماعامبەتوۆ پەن ىبىراي راقىمعاليەۆ جول بويىندا ادامدارعا مۇنداي كومەكتى كۇن سايىن كورسەتەدى. قىس ايلارىندا قارعا ومبىعىپ قالعان ماشينالاردى شىعارىپ جىبەرەدى, جارىقتارىن جوندەيدى, جۇرگىزۋشىلەر مەن جولاۋشىلاردى جىلىتىپ, ءۇسىپ كەتۋدەن ساقتايدى. ال جاز ايلارىندا سىنىپ, ءتۇن ىشىندە تۇرىپ قالعان كولىكتەر ءجيى كەزدەسەدى.
ءنازيرا جارىمبەت,
«ەگەمەن قازاقستان»
قوستاناي