بۇگىن الماتى قالاسىنداعى «Halyk Arena» ستاديونىندا «بالالار ەۆروۆيدەنيەسى» بايقاۋىنا رەسپۋبليكالىق ىرىكتەۋدىڭ فينالى وتەدى. «حابار» تەلەارناسى تىكەلەي ەفيردە كورسەتەتىن شارا بارىسىندا كورەرمەندەر وزدەرىنە ۇناعان قاتىسۋشىعا سمس جولداۋ نەمەسە تەلەفونمەن حابارلاسۋ ارقىلى داۋىس بەرە الادى.
فينالدا وڭىرلىك ىرىكتەۋلەردەن وتكەن 10 قاتىسۋشى العاش رەت مىڭداعان كورەرمەننىڭ الدىندا ءان ايتادى. مايا بەكباەۆا, نۇرسۇلتان قۇرمان, مارات ورالعازين جانە ەركەبۇلان مىرزابەك جۇرگىزەتىن كەش بارىسىندا ونەرپاز بالالاردىڭ ونەرىن ادىلقازىلار القاسى دا باعالايدى. دەگەنمەن, جەڭىمپاز كورەرمەندەر مەن ادىلقازىلاردىڭ ورتاق شەشىمى نەگىزىندە انىقتالاتىن بولادى. ال ادىلقازىلار قۇرامىندا تانىمال كاسىبي انشىلەر مەن پروديۋسەرلەر روزا رىمباەۆا, مەيرامبەك بەسپاەۆ, تامارا اسار, باعىم مۇحيتدەنوۆا, ەركە ەسماحان, قايرات نۇرتاس, رەنات عايسين, ءلايلا سۇلتانقىزى, ءمادينا سادۋاقاسوۆا جانە ديماش قۇدايبەرگەن بار.
«بالالار ەۆروۆيدەنيەسى» بايقاۋىنا رەسپۋبليكالىق ىرىكتەۋ فينالىنىڭ گالا كونتسەرتى «حابار» تەلەارناسىندا تىكەلەي ەفيردە كەشكى ساعات 18.30-20.00 ارالىعىندا بولادى. ودان كەيىن 30 مينۋت داۋىس بەرۋ شاراسى وتەدى. ال ساعات 20.55-تە تىكەلەي ەفيردە جەڭىمپازدىڭ ەسىمى جاريا ەتىلەدى.
ايتا كەتەيىك, «Junior Eurovision Song Contest» حالىقارالىق ءان بايقاۋى العاش رەت 2003 جىلى كوپەنگاگەندە (دانيا) 16 ەلدىڭ قاتىسۋشىسى اراسىندا ءوتتى. تەلەكورەرمەندەر مەن قازىلار القاسىنىڭ جەڭىمپازدى بىرلەسىپ انىقتاۋى 2008 جىلدان باستاپ ەنگىزىلدى. وعان دەيىن كورەرمەندەر تىكەلەي كورسەتىلىم كەزىندە داۋىس بەرەتىن. ءار جىلدارى بەلگيا, رۋمىنيا, نيدەرلاندى, كيپر, ۋكراينا جانە ت.ب. ەلدەر ۇيىمداستى بولدى. ال رەسەي, گرۋزيا, بەلارۋس جانە مالتا ەكى رەت جەڭىسكە جەتتى. 2017 جىلعى تبيليسيدە وتكەن بايقاۋدا «Wings» انىمەن رەسەيلىك 14 جاستاعى پولينا بوگۋسەۆيچ جەڭىمپاز اتاندى.
بيىل بايقاۋعا 19 ەل قاتىسادى. ولاردىڭ قاتارىندا البانيا, ارمەنيا, اۆستراليا, ازەربايجان, بەلارۋس, فرانتسيا, ماكەدونيا, گرۋزيا, يرلانديا, يزرايل, يتاليا, قازاقستان, مالتا, پولشا, پورتۋگاليا, رەسەي, سەربيا, نيدەرلاندى, ۋەلس بار. قازاقستان مەن ۋەلس بۇل بايقاۋعا العاش رەت قاتىسادى.