پارلامەنت سەناتى توراعاسىنىڭ ورىنباسارى بەكتاس بەكنازاروۆ جانە پارلامەنت ءماجىلىسىنىڭ دەپۋتاتى ماگەررام ماگەرراموۆ قۇرامىنا ەنگەن قازاقستان رەسپۋبليكاسى پارلامەنتىنىڭ رەسمي دەلەگاتسياسى ازەربايجان پارلامەنتىنىڭ 100-جىلدىعىنا ارنالعان سالتاناتتى شاراعا قاتىستى, دەپ حابارلايدى پارلامەنت سەناتىنىڭ ءباسپاسوز قىزمەتى.
ب.بەكنازاروۆ وسى مەرەيتويمەن ازەربايجان تاراپىن قۇتتىقتاي كەلىپ, كۇردەلى جىلداردا نەگىزى قالانعان تاۋەلسىزدىك, دەموكراتيا جانە پارلامەنتاريزم يدەيالارى قازىرگى ازەربايجاندا ودان ءارى دامۋ ۇستىندە ەكەنىن اتاپ ءوتتى. ەكى ەل اراسىندا قالىپتاسقان باۋىرلاس جانە دوستىق بايلانىستارعا ەرەكشە توقتالعان ول ازەربايجان قازاقستان ءۇشىن وڭتۇستىك كاۆكاز وڭىرىندەگى نەگىزگى ارىپتەس بولىپ تابىلاتىنىن جەتكىزدى.
سەنات توراعاسىنىڭ ورىنباسارى سونىمەن قاتار ەكىجاقتى پارلامەنتارالىق بايلانىستار مەن ىنتىماقتاستىق كوپتاراپتى قۇرىلىمدار اياسىندا ودان ءارى نىعايىپ, كەڭەيە تۇسەتىنىنە سەنىمىن ءبىلدىردى. قازاقستان دەلەگاتسياسىنىڭ باسشىسى ءسوز سوڭىندا باۋىرلاس ازەربايجان حالقىنا بەيبىتشىلىك پەن وركەندەي بەرۋىنە تىلەكتەستىگىن ءبىلدىردى.
سالتاناتتى شاراعا 150 مەملەكەتتىڭ پارلامەنتتىك دەلەگاتسيالارى, باكۋدا تىركەلگەن ديپلوماتيالىق ميسسيالار مەن حالىقارالىق ۇيىمدارىنىڭ باسشىلارى جانە باسقا دا رەسمي ادامدار قاتىستى.