كەشە وبلىس اكىمى دانيال احمەتوۆتىڭ ساپارى كەزىندە زىريان اۋدانىن التاي دەپ اتاۋ تۋرالى ۇسىنىس تالقىعا سالىندى.
ناقتىراق ايتساق, ايماق باسشىسىنىڭ اۋداندىق ءماسليحات دەپۋتاتتارى مەن جەرگىلىكتى قاۋىمداستىق وكىلدەرىمەن كەزدەسۋىندە ءسوز بولدى.
اۋداندىق ءماسليحات دەپۋتاتى لاريسا گرەچۋشنيكوۆا 27 تامىزدا زىريان اۋدانىنىڭ اكىمى نۇرجان توقسەيىتوۆكە جەرگىلىكتى قاۋىمداستىق وكىلدەرى اۋداندى دامىتۋ جانە قالا مەن اۋدان اتىن وزگەرتۋ جونىندە ۇسىنىس جىبەرگەنىن ايتادى. «بۇل ۇسىنىستى دەپۋتاتتار كورپۋسى قولداپ وتىر. قازىر كەزدەسۋلەر ۇيىمداستىرىلىپ, قوعامدىق پىكىرلەر زەرتتەلۋدە, 28 قىركۇيەكتە «گورنياك» مادەنيەت ۇيىندە قوعامدىق تىڭداۋ وتەدى», - دەيدى ول.
دەپۋتاتتار جاڭا اتاۋ اۋداننىڭ جاڭا برەندىن قالىپتاستىرىپ, ينۆەستيتسيا تارتۋعا, ەكونوميكانى دامىتۋعا تىڭ سەرپىن بەرەتىنىنە سەنىمدى. «بورودينو» شارۋا قوجالىعىنىڭ باسشىسى قايرات بوكەجانوۆ زىريان اۋدانىنىڭ تابيعاتى تاماشا بولعانىمەن, ازىرگە ءتۋريزمدى وركەندەتۋگە تولىق جاعداي جاسالماي وتىرعانىن, جاڭا اتاۋ وسى سالانىڭ اياعىنان قاز تۇرۋىنا سەپتەسەتىنىن اتاپ ءوتتى. «جاستار دا بۇل يدەيانى قۇپتاپ وتىر. ءبىز التاي قالاسىندا, التاي اۋدانىندا تۇرعىمىز كەلەدى», - دەيدى اۋداندىق جاستار رەسۋرستىق ورتالىعىنىڭ جەتەكشىسى ماينا ليسوۆتسوۆا.
وبلىس اكىمى دانيال احمەتوۆ كەزدەسۋدە اۋداندىق دەپۋتاتتار مەن جاستاردىڭ تاراپىنان ايتىلعان ۇسىنىستى قولدايتىنىن جەتكىزدى. «زىرياندى التاي دەپ اتاۋ بارلىق جانىنان دا كەلىپ تۇر. زىرياننىڭ تۇرعان جەرى التاي ەكەنى راس. التاي - سان ءتۇرلى حالىقتىڭ شىققان جەرى, اتاجۇرتى. سول سەبەپتى, ءبىز قانداي كيەلى جەردە تۇرىپ جاتقانىمىزدى ەشقاشان ۇمىتپاۋىمىز كەرەك. بۇل - ەڭ الدىمەن تاريحىمىزعا تاعزىم. اۋدان اتىن وزگەرتۋ ەكونوميكالىق تۇرعىدان دا ءتيىمدى بولارى ءسوزسىز. نەگە دەسەڭىز, التاي – برەندتىق اتاۋ. بۇل وڭىرگە تۋريستەردى كوپتەپ تارتۋعا مۇمكىندىك بەرەدى», - دەدى ايماق باسشىسى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زىريان اۋدانى