الماتى وبلىسىنا قاراستى سارقان اۋدانىنىڭ قۇرىلعانىنا 90 جىل تولۋىنا وراي سول ءوڭىردىڭ جوڭعار الاتاۋى ەتىگىندە ورنالاسقان تابيعاتى تاماشا, اۋاسى ساف, كوركى كوز سۇيىسىندەرتىن امانبوكتەر مەن ەكىاشا اۋىلدارىندا مەرەكەلىك ءىس-شارالار ۇيىمداستىرىلدى.
قۇرمەتتى مەيمانداردى سارقان قالاسىنىڭ كىرە بەرىسىندە قارسى العان اكىمشىلىك قىزمەتكەرلەرى مەن جەرگىلىكتى مەكەمە باسشىلارى الاشتىڭ ارداقتى ۇلى, كورنەكتى قوعام جانە مەملەكەت قايراتكەرى, تاريحشى, اعارتۋشى, تۇڭعىش تەمىر جول ينجەنەرى مۇحامەتجان تىنىشباەۆ پەن ۇلى وتان سوعىسى جانە جاپونيامەن بولعان جاۋىنگەرلىك قاقتىعىسقا قاتىسقان زاپاستاعى گەنەرال-مايور ابدىقادىر بولسامبەكوۆتىڭ ەسكەرتكىشتەرىنە گۇل شوقتارىن قويدى. ۇلى تۇلعاعا تاعزىم جاساعان قوناقتار تاۋ بوكتەرىن جاعالاپ, ەكىاشا اۋىلىنا قاراي جول تارتتى. ول جەردە مەرەكەلىك عىلىمي-پراكتيكالىق كونفەرەنتسيا ۇيىمداستىرىلدى. وسى جيىن بارىسىندا اۋداننىڭ تاريحى, قازىرگى تىنىس-تىرشىلىگى, ەكونوميكالىق الەۋەتى, ءتۇرلى سالادا قول جەتكىزگەن تابىستارى جانە دە بۇگىنگى تاڭدا كۇن تارتىبىندە تۇرعان وزەكتى ماسەلەلەر تۋرالى كەڭىنەن اڭگىمە قوزعالىپ, كەلەلى ويلار ايتىلدى.
راسىندا دا سارقان توپىراعىنان ەلدىڭ قوشەمەتىنە بولەنگەن ازاماتتار كوپتەپ شىققان. ولاردىڭ كوش باسىندا قازاقتىڭ شەجىرەسىن تىزبەكتەگەن مۇحامەتجان تىنىشپاەۆتان باستاپ, مەملەكەت قايراتكەرى كاكىمجان قازىباەۆ, مۋزىكا ونەرىنىڭ ساڭلاقتارى مۇقان تولەۋباەۆ پەن ەركەعالي راحماديەۆ, كينو ونەرىنىڭ مايتالمانى قۇمان تاستانبەكوۆ, داڭقتى بالۋاندار ابىلسەيىت ايحانوۆ پەن امانجول بۇعىباەۆ جانە باسقا دا ءىرى تۇلعالاردىڭ ءومىر جولىنان قىسقاشا دەرەكتەر كەلتىرىلدى.
ءتۇس بەل ورتادان اۋعانان سوڭ اقىندار ايتىسى ۇيىمداستىرىلدى. ءتورت ساعاتقا سوزىلعان جىر دوداسىندا ءبىرىنشى ورىندى ايدانا قاسابەك جەڭىپ السا, ەكىنشى ورىن قازىبەك جەڭىسحانعا بۇيىردى. ءۇشىنشى ورىندى اقسۋلىق قانات بوقان الدى. كەش باتا جەرگىلىكتى ونەرپازدار جانە وسى شاراعا ارنايى شاقىرىلعان ونەر جانە ەسترادا جۇلدىزدارىنىڭ قاتىسۋىمەن امانبوكتەر اۋىلىندا مەرەكەلىك كونتسەرت ءوتتى.
كەلەسى كۇنى تاڭ اتا قوناقتار سارقان اۋدانىنىڭ قول جەتكىزگەن جەتىستىكتەرىنە ارنالعان كورمەنى ارالادى. سودان كەيىن سالتاناتتى جيىن ۇيىمداستىرىلدى. ءبىرىنشى بولىپ ورتاعا شىققان الماتى وبلىسى اكىمىنىڭ ءبىرىنشى ورىنباسارى لاززات تۇرلاشوۆ ءسوز سويلەپ, ەلباسىنىڭ «رۋحاني جاڭعىرۋ: بولاشاققا باعدار» ماقالاسىنا بايلانىستى اۋداندا كوپتەگەن ءىستىڭ اتقارىلعانىن دا ايتا كەلە, وبلىس اكىمى اماندىق باتالوۆتىڭ قۇتتىقتاۋىن جەتكىزدى. ودان كەيىن ءسوز العان اۋدان اكىمى ەرعازى قوشانبەكوۆ ايتۋلى وڭىردە قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ تاپسىرمالارى قالاي جۇزەگە اسىپ جاتقانى جايىندا بايانداما جاسادى.
مەملەكەت باسشىسىنىڭ تاپسىرمالارىن, الداعى كۇندەرگە مەجەلەگەن ماقساتتار مەن مىندەتتەردى ىسكە اسىرۋ باعىتىندا ءبىز بۇگىن دە جۇمىلا جۇمىس جۇرگىزىپ كەلەمىز. اۋدان بويىنشا شاعىن جانە ورتا كاسىپكەرلىكتىڭ دەڭگەيى ارتتى, سالىقتار مەن بيۋدجەتتىڭ ءتۇسىمى ءوستى. الەۋمەتتىك, دەنساۋلىق ساقتاۋ, ءبىلىم بەرۋ سالالارىندا اۋىز تولتىرىپ ايتارلىق جەتىستىكتەرىمىز جۇرتشىلىقتىڭ كوز الدىندا. جەتىسۋ وڭىرىندە ۇرانعا اينالعان ءتاتتى ءتۇبىر كولەمىن بۇرىنعى دەڭگەيگە جەتكىزۋ ماقساتىندا قول جەتكەن جەتىستىكتەرىمىز اگرارلىق سالا ەڭبەككەرلەرىنىڭ ەرەن ەڭبەگىنىڭ ناتيجەسى ەكەنى انىق. وسى جۇمىستاردىڭ دالەلى رەتىندە ءانشى-سازگەرلەرىمىز بەن قولونەر شەبەرلەرى بۇگىنگى مەرەكەگە ۇلتتىق ءداستۇرىمىزدىڭ الۋان ءتۇرلى بوياۋلارىن اكەلسە, بەرەكەلى كۇزدىڭ كەۋسەنىندەي اۋىلشارۋاشىلىق ماماندارىمىز وزدەرى وندىرگەن ونىمدەرىن, وسىرگەن ءتورت ت ۇلىگىن جەرگىلىكتى جۇرتشىلىققا ۇسىنىپ وتىر. ءيا, اۋدان قۇرىلعاننان باستاپ, وسى ۋاقىت ارالىعىندا تالاي وزگەرىستەردىڭ بولعانى وزدەرىڭىزگە دە ءمالىم.
تەك تۇرعىنداردىڭ تۋعان جەر مەن وتانعا دەگەن سۇيىسپەنشىلىگى عانا ەش وزگەرگەن جوق. وسىدان 90 جىل بۇرىن نەگىزى قالانعان اۋدانىمىز بۇگىنگى تاڭدا دا دۇرىس باعىتپەن دامۋ ۇستىندە. قادىرمەندى قاۋىم! ەلباسىمىز نۇرسۇلتان ءابىش ۇلى نازارباەۆتىڭ «مەركەلىك كۇندەرگە جەتكىزگەن بەرەكەلى تىرلىگىمىز باياندى بولسىن» دەپ بارشا جۇرتتى ىنتىماققا شاقىرعانداي, ءبىزدىڭ كۇشىمىز بەن سەنىمىمىز حالىقتىڭ بىرلىگى مەن ىنتىماقتاستىعىندا قالا بەرمەك», – دەيدى سارقان اۋدانىنى اكىمى ەرعازى قوشانبەكوۆ.
وسى شارا بارىسىندا ەلىمىزدىڭ جانە سول ءوڭىردىڭ وركەندەۋىنە, كوركەيۋىنە ۇلەس قوسقان عالىم-اكادەميك امانكەلدى بەكباەۆ, ونەر قايراتكەرى سايات مەرەكە ۇلى, مەديتسينا سالاسىنىڭ ارداگەرى توكەن بلەسكەلدينوۆ, ارداگەر ۇستاز مىرزاحان قاباسوۆ, اۋىلشارۋاشىلىق سالاسىنىڭ قارت مامانى جانگەلدى زامانبەكوۆ, گەنەرال امانكەلدى قۇرمانعاليەۆ سىندى ءبىر توپ تۇلعالارعا «سارقان اۋدانىنىڭ قۇرمەتتى ازاماتى» اتاعى بەرىلدى.
90 جىلدىق مەرەيتويعا وراي وتكىزىلگەن وسى ءىس-شارانىڭ رەسمي بولىگى ودان كەيىن مەرەكەلىك كونتسەرت پەن تەاترلاندىرىلعان قويىلىمعا ۇلاسىپ, ۇلتتىق سپورت تۇرلەرىنەن جارىستار ۇيىمداستىرىلدى.
عالىم سۇلەيمەن,
«ەگەمەن قازاقستان»
الماتى وبلىسى
سارقان اۋدانى
سۋرەتتى تۇسىرگەن رۋسلان قادىروۆ