بۇگىنگى تاڭدا قازاقستان جازۋشىلار وداعى ادەبيەت ءۇشىن ماڭىزدى بىرقاتار جوبالاردى قولعا الىپ, ونىڭ جۇزەگە اسۋىنا سەبەپكەر بولۋدا. جۋىردا قازاقستان رەسپۋبليكاسى مادەنيەت جانە سپورت مينيسترلىگىمەن بىرلەسىپ, استانا تورىندە باس شاھاردىڭ جيىرما جىلدىق مەرەيتويىنا وراي «اق وردالى استانا» اتتى حالىقارالىق پوەزيا فەستيۆالىن ۇيىمداستىرعان بولاتىن.
اۆستراليا, رەسەي, ارمەنيا, قىرعىزستان سياقتى كوپتەگەن مەملەكەتتەر قالامگەرلەرىنىڭ استانا تورىندە باسىن قوسىپ, ولاردى بايتاق قازاقستاننىڭ كورىكتى جەرلەرىن تانىتۋ ماقساتىندا باياناۋىل جانە بۋراباي جەرلەرىنە ساياحات ۇيىمداستىرعان ەدى. وعان قازاقتىڭ بىرقاتار كورنەكتى اقىندارى مەن جاستار قاتىسىپ قايتقان بولاتىن. سونىمەن قاتار, ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ىسكە اسىرۋ ماقساتىندا قالامگەرلەردىڭ كىتاپتارىن شىعارۋ جانە ناسيحاتتاۋ باعىتىندا دا ەلەۋلى جۇمىستار اتقارىپ كەلەدى.
بۇگىن جامبىل وبلىستىق ىشكى ساياسات باسقارماسىنىڭ ۇيىمداستىرۋىمەن ەلىمىز بويىنشا باستاۋ العان قازاقستان جازۋشىلار وداعىنىڭ كوشپەلى وتىرىسى تۇڭعىش رەت اۋليەاتا وڭىرىندە ءوتتى. وداق توراعاسى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى ۇلىقبەك ەسداۋلەت باستاعان دەلەگاتسيا اۋليەاتا وڭىرىنە ارنايى كەلىپ, جامبىلدىقتارمەن جۇزدەستى. كەزدەسۋگە جامبىل وبلىسىندا تۇراتىن قازاقستان جازۋشىلار وداعىنىڭ مۇشەلەرى مەن قوعام قايراتكەرلەرى, سونىمەن قاتار وبلىستىق ارداگەرلەر كەڭەسىنىڭ مۇشەلەرى قاتىستى.
ءوز سوزىندە ۇلىقبەك ەسداۋلەت بۇگىنگى تاڭدا قازاقستان جازۋشىلار وداعىنىڭ قولعا الىپ جاتقان جوبالارىمەن تانىستىرىپ, كەلەشەك جوسپارلارىمەن ءبولىستى. سونىمەن قاتار, قاسيەتتى قاراشاڭىراققا مەملەكەتتىڭ كورسەتىپ وتىرعان قامقورلىعىن دا اتاپ ءوتتى. كەزدەسۋ بارىسىندا بەلگىلى جازۋشى, قازاقستان جازۋشىلار وداعى توراعاسىنىڭ ورىنباسارى مەرەكە قۇلكەنوۆ ءوزىنىڭ ادام جانە قوعام, ۇرپاق تاربيەسى تۋرالى ويلارىمەن بولىسسە, تانىمال سۋرەتشى ەركىن نۇرازحان تاعىلىمعا تولى تاعدىر يەلەرى جايلى ءوزىنىڭ ويىن ايتتى.
كەزدەسۋ جالپى ەركىن فورماتتا ءوتتى. جيىندى وبلىستىق ىشكى ساياسات باسقارماسىنىڭ باسشىسى بەرىك قۇرمانعالي جۇرگىزىپ وتىردى. كەلەلى كەزدەسۋدە قازاقستاننىڭ ەڭبەك سىڭىرگەن قايراتكەرى, جازۋشى نەسىپبەك ءداۋتاي ۇلى ادەبيەتتەگى تالانت پەن تانىم تۋرالى ءوزىنىڭ ويىن ورتاعا سالدى. ال اۋىلدا تۇرسا دا اقىن اتانعان تابيعات جىرشىسى قۋاندىق شولاق جەرگىلىكتى قالامگەرلەر شىعارماشىلىعىن ءتيىستى دەڭگەيدە ناسيحاتتاۋ تۋرالى ويىن ايتتى. سونىمەن قاتار, جالپى قاتىسۋشىلار ۇلىقبەك ەسداۋلەتكە وزدەرىنىڭ ساۋالدارىن جولداپ, ءتيىستى جاۋاپ الدى.
حاميت ەسامان,
«ەگەمەن قازاقستان»
جامبىل وبلىسى