دجاكارتادا وتكەن جازعى ازيا ويىندارىندا قازاقستاننىڭ ءانۇرانىن شىرقاتىپ, تۋىن بيىكتە جەلبىرەتكەن جەرلەستەرىمىزدىڭ ءبىرى – ءدىلداش كۇرىشباەۆا. سامبودان 68 كيلو سالماق دارەجەسىندە سىنعا تۇسكەن بالۋان قىز بارلىق قارسىلاستارىن قاپى قالدىرىپ, التىننان القا تاعىندى. ەلگە ورالعان بەتتە دىلداشپەن ازدى-كەمدى سۇحباتتاسۋدىڭ ءساتى ءتۇستى.
– جەڭىس قۇتتى بولسىن, ءدىلداش!
– راحمەت, اعا! بۇل ءبارىمىزدىڭ ورتاق جەڭىسىمىز. اسىرەسە سامبوشىلار قاۋىمى قاتتى قۋانىپ جاتىر. سەبەبى سپورتتىڭ بۇل ءتۇرى جازعى ازيا ويىندارىنىڭ باعدارلاماسىنا تۇڭعىش رەت ەنىپ وتىر. يندونەزيا استاناسىندا قىزدار 48 جانە 69 كيلو, ال ەرلەر 58 جانە 90 كيلو سالماقتاردا بەلدەستى. الداعى ۋاقىتتا ازيادادا سالماق دارەجەلەرى ارتسا, قازاقستاندىق سامبوشىلاردىڭ جەڭىپ العان جۇلدەلەرى الدەقايدا كوپ بولاتىنىنا سەنىمدىمىن.
– دجاكارتاداعى جارىس قالاي ءوتتى؟ قانداي مىقتى قارسىلاستارمەن كەزدەستىڭ؟
– تۇساۋكەسەر كەزدەسۋدە قىرعىزستاننان كەلگەن قىزدى «اۋىرتۋ» ادىسىمەن ۇتتىم. كەلەسى كەزەڭ وتە اۋىر بولدى. جاپونيانىڭ بالۋانى وتە مىقتى ەكەن. ۇزاق ۋاقىت ەكەۋمىز ءبىر-ءبىرىمىزدىڭ وسال تۇسىمىزدى تابا الماي, ابدەن قارا تەرگە تۇستىك. دەسەك تە وڭتايلى تۇستا ءبىر ۇپاي ولجالاپ, جەڭىستى قارسىلاسىمنىڭ ۋىسىنان جۇلىپ اكەتتىم. جارتىلاي فينالدا موڭعوليانىڭ جانە اقتىق سىندا وزبەكستاننىڭ وكىلىنەن ايلامدى اسىرىپ, التىن تۇعىرعا كوتەرىلدىم.
– جەڭىس تۇعىرىنا كوتەرىلگەندە ەرەكشە كۇي كەشكەن بولارسىڭ...
– ارينە ونى سوزبەن جەتكىزۋ قيىن. ءتورت جىلدا ءبىر وتەتىن وسىنداي ءدۇبىرلى دودادا ەل ءۇمىتىن اقتاپ, قازاقتىڭ ءانۇرانىن شىرقاتا العانىما قاتتى قۋاندىم, ايرىقشا شاتتاندىم, كەۋدەمدى ماقتانىش سەزىمى كەرنەدى.
– وسى سپورت ءتۇرىن قاي جەردە مەڭگەردىڭ؟ بالۋاندىق ونەردەگى ۇستازىڭ كىم؟
– ءوزىمنىڭ تۋىپ-وسكەن ولكەم – الماتى وبلىسى, كەربۇلاق اۋدانىنىڭ ورتالىعى سارىوزەك كەنتىندە سامبونىڭ قىر-سىرىنا قانىقتىم. العاش رەت جاتتىعۋ زالىنا كەلگەندە 13 جاستا ەدىم. 12 جىل بويى بۇل ونەرگە مەنى ەلىمىزگە ەڭبەك سىڭىرگەن جاتتىقتىرۋشى باقىت قوقىسبەكوۆ باۋلىدى. كەزىندە ول كىسى شاعىن عانا قويانكوز اۋلىنان بەرىك جەتپىسباەۆ پەن مەيىرجان قاشاعانوۆ سىندى الەم جانە ازيا چەمپيوناتىنىڭ جەڭىمپازدارى مەن جۇلدەگەرلەرىن شىعاردى. ۋاقىت وزا وسىنداي بىلىكتى باپكەردەن ءتالىم-تاربيە الۋ باقىتى ماعان دا بۇيىردى. قازىر دە باقىت اعانىڭ قول استىندا جاتتىعامىن.
– ءدىلداش, ازيا ويىندارىنا دەيىن دە كوپشىلىك نازارىندا ءجۇردىڭ. وسى سپورت تۇرىندە قول جەتكىزگەن تابىستارىڭ جايىندا قىسقاشا بايانداپ بەرسەڭ؟
– 2013-2016 جىلدار ارالىعىندا ايەلدەر اراسىندا وتكەن الەم چەمپيوناتتارىندا ءتورت مارتە جەڭىس تۇعىرىنا كوتەرىلدىم. سانكت-پەتەربۋرگ, كاسابلانكا جانە سوفيادا قولا مەدال السام, ناريتادا كۇمىس جۇلدەگە قولىم جەتتى. قاتارىنان ءتورت رەت ازيا بىرىنشىلىگىندە جەڭىمپاز اتاندىم. 2013 جىلى دۇنيەجۇزىلىك ۋنيۆەرسيادادا ءۇشىنشى تۇعىرعا تابانىم تيسە, 2017 جىلى جابىق عيماراتتاعى ازيا ويىندارىندا التىننان القا تاعىندىم. باسقا دا حالىقارالىق جانە رەسپۋبليكالىق جارىستاردا جەڭىپ العان جۇلدەلەرىم تاعى بار.
– ەندىگى ارمانىڭ قانداي؟
– سامبودان الەم چەمپيوناتىندا ءتورت رەت جەڭىس تۇعىرىنا كوتەرىلگەنىمەن, باس جۇلدەگە ءالى دە قولىم جەتپەي ءجۇر. سول بەلەستى باعىندىرعىم كەلەدى. دزيۋدو كۇرەسىنەن دە باق سىناپ, وليمپيا ويىندارىندا اتوي سالۋدى ارماندايمىن.
– كوپ راحمەت, ءدىلداش! العا قويعان ماقساتىڭا قول جەتكىزۋىڭە تىلەكتەسپىز.
اڭگىمەلەسكەن
عالىم سۇلەيمەن,
«ەگەمەن قازاقستان»