قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «قازاقستان قوعامىن جاڭعىرتۋ ۇدەرىسىندەگى وتباسىنىڭ ءرولى» اتتى القالى جيىنعا قاتىستى, دەپ حابارلايدى اقوردانىڭ ءباسپاسوز قىزمەتى.
باسقوسۋعا قوعامدىق دامۋ ءمينيسترى د.كالەتاەۆ, پارلامەنت دەپۋتاتتارى, قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرى, مەملەكەتتىك ورگاندار وكىلدەرى, بەلگىلى قوعام قايراتكەرلەرى جانە عىلىمي ۇيىمدار باسشىلارى قاتىستى.
ءىس-شارانى اشقان گ.ابدىقالىقوۆا ەلباسى ن.ءا.نازارباەۆتىڭ «وتباسى – ەڭ ۇلكەن باقىت, جاقسىلىق اتاۋلىنىڭ ءبارى سودان باستاۋ الادى» دەگەن سوزىنە توقتالدى.
بۇگىندە مەملەكەتتىك وتباسى ساياساتى قازاقستانداعى الەۋمەتتىك سالانىڭ نەگىزگى باسىمدىقتارىنىڭ ءبىرى بولىپ سانالادى. ەلباسى 2016 جىلى قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن بەكىتتى. وندا ۇزاق مەرزىمدىك ماقساتتار مەن مىندەتتەر, سونداي-اق وتباسىلىق-گەندەرلىك سالانى دامىتۋدىڭ باعىتتارى ايقىندالعان.
وتباسى ينستيتۋتىن قولداۋ ءۇشىن قازاقستاندا جۇرگىزىلىپ جاتقان الەۋمەتتىك ساياساتتىڭ ماڭىزدى قۇرامداس بولىگىنىڭ ءبىرى – ايەلدەرگە جانە بالالارى بار وتباسىلارعا الەۋمەتتىك كومەك كورسەتۋ جۇيەسى. ولار اتاۋلى كومەكتىڭ تۇتاس جۇيەسىمەن قامتاماسىز ەتىلگەن. اتاپ ايتقاندا, 2003 جىلدان بەرى بالا تۋعاندا بەرىلەتىن ءبىر رەتتىك جاردەماقى ەنگىزىلدى, 2006 جىلدان باستاپ بارلىق قازاقستاندىق وتباسىلارعا ءبىر جاسقا دەيىنگى بالا كۇتىمى ءۇشىن جاردەماقى تولەنەدى. بالالارى بار وتباسىلاردى قولداۋعا باعىتتالعان شارالاردى بيۋدجەتتەن قارجىلاندىرۋ 2007 جىلدان بەرى 5 ەسە ءوستى.
مەملەكەتتىك حاتشى ورنىقتى دامۋ ماقساتتارىنىڭ ءبىرى زورلىق-زومبىلىقتىڭ بارلىق ءتۇرىنىڭ تارالۋىن ايتارلىقتاي ازايتۋ ەكەنىن اتاپ ءوتتى.
– ءبىز مەملەكەتتىك ورگاندارمەن جانە ۇكىمەتتىك ەمەس ۇيىمدارمەن بىرلەسە وتىرىپ, بۇل كەلەڭسىزدىكتى بولدىرماۋ ءۇشىن الدىن الۋ جۇمىستارىن جۇرگىزىپ كەلەمىز, – دەدى گ.ابدىقالىقوۆا.
ەلدە ۇكىمەتتىك ەمەس ۇيىمداردىڭ قاتىسۋىمەن تۇرمىستىق سيپاتتاعى زورلىق-زومبىلىق ماسەلەلەرىن شەشۋ جونىندەگى 31 داعدارىس ورتالىعى جۇمىس ىستەيدى. تۇركىستان وبلىسىندا «وتباسىنداعى زورلىق-زومبىلىقسىز قازاقستان» پيلوتتىق جوباسى جۇزەگە اسىرىلۋدا.
جيىن سوڭىندا مەملەكەتتىك حاتشى قوعامدىق دامۋ مينيسترلىگىنە وتباسى ساياساتى بويىنشا جۇيەلى جۇمىستى جولعا قويۋدى, مەملەكەتتىك ورگاندار مەن ازاماتتىق قوعام جۇمىسىن ۇيلەستىرۋدى تاپسىردى.