جالپىۇلتتىق سوتسيال-دەموكراتيالىق پارتيانىڭ ءماجىلىس جانە ءماسليحاتتار سايلاۋىنا دايىندىق ناۋقانى قارقىن الدى. 26 قاراشا كۇنى الماتىدا وتكەن 9 سەزىندە الدا كەلە جاتقان پارلامەنت سايلاۋىنا 57 ادامنان تۇراتىن ءۇمىتكەرلەر ءتىزىمىن بەكىتكەن پارتيا بۇل كۇندەرى ەلىمىزدىڭ جەر-جەرىندە ۇگىت-ناسيحات جۇمىستارىن قىزۋ جۇرگىزۋدە.
كەشە جالپىۇلتتىق سوتسيال-دەموكراتيالىق پارتيانىڭ بەلسەندىلەرى سايلاۋالدى ۇگىتتى اقتوبە جەرىندە جالعاستىردى. پارتيا مۇشەلەرى بۇل وڭىردەگى الىس اۋداندارعا دا بارىپ, اۋىل تۇرعىندارىمەن ديدارلاسىپ, سويلەسپەكشى. ولاردىڭ ايتۋىنشا, اۋىل جاستارىن جۇمىسقا ورنالاستىرۋ ماسەلەسىن شەشۋ ارقىلى ازىق-ءتۇلىك تاۋارلارىنىڭ باعالارىنا ىقپال ەتۋگە بولادى. كەشە جسدپ مۇشەلەرى وبلىس ورتالىعىندا جانە حرومتاۋ اۋدانىندا بولدى. پارتيالىقتار توبىن باستاپ جۇرگەن بەلگىلى ساياساتكەر, جسدپ ءتورالقاسىنىڭ مۇشەسى پەتر سۆويك قازىرگى تاڭدا قازاقستانعا پرەزيدەنتتىك بيلىكتى پارلامەنتتىك بيلىكپەن نىعايتا ءتۇسۋ ماڭىزدى دەپ سانايدى. ساياساتكەر بۇل ارادا كوپپارتيالى پارلامەنتتى ايتىپ وتىرعانى تۇسىنىكتى. «پارلامەنت ۇكىمەتتى جاساقتاۋعا ءتيىس, ال ۇكىمەت پارلامەنتكە ەسەپ بەرۋگە ءتيىس», دەيدى پەتر سۆويك.
الماتى قالاسىنداعى الاتاۋ اۋدانىنىڭ تۇرعىندارىمەن كەزدەسۋ كەزىندە جسدپ وكىلدەرى سايلاۋ تىزىمىنە سايلاۋشىلاردىڭ بارلىعىن ەنگىزۋ جونىندە ءماسەلە كوتەردى. بۇل ءۇشىن جسدپ وكىلدەرى جەرگىلىكتى اكىمدىكتەرگە قالادا قازىرشە تىركەلە قويماعان ازاماتتاردىڭ بارلىعىن ۋاقىتشا تىركەپ, ولاردىڭ ازاماتتىق پارىزىن اتقارۋىنا جاعداي جاساۋ قاجەت دەپ سانايدى.
جالپىۇلتتىق سوتسيال-دەموكراتيالىق پارتيانىڭ قوعامدىق قابىلداۋ بولمەلەرى بارلىق وبلىس ورتالىقتارىندا جۇمىس ىستەپ تۇر. ولارعا بارعان ادامدار كوپتەگەن ماسەلەلەر بويىنشا كونسۋلتاتسيالار الۋدا. جسدپ الماتى قالالىق فيليالىنىڭ توراعاسى امىربەك توعىسوۆ مۇنداي قوعامدىق قابىلداۋ بولمەلەرىنىڭ ەسىگى كەلۋشىلەرگە قاشاندا اشىق ەكەنىن ايتادى. «كەز كەلگەن ۋاقىتتا, ءبىز تاڭەرتەڭگى وننان كەشكى التى-جەتىگە دەيىن كەلۋشىلەردى قابىلداي بەرەمىز. ءبىزدىڭ بىلىكتى زاڭگەرلەرىمىز بار. ءارتۇرلى ارىز-شاعىمداردى بەرۋ ءۇشىن قاجەتتى قۇجاتتاردى دايىنداي الامىز. قاجەت بولسا مۇمكىندىگىمىزگە قاراي ازاماتتاردى سوتتاردا قورعايمىز. وسىنىڭ ءبارىن تەگىن اتقارامىز», دەيدى ول.
الدىڭعى كۇنى جالپىۇلتتىق سوتسيال-دەموكراتيالىق پارتيا تاعى ءبىر ءماسەلە كوتەردى. پارتيا ورتالىق سايلاۋ كوميسسياسىنا سايلاۋ كوميسسيالارىنىڭ قۇرامىندا كەڭەسشى داۋىس قۇقىمەن جۇمىس ىستەپ جۇرگەن پارتيا وكىلدەرىنىڭ ەڭبەگىنە سايلاۋ كوميسسيالارىنىڭ باسقا دا مۇشەلەرىمەن قاتار اقى تولەۋ ءجونىندە ماسەلە قويدى. ءبىزدىڭ بىلۋىمىزدە, بۇل ماسەلە ورتسايلاۋكومدا سارسەنبى كۇنى قارالعان. ونىڭ قورىتىندىسى بويىنشا تەرريتوريالىق سايلاۋ كوميسسيالارىنا ساياسي پارتيالاردىڭ وكىلدەرى سايلاۋ كوميسسيالارىنا مۇشە بولىپ, جۇمىس ىستەگەن جاعدايدا سايلاۋ ناۋقانىن دايىنداۋ مەن وتكىزۋ كەزەڭىندە ولاردىڭ ورتاشا ايلىق جالاقىسىن ساقتاۋ ءمۇمكىندىگىن قاراستىرۋ جونىندە حات جىبەرىلگەن.
جاقسىباي سامرات.