24 قىركۇيەكتە لوندوندا وتەتىن FIFA The Best كەشىندە 2018 جىلى سوعىلعان ەڭ ادەمى گولدىڭ اۆتورى انىقتالادى. سول اتالىم بويىنشا جەڭىمپاز اتانعان ويىنشىعا سالتاناتتى تۇردە فەرەنتس پۋشكاش اتىنداعى جۇلدە تابىس ەتىلەدى.
فەرەنتس پۋشكاش ءوز ءداۋىرىنىڭ تەڭدەسسىز فۋتبولشىلارىنىڭ ءبىرى بولعانى بارشاعا ءمالىم. ۆەنگريا قۇراماسى ساپىندا ول 1952 جىلى وليمپيا ويىندارىنىڭ جەڭىمپازى, 1954 جىلى الەم چەمپيوناتىنىڭ كۇمىس جۇلدەگەرى اتاندى. ءوز ەلىنىڭ نامىسىن قورعاعان 11 جىل ارالىعىندا 85 رەت جاسىل الاڭعا شىعىپ, 84 مارتە نىسانى ءدال كوزدەدى. «گونۆەد» كلۋبىندا 13 جىل بويى ويناپ, 354 كەزدەسۋدە 357 گول سوقتى. كەيىننەن ءمادريدتىڭ «رەالى» ساپىندا 9 جىل ونەر كورسەتىپ, 180 ماتچتا 155 رەت دوپتى توردا تۋلاتتى.
مىنە, سول سۇرمەرگەننىڭ قۇرمەتىنە جىل سايىن فيفا تاراپىنان ەڭ ادەمى گولدىڭ اۆتورىنا ارنايى جۇلدە تاعايىندالۋدا. 2009 جىلدان بەرى ول سىيلىقتا كريشتيانۋ رونالدۋ, حاميت التىنتوپ, نەيمار, ميروسلاۆ ستوح, زلاتان يبراگيموۆيچ, حامەس رودريگەس, ۆەندەلل ليرا, موحد فايز سۋبري جانە وليۆە جيرۋ سىندى ساڭلاقتار يەلەندى.
بيىلعى جىلى فەرەنتس پۋشكاش اتىنداعى جۇلدەدەن ۇمىتكەرلەر قاتارىندا گارەت بەيل («رەال» مادريد), دەنيس چەرىشەۆ (رەسەي قۇراماسى), لازاروس حريستودۋلوپۋلوس («وليمپياكوس»), كريشتيانۋ رونالدۋ («رەال» مادريد), دجوردجيان دە ارراسكاەتا («كرۋزەيرو»), رايلي ماكگري («نيۋكاسل دجەتس»), ليونەل مەسسي («بارسەلونا»), بەنجامەن پاۆار (فرانتسيا قۇراماسى), ريكاردۋ كۋارەجما (پورتۋگاليا قۇارماسى) جانە مۇحامەد سالاح («ليۆەرپۋل») سىندى جۇلدىزدار بار. ال سولاردىڭ اراسىنان كىمنىڭ وزىپ شىعاتىنىن 24 قىركۇيەكتە بىلەتىن بولامىز.
عالىم سۇلەيمەن,
«ەگەمەن قازاقستان»