Cوڭعى جىلدارى قازاق-تۇرىك مادەنيەتىنىڭ دامۋىنىڭ ايقىن نىشاندارىن كىتاپ ءىسى سالاسىنان اڭعارامىز. الماتىداعى پاراسات ورداسى ۇلتتىق كىتاپحانادا قازاق كلاسسيكتەرىنىڭ تۇرىك تىلىنە اۋدارىلعان كىتاپتارىنىڭ تۇساۋكەسەرى ءوتتى.
الماتى قالاسىنداعى تۇركيانىڭ باس كونسۋلدىعىمەن بىرلەسە ۇيىمداستىرىلعان ءىس-شارا بارىسىندا بەردىبەك سوقپاقباەۆتىڭ «مەنىڭ اتىم - قوجا», تايىر جومارتباي ۇلىنىڭ «قىز كورەلىك», سپانديار كوبەەۆتىڭ «قالىڭ مال», مىرجاقىپ دۋلات ۇلىنىڭ «باقىتسىز جامال», سۇلتانماحمۇت تورايعىروۆتىڭ «قامار سۇلۋ» رومانىنىڭ تۇرىك تىلىنە اۋدارىلعان نۇسقالارى تانىستىرىلدى.
ۇلتتىق كىتاپحانانىڭ ديرەكتورى جانات سەيدۋمانوۆ تۇساۋكەسەر راسىمىنە كەلىپ وتىرعان قوناقتارعا قازاق-تۇرىك ىنتىماقتاستىعى اياسىندا جاسالىپ جاتقان يگى ىستەر بارىسىنا توقتالدى. كورنەكتى قازاق قالامگەرلەرى كىتاپتارىنىڭ تۇرىك تىلىنە جانە تۇرىك جازۋشىلارىنىڭ شىعارمالارى قازاق تىلىنە اۋدارىلىپ, جارىق كورۋى باۋىرلاس حالىقتار اراسىنداعى رۋحاني قازىنانىڭ قورى تولىعىپ جاتقاندىعى, دەپ اتاپ ءوتتى.
ءىس-شارانىڭ ارى قاراي جۇرگىزگەن ناعاشىبەك قاپالبەك ۇلى ءسوز كەزەگىن انكارا قالاسىنداعى كەچيورەن اۋدانىنىڭ اكىمى مۋستافا اك مىرزاعا ۇسىندى. مادەني بايلانىستارىنىڭ ءتۇپ-تامىرى تەرەڭدە جاتقان ەكى مەملەكەت بۇگىندە وسى ءورىستى ىنتىماقتاستىقتىڭ اياسىن جىلدان-جىلعا كەڭەيتىپ كەلەدى, دەپ اتاپ ءوتتى. ءسۇيىنباي اقىننىڭ 200 جىلدىعىنا وراي ءسۇيىنباي ەسكەرتكىشى ورناتىلىپ, كەچيورەن اۋدانىنىڭ ءبىر كوشەسىنە قازاقتىڭ ۇلى اقىنى جامبىل جاباەۆتىڭ اتى بەرىلگەنى وسى مادەني بايلانىستاردىڭ جالعاسىنداي. ەندىگى كەزەكتە ىنتىماق اياسى كىتاپ ءىسى سالاسىندا وركەندەۋدە. ونىڭ دالەلى رەتىندە تانىستىرىلىمى ءوتىپ وتىرعان قازاق كلاسسيكتەرىنىڭ ەڭبەكتەرىن اتاپ وتۋگە بولادى.
ودان كەيىن ءسوز العان الماتى قالاسىنداعى تۇركيانىڭ باس كونسۋلى رىزا قاعان يىلماز زيالى قاۋىمعا ىستىق ىقىلاسىن ءبىلدىرىپ, قازاق قالامگەرلەرىنىڭ كىتاپتارىن تۇرىك تىلىنە اۋدارۋعا قولداۋ بىلدىرگەن كەچيورەن اۋدانى ەكەندىگىن اتاپ ءوتىپ, العىسىن ءبىلدىردى.
ال ءوز كەزەگىندە الماتى وبلىسى جامبىل اۋدانىنىڭ اكىمى باعدات اليەۆ وسى ىسكە باستاماشى بولىپ, باسى-قاسىندا ءجۇرىپ يگى ناتيجەلەرگە بىرلەسە قول جەتكىزگەن ازاماتتارعا العىس ءبىلدىرىپ, ەرتەڭگى كۇنى جامبىل اۋدانىندا كەچيورين كوشەسىنىڭ اشىلۋ سالتاناتى وتەتىنىنە جانە كوپشىلىك وسى يگى شاراعا قۇرمەتتى قوناق بولۋعا شاقىردى.
اتالعان جوبالاردى جۇزەگە اسىرۋعا مۇددەلى تەدا جوباسى اياسىندا سونىمەن قاتار تۇرىك جازۋشىلارىنىڭ دا ەڭبەكتەرى قازاق تىلىنە اۋدارىلعان. تەدا جوباسىنىڭ جەتەكشىسى باسپاگەر شايزادا مۇحامەدجانوۆا بيىلعى جىلى قازاق تىلىنە اۋدارىلعان تۇرىك قالامگەرلەرى كىتاپتارىنىڭ العاشقى نۇسقاسىمەن تانىستىرىپ, باسپاحانالارمەن كەلىسىمدەر ءجۇرىپ جاتقاندىعىن جەتكىزدى.
وسى يگى شاراعا پروفەسسور دانداي ىسقاق, جازۋشى بەرىك شاحانوۆ, اقىن امانحان ءالىم, جازۋشى-دراماتۋرگ احمەتجان اشيري, بەلگىلى مادەنيەت قايراتكەرلەرى, باق وكىلدەرى جانە ت.ب. قاتىستى.
شارا اياسىندا ۇلتتىق كىتاپحانانىڭ قورىنان «قازاقستان-تۇركيا: رۋحاني جاڭعىرۋدىڭ جاڭا باعىتىندا» كىتاپ كورمەسى ۇيىمداستىرىلدى. كورمەگە قازاقستان مەن تۇركيانىڭ دوستىعى, تاريحي-مادەني بايلانىستارى, قازاق-تۇرىك اقىن- جازۋشىلارىنىڭ كىتاپتارى قويىلدى.
ەلۆيرا سەرىكقىزى,
«ەگەمەن قازاقستان»
الماتى