«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە اتىراۋ قالاسىنداعى اعىلشىن ءتىلىن تەرەڭدەتىپ وقىتاتىن تەحنيكالىق گيمنازيادان فوتورەپورتاج بەرىلىپ وتىر.تاۋەلسىزدىك شامشىراعى
بۇل گيمنازيانىڭ ءوز شاكىرتتەرىنە ەسىگىن ايقارا اشىپ, ساپالى ءبىلىم بەرە باستاعانىنا 20 جىل تولدى. ياعني, 1991 جىلعى 23 قاڭتاردا اتىراۋ قالالىق كەڭەسى اعىلشىن ءتىلىن تەرەڭدەتىپ وقىتاتىن تەحنيكالىق مەكتەپ اشۋ جونىندە شەشىم شىعارعان ەدى. سودان بەرى مۇندا ءبىرىنشى سىنىپتان باستاپ اعىلشىن ءتىلى تەرەڭدەتىلە وقىتىلادى. ياعني, وزگە پاندەرگە قاراعاندا, اعىلشىن ءتىلى ءپانىنىڭ ساعاتى كوپ. ماتەماتيكا ءپانى دە سولاي. تاۋەلسىزدىك تاڭىمەن جاس ۇرپاققا ءبىلىم ءنارىن سەپكەن ءبىلىم ۇياسىنا العاشىندا عالىمجان سۇيىنباەۆ ديرەكتورلىققا تاڭدالدى. قالاداعى كالينين اتىنداعى مەكتەپتە فيزيكا پانىنەن ءدارىس بەرگەن ول جاڭا تۇرپاتتاعى ءبىلىم ۇياسىنىڭ ىرگەسىن قالاۋمەن بىرگە ەڭ تاجىريبەلى مۇعالىمدەر شوعىرىن قالىپتاستىردى. بىلىكتى ۇستازدىعىمەن ءارى ىسكەر ۇيىمداستىرۋشىلىعىمەن تانىلعان عالىمجان سۇيىنباەۆتىڭ ءتيىستى ورىندارعا ايتقان ۇسىنىسى نەگىزىندە وبلىس اكىمىنىڭ 1996 جىلعى 19 ماۋسىمداعى شەشىمىمەن بۇل ءبىلىم ۇياسىنا تەحنيكالىق گيمنازيا مارتەبەسى بەرىلدى. تاۋەلسىز ەلدىڭ ءبىلىم بەرۋ سالاسىنداعى شامشىراعى سانالاتىن گيمنازيانى ءار جىلدارى روللانا ەسەنعۇلوۆا, سوفيا الىباەۆا, ايمان ەسمۇحانوۆا سىندى بالا جانىنا باعبان بولا بىلگەن ۇستازدار باسقاردى. بۇگىنگى ديرەكتورى سوفيا الىباەۆانىڭ ايتۋىنشا, گيمنازيادا 98 ۇستاز شاكىرتتەر جۇرەگىنە جول تاۋىپ, ساپالى ءبىلىم مەن سانالى تاربيە بەرۋگە ماشىقتانعان. ولاردىڭ اراسىندا جوعارى ساناتتى يەلەنگەن 36, ال ءبىرىنشى ساناتتى 29 مۇعالىم بار. ءتورت ۇستاز قر ءبىلىم بەرۋ ءىسىنىڭ ۇزدىگى, سونداي-اق ەكى مۇعالىم ءبىلىم بەرۋ ءىسىنىڭ قۇرمەتتى قىزمەتكەرى بەلگىسىن العان. قازاق ءتىلى مەن ادەبيەتى ءپانىنىڭ جوعارى ساناتتى مۇعالىمى گۇلسىم وحينا «ەرەن ەڭبەگى ءۇشىن» مەدالىمەن ماراپاتتالعان. سونىمەن بىرگە, گيمنازيا ۇستازدارى اراسىندا ى. التىنسارين توسبەلگىسىنىڭ يەگەرلەرى دە بار. – بىزدەگى نەگىزگى باسىمدىق اعىلشىن ءتىلى مەن ماتەماتيكا پاندەرىنە بەرىلەدى. مۇنىڭ باستى سەبەبى – مۇنايلى ءوڭىردى شەت ءتىلىن جەتىك بىلەتىن كادرلارمەن قامتاماسىز ەتۋدىڭ باستاپقى قادامدارىنا جول اشۋ, – دەيدى ديرەكتور سوفيا الىباەۆا. – ءارينە, گيمنازيادا وزگە پاندەر دە ءتيىستى باعدارلاماعا سايكەس وقىتىلادى. شەت ءتىلىن باستاۋىش سىنىپتان وقىتا باستاۋدىڭ جەمىسىن الدىمەن شاكىرتتەرىمىز كورىپ ءجۇر. شاكىرت دەمەكشى, گيمنازيانىڭ بىلىكتى ۇستازدارىنان ءتالىمدى ءدارىس العان وقۋشىلار قالالىق, وبلىستىق بايقاۋلاردا قاتارلاستارىنان ۇنەمى وق بويى وزىپ جۇرەدى. رەسپۋبليكالىق, حالىقارالىق بايقاۋلاردان دا جۇلدەمەن ورالعاندارى كوپ. ءويتكەنى, بۇل گيمنازيانىڭ ۇستامدى ۇستازدارى جاڭا تەحنولوگيالاردى جەتىك مەڭگەرگەن, ءارى ىزدەنگىش, شەتەلدە دە ءبىلىمىن جەتىلدىرەدى. وزىق ويلى ءشاكىرتتەرى ۇزدىك وقيدى. عىلىمي جوبالارعا كوپتەپ قاتىسادى. گيمنازيا وقۋشىلارى ۇبت قورىتىندىسىندا دا ۇدايى جوعارى ۇپاي الىپ, وزگە مەكتەپ بىتىرۋشىلەردەن الدا كەلەدى. ماسەلەن, گيمنازيانىڭ 2004 جىلعى تۇلەكتەرىنىڭ ورتاشا بالى – 71 بولسا, 2009 جىلى 102 بالعا, 2010 جىلى 105 بالعا يە بولدى. ال بيىلعى, ياعني گيمنازيانى 2011 جىلى بىتىرگەن وقۋشىلار ۇبت-دا 107,5 بالل جينادى. گيمنازيانى بىتىرۋشىلەر اراسىندا جىل سايىن «التىن بەلگىگە» يە بولاتىندار كوپ. «ۇزدىك اتتەستات» الۋشىلاردى ايتپاعاندا, 2004 جىلدان بەرى بۇل گيمنازيانى بىتىرگەن 43 تۇلەك «التىن بەلگى» يەگەرى اتاندى. تەك 2011 جىلعى تۇلەكتەر اراسىنان 12 وقۋشى گيمنازيانى «التىن بەلگىمەن» ءبىتىردى. بۇل – وڭىردەگى مەكتەپ اراسىنداعى ەڭ جوعارى كورسەتكىش. گيمنازيانى ۇزدىك بىتىرگەندەر ءبىلىم گرانتتارىمەن ەلىمىزدىڭ تاڭداۋلى جوعارى وقۋ ورىندارىندا ءبىلىم الۋدا. سونداي ۇزدىك شاكىرتتىڭ ءبىرى التىناي كەنجينا نازارباەۆ ۋنيۆەرسيتەتىندە وقيدى. حالىقارالىق «بولاشاق» باعدارلاماسىنىڭ گرانتىن يەلەنگەن ءاليا ەربولەكوۆا ۇلىبريتانيانىڭ, ال اينۇر ەرجانوۆا كانادانىڭ ەڭ تاڭداۋلى ءبىلىم وردالارىندا وقىپ ءجۇر. گيمنازيانى «التىن بەلگىمەن» ءبىتىرىپ, «بولاشاقتىڭ» گرانتىنا يە بولعان دينارا قالەنوۆا ۇلىبريتانيادان ماگيستر اتانىپ كەلدى. قازىر ادجيپ قكو كومپانياسىندا اقپاراتتىق تەحنولوگيالار بولىمىندە جۇمىس جاسايدى. – ءبىزدىڭ شاكىرتتەرگە تەرەڭ ءبىلىم, ءتالىمدى تاربيە بەرۋدە ۇستاناتىن باستى قاعيدامىز – قازاقستاننىڭ وتانسۇيگىش, كوشباسشى جاستارىن تاربيەلەۋ. سەبەبى, تاۋەلسىز ەلىمىزدى الەمگە تانىتاتىن دا, وركەندەي بەرۋىنە ۇلەس قوساتىن دا باسەكەگە قابىلەتتى, ءبىلىمدى جاستارى عوي. ال ءبىز ءتۇلەكتەرىمىزدىڭ بۇگىنگى ءداۋىر جاستارىنىڭ اراسىندا وزىق بىلىمىمەن, كوشباسشىلىق قابىلەتىمەن تانىلۋىنا ىقپال ەتەمىز – دەيدى اتىراۋداعى اعىلشىن ءتىلىن تەرەڭدەتىپ وقىتاتىن گيمنازيا ديرەكتورى س.الىباەۆا. ________________________________________ ارنايى بەتتى دايىنداعان «ەگەمەن قازاقستان» گازەتىنىڭ اتىراۋ وبلىسى بويىنشا مەنشىكتى ءتىلشىسى جولداسبەك شوپەعۇل.