جاڭا وقۋ جىلى قارساڭىندا «ورلەۋ» باۇو» اق فيليالى الماتى قالاسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى مەن «نۇر وتان» پارتياسىنىڭ اۋەزوۆ اۋداندىق فيليالى بىرلەسىپ «باقىتتى وتباسى – باقىتتى بالالىق شاق» پارتيالىق جوباسى اياسىندا «مەكتەپكە جول» اتتى ءداستۇرلى قايىرىمدىلىق ءىس-شاراسىن وتكىزدى.
«ورلەۋ» باۇو» اق فيليالى الماتى قالاسى بويىنشا پقباي ديرەكتورى, پ.ع.د. رايسا سادۆاكاسوۆا قايىرىمدىلىق ءىس-شاراسىنا قاتىسۋشىلاردى جاڭا وقۋ جىلىمەن قۇتتىقتاپ, ىزگى تىلەگىن ءبىلدىردى. ەلىمىزدە جەتكىنشەكتەردىڭ ساپالى ءبىلىم, سانالى تاربيە الۋى ءۇشىن بارلىق جاعداي جاسالعاندىعىن اتاپ ءوتتى. «سىزدەر – تاۋەلسىز ەلىمىزدىڭ بولاشاعىسىزدار, سوندىقتان دا سىزدەرگە ۇلكەن جاۋاپكەرشىلىك جۇكتەلەدى. سول مىندەتتى ابىرويمەن ورىنداپ, قازاقستاننىڭ ايبىنىن اسقاقتاتاتىن ازاماتى بولۋ ءۇشىن ءبىرىنشى كەزەكتە جاقسى وقىڭىزدار», – دەدى ر.سادۆاكاسوۆا.
ءسوز كەزەگىندە «نۇر وتان» پارتياسى اۋەزوۆ اۋداندىق فيليالى توراعاسىنىڭ ءبىرىنشى ورىنباسارى نايليا ورداباەۆا جيىنعا قاتىسۋشىلاردى باستالۋىنا بىرنەشە كۇن قالعان جاڭا وقۋ جىلىمەن قۇتتىقتاپ, اۋەزوۆ اۋدانى مەكتەپتەرىنەن كەلگەن 12 وقۋشىعا ريۋكزاكتار مەن مەكتەپكە قاجەتتى كەرەك-جاراقتارىن تابىستادى. ول ءوسىپ كەلە جاتقان ۇرپاققا جان-جاقتى كومەك كورسەتۋ جانە قولداۋ – «نۇر وتان» پارتياسىنىڭ ەڭ باستى مىندەتتەرىنىڭ ءبىرى ەكەنىن اتاپ ءوتتى.
«ورلەۋ» باۇو» اق فيليالى الماتى قالاسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى مەن «نۇر وتان» پارتياسىنىڭ اۋەزوۆ اۋداندىق فيليالى بىرلەسىپ وتكىزگەن قايرىمدىلىق ءىس-شاراسى تاۋەلسىز قازاقستاننىڭ بولاشاق ۇرپاعىنا پاتريوتتىق تاربيە بەرۋگە باعىتتالعان.
ەلۆيرا سەرىكقىزى,
«ەگەمەن قازاقستان»
الماتى