استانادا قازاقستان سىرتقى ساۋدا پالاتاسىنىڭ باسقارما توراعاسى ايان ەرەنوۆ قىتاي حالىقارالىق ساۋدا پالاتاسى باس وكىلىنىڭ ورىنباسارى گاو تسيمەن كەزدەستى, دەپ حابارلايدى پالاتانىڭ ءباسپاسوز قىزمەتى.
تاراپتار ۇزاق مەرزىمدى ىنتىماقتاستىقتىڭ باعىتتارى مەن پەرسپەكتيۆالارىن, قىتاي حالىق رەسپۋبليكاسى مەن قازاقستان اراسىنداعى قازىرگى ساۋدا بايلانىستارىن نىعايتۋ ماسەلەلەرىن تالقىلادى. كەزدەسۋ قورىتىندىسىندا ىنتىماقتاستىق تۋرالى كەلىسىم مەن تاجىريبە الماسۋ تۋرالى ۋاعدالاستىققا قول جەتكىزىلدى.
قىتاي حالىقارالىق ساۋدا پالاتاسى 1988 جىلى قحر مەملەكەتتىك كەڭەسىنىڭ ماقۇلداۋىمەن قۇرىلعان, ول بۇكىلقىتاي ساۋدا پالاتاسى بولىپ تابىلادى. ونىڭ قۇرامىنا قىتايدا حالىقارالىق كوممەرتسيا قىزمەتىمەن اينالىساتىن كاسىپورىندار, بىرلەستىكتەر جانە باسقا ۇيىمدار كىرەدى. قازىرگى كەزدە پالاتاعا 150 مىڭنان استام جەكەمەنشىك جانە مەملەكەتتىك كاسىپورىندار مۇشە بولىپ وتىر.
قىتاي حالىقارالىق ساۋدا پالاتاسىنىڭ قازاقستان رەسپۋبليكاسىنداعى وكىلدىگى ۇستىمىزدەگى جىلدىڭ ناۋرىزىندا اشىلعان بولاتىن. 2005 جىلدان 2017 جىلعا دەيىنگى ارالىقتا قازاقستانعا قحر-دان كەلگەن جالپى ينۆەستيتسيالار اعىنى 14,9 ملرد اقش دوللارىن, كەرى باعىتتاعى ينۆەستيتسيالار 487,4 ملن دوللاردى قۇرادى. قازاقستاندا قحر-دىڭ قاتىسۋىمەن 3 مىڭداي زاڭدى تۇلعا تىركەلگەن, سونىڭ 1200-دەن استامى قىزمەت جۇرگىزىپ كەلەدى. 2017 جىلدىڭ قورىتىندىلارىنا وراي قازاقستاننىڭ قىتايمەن سىرتقى ساۋداسى 32,6% ءوسىپ, 10 ملرد دوللاردان اسىپ جىعىلعان. قازاقستاننان 5,77 ملرد اقش دوللارىنىڭ تاۋارلارى مەن قىزمەتتەرى ەكسپورتتالدى, بۇل 2016 جىلمەن سالىستىرعاندا 36,6% ارتىق.