كەشە استاناداعى ۋچاسكەلىك جانە اۋداندىق سايلاۋ كوميسسيالارىنىڭ, سونداي-اق قالالىق, اۋداندىق اكىمدىكتەر وكىلدەرىنىڭ قاتىسۋىمەن سەمينار-كەڭەس بولىپ ءوتتى.
جيىندا پارلامەنت ءماجىلىسى دەپۋتاتتارىنىڭ كەزەكتەن تىس جانە ءماسليحاتتار دەپۋتاتتارىنىڭ كەزەكتى سايلاۋىن ازىرلەۋ مەن وتكىزۋ تۋرالى اڭگىمە قوزعالدى. استانا قالالىق سايلاۋ كوميسسياسىنىڭ توراعاسى مۇحتار ەركەتاەۆتىڭ سەمينار-كەڭەستە ءمالىم ەتكەنىندەي, مەديتسينالىق مەكەمەلەر مەن ستاتسيونارلاردا, اسكەري بولىمشەلەردە, الەۋمەتتىك مەديتسينالىق ۇجىمداردا 31 سايلاۋ ۋچاسكەسى قۇرىلعان. سايلاۋ ۇدەرىستەرى كەزىندە استانادا ءۇش اۋداندىق سايلاۋ كوميسسياسى, جيىرما بەس ايماقتىق جانە 233 ۋچاسكەلىك سايلاۋ كوميسسياسى جۇمىس ىستەيدى. ال سايلاۋ ۇدەرىسىنە ەكى مىڭعا جۋىق سايلاۋ كوميسسياسىنىڭ مۇشەلەرى تارتىلادى.
سەمينار-كەڭەستە, سونداي-اق سايلاۋ كوميسسياسى مۇشەلەرىنىڭ بىلىكتىلىك دەڭگەيىن ارتتىرۋ, ۋچاسكەلىك سايلاۋ كوميسسياسى مۇشەلەرىنىڭ جالپى جاۋاپكەرشىلىگى ءجونىندە اڭگىمە قوزعالدى. استانا قالالىق سايلاۋ كوميسسياسى ءتوراعاسىنىڭ ايتۋىنشا, ەلورداداعى ۋچاسكەلىك سايلاۋ كوميسسيالارى سايلاۋ ناۋقانىنا دايىن.
ءاليسۇلتان قۇلانباي.