ءبىلىم بەرۋ سالاسى قىزمەتكەرلەرىنىڭ ءداستۇرلى تامىز كەڭەسىندە ايماقتىڭ ۇزدىك مۇعالىمدەرى ماراپاتتالىپ, ۇزدىك مەكتەبى انىقتالدى. وقۋ جىلىنىڭ قورىتىندىسى بويىنشا «مۇراگەر» مەكتەبى ۇزدىك دەپ تانىلىپ, مەكتەپ باسشىسىنا 17 ميلليوننىڭ سەرتيفيكاتى تابىستالدى.
بۇگىن قىزىلوردادا ء«تورتىنشى ونەركاسىپتىك رەۆوليۋتسيا جاعدايىنداعى ادامي كاپيتال» تاقىرىبىندا پەداگوگيكالىق تامىز كەڭەسى ءوتتى.
شاراعا وبلىس اكىمى قىرىمبەك كوشەرباەۆ, قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ, «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭباسقارما ءتورايىمى كۇلاش شامشيدينوۆا, ءبىلىم جانە عىلىم مينيسترلىگى جانىنداعى اقپاراتتىق تالداۋ ورتالىعى پرەزيدەنتىنىڭ مىندەتىن اتقارۋشى ەلدوس نۇرلانوۆ, جەرگىلىكتى ءبىلىم بەرۋ ۇيىمدارىنىڭ قىزمەتكەرلەرى مەن وبلىس مۇعالىمدەرى قاتىستى. قىزىلوردا وبلىسى ءبىلىم باسقارماسىنىڭ باسشىسى مايرا مەلدەبەكوۆا مودەراتور بولدى.
كەزدەسۋدە وبلىس اكىمى قىرىمبەك كوشەرباەۆ زاماناۋي ءبىلىم بەرۋ جۇيەسىندەگى ماڭىزدى ماسەلەلەر مەن پروبلەمالاردى اتاپ ءوتتى.
«جاڭعىرىپ جەتىلۋدىڭ مۇلدە جاڭا, مازمۇندىق جانە ساپالىق تۇرعىدان بۇرىنعىدان بولەك, الدەقايدا بيىك ساتىسىنا كوتەرىلۋگە ۇمتىلعان ەلىمىزگە جاسامپاز, بىلىكتى, وزگەرىستەردەن قورىقپايتىن ماماندار قاجەت. بۇل ەلباسىنىڭ تۇجىرىمى, ناقتى تاپسىرماسى, ءبىلىم سالاسىن ۇيىمداستىرۋشى ءسىز بەن بىزگە اماناتى! ادامي كاپيتال, ەڭ الدىمەن, ءبىلىم بەرۋ سالاسى ارقىلى قالىپتاسادى. ونى قالىپتاستىرۋداعى ءبىلىم سالاسىنىڭ ۇلەسى كەز-كەلگەن باسقا سالادان الدەقايدا جوعارى. سوندىقتان دا, بۇل سالانى الەۋمەتتىك قامسىزداندىرۋ, زەينەتاقى جۇيەسى, مەملەكەتتىك باسقارۋ, قورعانىس جانە قاۋىپسىزدىك سياقتى شىعىندى كوپ تالاپ ەتەتىن سالالارمەن ءبىر قاتارعا قويماي, كەرىسىنشە, مول قوسىمشا قۇن قالىپتاستىراتىن ينۆەستيتسيالىق سالا رەتىندە قاراۋ قاجەت. ءبىلىم بەرۋگە ينۆەستيتسيا تارتۋ جەكەلەي ادام مەن تۇتاس مەملەكەت ءۇشىن دە وڭتايلى شەشىم بولىپ تابىلادى», - دەدى ايماق باسشىسى.
سونىمەن قاتار, ايماق باسشىسى ءبىلىم الۋشىلاردىڭ ماماندىقتارى مەن ەڭبەك نارىعى سۇرانىسىنىڭ سايكەس كەلۋى ماڭىزدىلىعىن ايتتى.
«وسى رەتتە, ءبىزدىڭ ۇدايى نازاردا ۇستايتىن ەرەكشە ماڭىزدى كورسەتكىشىمىز – تۇلەكتەرىمىزدىڭ جۇمىسپەن قامتىلۋى.مويىنداۋ قاجەت, بىزدە بۇل ماسەلەدە كەلەڭسىزدىكتەر از ەمەس. تۇلەكتەردى ءبىر ماماندىق بويىنشا دايارلايمىز, ال ولار مۇلدە باسقا سالادان ورىن تابادى. ولاردىڭ قابىلەتى مەن نارىقتاعى جاعدايدى ەسكەرە وتىرىپ, تۇلەكتەردى دۇرىس باعىتتاۋ – ءبىزدىڭ مىندەتىمىز», - دەدى ايماق باسشىسى.
ايماقتا ءبىلىم بەرۋ سالاسىنىڭ مەكتەپكە دەيىنگى كەزەڭىنەن باستاپ جوعارىعا دەيىن جۇيەلى جۇمىستار جۇرگىزىلىپ جاتقانىن ايتا كەتۋ كەرەك. وسىعان وراي, وبلىستا مەكتەپكە دەيىنگى قامتىلۋ دەڭگەيى ءجۇز پايىزدى قۇراپ, ءۇش اۋىسىمدا وقيتىن مەكتەپتەر جويىلعان. ءبىر عانا جالاعاش اۋدانى م.شامەنوۆ اۋىلىنداعى №34 ورتا مەكتەبىنەن باسقا, اپاتتىق جاعدايداعى مەكتەپتەر جوق. سوڭعى 5 جىلدا وڭىردە 37 اپاتتىق مەكتەپتىڭ ورنىنا 45 مەكتەپ سالىنعان.
2014 جىلدان باستاپ ماسكەۋ مەن سانكت-پەتەربۋرگتىڭ وزىق وقۋ ورىندارىنا 452 قىزىلوردالىق ستۋدەنت رەسەي فەدەراتسياسى ۇكىمەتىنىڭ گرانتى ەسەبىنەن ءبىلىم الۋدا. بيىل العاشقى 65 تۇلەكتىڭ جۇمىسپەن قامتۋ ماسەلەسى شەشىمىن تاپتى. سونىمەن بىرگە, سىربويىلىق جاستارعا مامانداندىرىلعان «كيبەرقاۋىپسىزدىك» جانە «پروتسەستەردى ماتەماتيكالىق مودەلدەۋ» سالاسىندا م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە جىل سايىن 20 گرانت بولىنەدى.بۇدان باسقا, ەۋرازيالىق ەكونوميكالىق قوعامداستىقتىڭ پارلامەنتارالىق اسسامبلەياسى اياسىنداعى جوعارى وقۋ ورىندارىمەن ىنتىماقتاستىق تۋرالى مەموراندۋمعا قول قويىلدى. جوعارى وقۋ ورىندارىنا ءتۇسۋ ەمتيحاندارىن ۇزدىك تاپسىرعان قىزىلوردا وبلىسى مەكتەپتەرىنىڭ تۇلەكتەرىنە جىل سايىن سانكت-پەتەربۋرگتا وقۋعا 10 ءبىلىم گرانتىن بولەتىن بولدى. اقپاراتتاندىرۋ مەن تەحنولوگيالاردى ەنگىزۋ بويىنشا تاتارستان رەسپۋبليكاسىنداعى يننوپوليس ۋنيۆەرسيتەتىندە اقپاراتتىق جانە ساندىق تەحنولوگيالار بويىنشا جىل سايىن تاعى 20 تۇلەكتىڭ ءبىلىم الۋىنا تاتارستان پرەزيدەنتىمەن كەلىسىم جاسالعان.
سونىمەن قاتار, ۇبت تاپسىرىپ مەملەكەتتىك گرانتتى الۋعا بىرنەشە بالل جەتپەي قالعان اۋىل مەكتەپتەرىنىڭ تۇلەكتەرىنە ايماققا قاجەتتى ماماندىقتار ءۇشىن وبلىس اكىمىنىڭ گرانتى بولىنەدى.
«2013 جىلدان باستاپ, جىل سايىن 100 دارىندى ءارى تالاپتى اۋىل بالالارى, ونىڭ ىشىندە, از قامتىلعان جانە كوپ بالالى وتباسىنان شىققان جاستاردى ەلىمىزدىڭ بەلدى جوعارعى وقۋ ورنىنا وبلىس اكىمىنىڭ گرانتىمەن وقۋعا جولداۋدامىز. بيىلعى جىلى وقۋ گرانتىنىڭ سانىن 100-دەن 205-كە دەيىن, ياعني 2 ەسەگە ۇلعايتتىق. وسىلايشا, بۇگىنگى تاڭدا گرانت يەگەرلەرىنىڭ سانى 900 ادامعا جەتتى. بيىلعى ۇلتتىق بىرىڭعاي تەستىلەۋدىڭ قورىتىندىسى بويىنشا وبلىس تۇلەكتەرىنىڭ ورتاشا كورسەتكىشى 85,2 بالدى قۇرادى. بۇل بىلتىرمەن سالىستىرعاندا 2,42 بالعا جوعارى. بىلتىرعى جىلدىڭ قورىتىندىسى بويىنشا تۇلەكتەردىڭ 97 پايىزى جوعارى جانە ورتا ارناۋلى وقۋ ورىندارىنا وقۋعا تۇسكەنىنىن ماقتانىشپەن اتاپ وتۋگە بولادى. بيىلعى جىلعى ناتيجە دە جاقسى بولادى دەپ ۇمىتتەنەمىز»,- دەدى ايماق باسشىسى.
جيىندا ارىن ورساريەۆ, كۇلاش شامشيدينوۆا, ەلدوس نۇرلانوۆ, مايرا مەلدەبەكوۆا جانە قىزىلوردا وبلىسى كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ بايانداما جاسادى.
كەزدەسۋگە قاتىسۋشىلار ءبىلىم بەرۋ جۇيەسىن جاڭعىرتۋ بويىنشا ۇسىنىستارىن ءبىلدىردى جانە قىزىلوردا وبلىسىنداعى ءبىلىم بەرۋدىڭ بارلىق كەزەڭدەرى قارقىندى دامىپ جاتقانىن اتاپ ءوتتى. شارادا رەسەي ۋنيۆەرسيتەتىنىڭ تۇلەكتەرى مەن اتا-انالارى ءسوز سويلەدى.
بىرقاتار وقىتۋشىلار «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىنە يە بولدى, «ىبىراي التىنسارين» مەدالىمەن, سونداي-اق وبلىس اكىمىنىڭ قۇرمەت گراموتالارى جانە العىس حاتتارىمەن ماراپاتتالدى. سونىمەن قاتار, «مۇراگەر» مەكتەبىنە «ۇزدىك ورتا ءبىلىم ۇيىمى» نوميناتسياسى بويىنشا 17 ميلليون تەڭگە تابىستالدى.
2018-2019 وقۋ جىلىندا وبلىستىڭ 294 جالپى ءبىلىم بەرەتىن مەكتەبىندە 154 559 وقۋشىنى وقىتۋ جوسپارلانىپ وتىر. 18 942 بالا ءبىرىنشى سىنىپقا بارادى.
جاڭا وقۋ جىلىندا قازالى جانە جاڭاقورعان اۋداندارىندا 300 ورىنعا ارنالعان جاڭا مەكتەپتەر پايدالانۋعا بەرىلدى. 2017-2018 وقۋ جىلىندا وبلىستا قارماقشى جانە جاڭاقورعان اۋداندارىندا 3 مەكتەپ جۇمىسىن باستاعان بولاتىن. بۇدان باسقا, جىلدىڭ سوڭىنا دەيىن ارالدا 300 ورىنعا جانە قىزىلوردادا 600 ورىنعا ارنالعان مەكتەپتەر سالىنادى.