استاناعا تۇرىك رەسپۋبليكاسى جاندارمەرياسىنىڭ باس قولباسشىسى, ارميا گەنەرالى اريف چەتيننىڭ باسشىلىعىمەن ارنايى دەلەگاتسيا رەسمي ساپارمەن كەلدى. ءۇش كۇنگە سوزىلعان ساپار اياسىندا قازاقستان مەن تۇركيا اراسىنداعى سالالىق ۆەدومستۆولاردىڭ ءوزارا ىنتىماقتاستىعىن تەرەڭدەتۋ جايى تالقىلاندى.
ال دەلەگاتسيا قۇرامىندا تۇركيانىڭ قازاقستانداعى ەلشىلىگىندەگى اسكەري اتتاشەسى, پولكوۆنيك جيۋنەيت گيۋمەن, تۇرىك رەسپۋبليكاسى جاندارمەرياسىنىڭ بايلانىس جانە اقپاراتتىق جۇيەلەر باسقارماسىنىڭ باستىعى گەنەرال-مايور ەنگين چىراقوعلى مەن ازيا ايماعى بويىنشا ارىپتەستىك جونىندەگى ءبولىم باسشىسى مايور جەنگيز يىلماز دا بولدى.
ارىپتەستىك كەزدەسۋدىڭ العاشقى كۇنىندە اسكەري قوناقتار قازاقستان رەسپۋبليكاسى ۇلتتىق ۇلانىنىڭ باس قولباسشىلىعىندا بولىپ, قۇقىقتىق اسكەردىڭ قۇرىلۋ تاريحىمەن, ونىڭ ماقسات-مىندەتى جانە قۇرىلىمدىق ەرەكشەلىگىمەن تانىستى.
سونداي-اق دەلەگاتسيا باسشىسى ارميا گەنەرالى اريف چەتيننىڭ قازاقستان رەسپۋبليكاسى ۇلتتىق ۇلانىنىڭ باس قولباسشىسى گەنەرال-لەيتەنانت رۋسلان جاقسىلىقوۆپەن كەزدەسۋى بارىسىندا تۇركيانىڭ اسكەري-وقۋ ورىندارىندا مامان دايارلاۋ باعىتى مەن ءبىلىم بەرۋ ىسىندەگى ارىپتەستىكتى دامىتۋدىڭ جاي-كۇيى تالقىلاندى. سونىمەن قاتار وسى جىلدىڭ شىلدە ايىندا قازاقستاندىق دەلەگاتسيانىڭ ىستانبۇلدا وتكەن ساپارىندا كەلىسىلگەن بىرقاتار جەتىستىكتەر لەگىن ودان ءارى جالعاستىرۋ جونىندە اڭگىمە ءوربىدى.
ەستەرىڭىزگە سالا كەتەر بولساق, اتالعان ساپار اياسىندا ەكىجاقتى ارىپتەستىك اياسىندا قازاقستان رەسپۋبليكاسى تاراپىنىڭ تۇركيانىڭ جاندارمەريا ۋچيليششەسىندە ءبىلىم الۋشى كۋرسانتتارىن جىل سايىن 8 ادامعا دەيىن كوبەيتۋ كەلىسىمى جاسالعان ەدى. وعان قوسا, تاراپتار تۇركيانىڭ اسكەري-وقۋ ورىندارىنان تۇلەپ شىققان قازاقستاندىق تۇلەكتەردىڭ ودان ءارى تۇرىك رەسپۋبليكاسىنىڭ اكادەمياسىندا جانە تۇركيا وقۋ ورىندارىنداعى ارنايى ماقساتتاعى بولىمشەلەردە اسكەري مامانداردى دايارلاۋ ءۇشىن (سۇرمەرگەندەر مەن جارىلعىش قارۋ ماماندارىن, سۋدا ءجۇزۋ ماماندارىن, ت.ب.) وقۋ كۋرستارىن ۇزارتۋ جونىندە كەلىسىم جاسالعان بولاتىن.
دەلەگاتسيا وكىلدەرىنىڭ رەسمي كەزدەسۋى سوڭىندا ارميا گەنەرالى اريف چەتين قازاقستان رەسپۋبليكاسى ۇلتتىق ۇلانى باس قولباسشىلىعى عيماراتىنىڭ اۋماعىندا «دوستىق اللەياسىن» اشىپ, وندا العاشقى اعاشتى وتىرعىزدى.
سودان كەيىنگى رەسمي ساپار تۇڭعىش پرەزيدەنت – ەلباسى اتىنداعى ۇلتتىق قورعانىس ۋنيۆەرسيتەتىندە جالعاستى. مۇندا قوناقتار ۋنيۆەرسيتەتتىڭ وقۋ-ادىستەمەلىك بازاسى مەن ماتەريالدىق الەۋەتىمەن تانىسىپ, مۋزەيدى ارالادى. سونىمەن قاتار يميتاتسيالىق مودەلدەۋ ورتالىعى مەن قازاقستان قارۋلى كۇشتەرى باس شتابى اكادەمياسى مەن ۇلتتىق ۇلاننىڭ بىلىكتىلىكتى ارتتىرۋ فاكۋلتەتىنىڭ جۇمىسىمەن تانىستى.
رەسمي ساپاردىڭ ەكىنشى كۇنىندە قازاقستان رەسپۋبليكاسىنىڭ ىشكى ىستەر ءمينيسترى گەنەرال-پولكوۆنيك قالمۇحانبەت قاسىموۆتىڭ اريف چەتينمەن كەزدەسۋى ءوتىپ, وندا ىنتىماقتاستىقتى تەرەڭدەتۋ مەن بەلسەندى جۇرگىزۋگە ىقىلاس تانىتىلدى. سونىمەن قاتار قۇقىق قورعاۋ سالاسىنداعى قارىم-قاتىناس دەڭگەيىنىڭ بولاشاقتاعى باعىت-باعدارى ناقتىلاندى.
ودان ءارى تۇركيالىق اسكەريلەر ارنايى جەدەل ماقساتتاعى استانالىق بريگادانىڭ ماتەريالدىق-تەحنيكالىق جاعدايىمەن, اسكەريلەردىڭ تۇرمىسىمەن تانىسىپ, اسكەري قارۋ-جاراق كورمەسىن تاماشالادى. دەلەگاتسيا وكىلدەرى ساپاردىڭ سوڭعى ءتۇيىنى رەتىندە ەلورداداعى مۇستافا كەمال اتاتۇرىك اتىنداعى ساياباققا بارىپ, ەسكەرتكىشكە گۇل شوقتارىن قويدى.
«ەگەمەن-اقپارات»