«رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ قولداۋىمەن «تۇلپار ءمىنىپ, تۋ العان» ۇلتتىق بايقاۋى نەگىزىندە «بالالارعا باتىرلار جىرىن جاتتاتۋدىڭ ءتيىمدى جولدارى مەن ەسكەرۋگە ءتيىس جاعدايلار» تاقىرىبىندا الماتىداعى ۇلتتىق كىتاپحانادا ۇستازدارعا ارنالعان كاسىبي باسقوسۋ ءوتتى.
باسقوسۋدىڭ باعدارلاماسىنا سايكەس جوبا جەتەكشىسى سەرىك سەيىتمان قاتىسۋشىلاردى كاسىبي وتىرىستىڭ بارىسىمەن تانىستىرىپ, ءسوز كەزەگىن جىرشى, فولكلورتانۋشى عالىم بەرىك جۇسىپكە ۇسىندى.
ءوز كەزەگىندە جىرشىلىق ونەردىڭ ماڭىزدىلىعىنا, ەپيكالىق شىعارمالاردىڭ بالا تاربيەسىندەگى ەرەكشەلىكتەرىنە توقتالعان بەرىك ءجۇسىپ تولىققاندى ەپيكالىق شىعارمانى ورىنداۋداعى عىلىمي نەگىزدەردى اتاپ ءوتتى. «بالانىڭ العاشقى ەپيكالىق ءبىلىمى اناسىنىڭ الديىنەن قالىپتاسادى» دەدى عالىم. «بەسىك جىرىنىڭ», «انا» ءسوزىنىڭ ماڭىزدىلىعىنا ەرەكشە توقتالىپ, اناعا دەگەن قۇرمەتتىڭ ۇلتتىق تاربيەنىڭ باستاۋى ەكەندىگىنە توقتالدى.
بالانىڭ رۋحاني تولىسىپ, ۇلتتىق رۋحتا وسۋىندە ەپيكالىق ورتا, ەپيكالىق جاد, ەپيكالىق ءبىلىم مەن ورىنداۋشىلىق ءبىر-ءبىرىن تولىقتىرۋى قاجەتتىگىنە دە ەرەكشە نازار اۋدارعان عالىم وكىنىشكە قاراي, قازىرگى كەزەڭدە وسىناۋ قۇندىلىقتاردى قاپەردەن تىس قالدىرعاندىعىمىزعا الاڭداۋشىلىعىن ءبىلدىردى. سوندىقتان دا مەكتەپ وقۋشىلارىنا باتىرلار جىرىن جاتتاتۋ ارقىلى ولاردىڭ ۇلتتىق جادىن قالىپتاستىرىپ قانا قويماي, ەپوستىق جىرلاردا كەزدەسەتىن بۇتىندەي ءبىر حالىقتىڭ تاريح-داستانىنان حاباردار ەتۋگە بولادى.
باتىرلار جىرىن جاتتاتقان كەزدە ۇلتقا كەرەك نارسەلەر, مىسالى ءبىر عانا «الپامىس» جىرىنىڭ ءون بويىندا بەسىك جىرى دا, اڭىزدىڭ جەلىسى دە, جار-جار, ماقال-ماتەل, ەرلىك-ەلدىك تە, ادامزات بالاسىنىڭ كىسىلىگى سياقتى تاعى دا باسقا ەرەكشە قاسيەتتەردىڭ شوعىرلانعاندىعىنا كوز جەتكىزە تۇسەمىز.
ال قورىتىندىسى اعىمداعى جىلدىڭ 28 قىركۇيەگىندە انىقتالاتىن «تۇلپار ءمىنىپ, تۋ العان» بايقاۋىنا «الپامىس باتىر» جىرى تاڭدالۋىنىڭ دا وزىندىك ءمان-ماعىناسى بار. بايقاۋ الماتى قالاسىندا ءبىلىم الاتىن 6-10-سىنىپ وقۋشىلارى اراسىندا وتەدى.
مەكتەپ وقۋشىلارىن كىتاپقا باۋلۋدى, باتىرلار جىرىن ناسيحاتتاۋدى, ۇلتتىق رۋحتا تاربيەلەۋمەن قاتار وسكەلەڭ ۇرپاقتىڭ شىعارماشىلىق جانە زياتكەرلىك قابىلەتىن دامىتۋدى ماقسات ەتەتىن بايقاۋدىڭ جۇلدە قورى ءبىرىنشى ورىنعا – 1 ملن 500 مىڭ, ەكىنشى ورىنعا – 1 ملن, ءۇشىنشى ورىنعا 500 مىڭ تەڭگە جانە ىنتالاندىرۋ سىيلىقتارىمەن ەرەكشەلەنەدى. ال جۇلدەگەر ءاربىر وقۋشىنىڭ تالىمگەرى ۇلىبريتانيانىڭ وكسفورد قالاسىنا بارىپ, ءتىل ءبىلىمىن جەتىلدىرۋ ورتالىعىندا اعىلشىن ءتىلىن مەڭگەرىپ قايتۋعا مۇمكىندىك الادى.
ەلۆيرا سەرىكقىزى,
«ەگەمەن قازاقستان»
الماتى