وڭتۇستىككە بىرنەشە كۇندىك جۇمىس ساپارىمەن كەلگەن ء“ادىلەت” دەموكراتيالىق پارتياسىنىڭ سەركەسى ماقسۇت نارىكباەۆ العاشقى كۇنى وبلىستىق فيليالدىڭ شتابىندا جۋرناليستەرمەن باسپاسوز ءماسليحاتىن وتكىزىپ, ءبىرتالاي وزەكتى ماسەلەلەرگە بايلانىستى ءوز بايلامىن جەتكىزدى.
وتانىمىز ۇلكەن ءمۇمكىندىكتەردىڭ الدىندا تۇر, ءبىزدىڭ ماقساتىمىز – كۇرمەۋلى ماسەلەلەردىڭ ءتۇيىنىن شەشۋگە قۇقىقتىق تۇرعىدان كومەكتەسىپ, ءادىل باعاسىن بەرۋ. كوپشىلىكتىڭ ساناسىنا ءادىلەتتىلىك دەگەن ۇعىمدى ءسىڭىرۋ. وسىلاي دەپ ءسوز ساپتاعان پارتيا ءتوراعاسى اشىق كۇندە نايزاعاي ويناتقان جاڭاوزەندەگى وقيعالارعا بايلانىستى ءوز پايىمداۋلارىن ءبىلدىردى.
– ءبىزدىڭ ماقساتىمىز, – دەدى ماقسۇت سۇلتان ۇلى, – ەلىمىزدىڭ ساياسي ومىرىنە ءماجىلىس جانە ءماسليحاتتار ارقىلى ارالاسۋ. سول ارقىلى ءادىل زاڭ ورنىقتىرۋعا ىقپال ەتۋ.
باسقوسۋدا قۇقىقتىق ماسەلەلەرگە كوبىرەك توقتالعان پارتيا سەركەسى رەسپۋبليكالىق, وبلىستىق, ءتىپتى اۋداندىق سايلاۋ ناۋقاندارىندا جەڭىس تويىن تويلاۋعا سەنىمدى ەكەندىگىن جاسىرعان جوق.
“ادىلەت” دەموكراتيالىق پارتياسى ماجىلىسكە وڭتۇستىكتەن تەحنيكا عىلىمدارىنىڭ دوكتورى, پروفەسسور قايرات يسلامقۇلوۆ پەن وبلىستىق ادۆوكاتتار كوللەگياسىنىڭ توراعاسى تالعات سەپاروۆتى ۇكىلەپ قوسپاق. جيىندا وسى ازاماتتارعا پارتيا اتىنان ماندات بەرىلدى.
ەرتەڭىندە ماقسۇت نارىكباەۆ پەن بۇرىنىراقتا پرەزيدەنتتىككە باعىن سىناپ كورگەن مۇساعالي دۋامبەكوۆ باستاعان ادىلەتتىكتەر قازىعۇرت اۋدانىندا بولىپ, ءتۇس اۋا ماقتاارال اۋدانىنا جول تارتتى. بۇعان دەيىن سايرام جانە تولە بي اۋداندارىندا سايلاۋشىلارمەن كەزدەسۋ وتكىزگەن ولاردىڭ ەندىگى باعىتى – سوزاق اۋدانى. كەزدەسۋدىڭ سوڭى شىمكەنتتە جالعاسپاق.
باقتيار تايجان.
وڭتۇستىك قازاقستان وبلىسى.