ونىڭ كەپىلى – حالقىمىزدىڭ دانالىعى, ەلىمىزدىڭ بىرلىگى
* * *
بەرەكەڭ كەتسە, نەڭ قالار؟!
شىعىس قازاقستان وبلىسى جاستارىنىڭ قۇربى-قۇرداستارىنا ۇندەۋى
شىعىس قازاقستان وبلىسىنىڭ جاستارى جاڭاوزەندە ورىن العان تارتىپسىزدىك بارىسىندا قازا تاپقانداردىڭ وتباسىلارىنا جانە زارداپ شەككەن ازاماتتارعا قايعىرىپ كوڭىل ايتادى. بۇل قايعى-قاسىرەتتى بۇكىل قازاقستاندىقتار ءبولىسىپ وتىر. بەيبىت تۇرعىندارعا جاسالعان زورلىق-زومبىلىق, ونى ساياسي ماقساتتارعا پايدالانۋ – زاڭعا قايشى مۇنداي ارەكەتتەردى ەشقاشان اقتاۋعا بولمايدى. بۇزاقىلىق پەن قاتىگەزدىك ءتۇيىندى ماسەلەنى تارقاتىپ, ءادىل شەشىم قابىلداۋعا ەشۋاقىتتا اسەر ەتكەن ەمەس. بەرەكە مەن بىرلىك, كەلىسىم مەن كەشىرىم قازاقتىڭ بويىندا ەجەلدەن بار قاسيەت. قۇستار كەتسە, كول قالار, بەكتەر كەتسە, بەل قالار, بەرەكەڭ كەتسە, نەڭ قالار؟! – دەگەن قازاقتىڭ ماتەلى دە وسى قاسيەتتى مەڭزەسە كەرەك. وكىنىشتىسى سول, ەل سەنگەن جاستارىمىز ەسسىزدىككە ۇرىنىپ, ب ۇلىككە بوي الدىرىپ قالدى. اتا-بابامىز نايزانىڭ ۇشىمەن, بىلەكتىڭ كۇشىمەن قورعاعان, الاش ارداقتىلارى اياۋلى جانىن قيىپ, ارمان ەتكەن اسىل قۇندىلىقتارىمىزدى, ەلدەگى ايرانداي ۇيىعان بەرەكە-بىرلىكتىڭ شىرقىن بۇزۋعا ەشكىمنىڭ حاقى جوق. جاستاردىڭ بويىنداعى جاستىق جىگەر مەن جاستىق جالىن بەرەكەنى كەتىرۋ ءۇشىن ەمەس, كەلتىرۋ ءۇشىن, تىنىشتىقتى شايقالتۋ ءۇشىن ەمەس, شاتتىقتى ورناتۋ ءۇشىن بەرىلگەنىن ەستەن شىعارۋعا ءتيىس ەمەسپىز. قۇربىلارىمىزدى كۇماندى ۇسىنىس پەن كۇدىكتى شاقىرۋلاردان باس تارتىپ, ەلدىڭ شىرقىن بۇزۋدان اۋلاق بولۋعا شاقىرامىز. ءاربىر جاس كەز كەلگەن ىستە ازاماتتىق ۇستانىمىنا بەرىك, ۇلت تىنىشتىعىن ساقتاۋ جولىنداعى قادامىنا بەكەم بولعانى ءلازىم. ءبىز, قازاقستان جاستارى, ەل بولاشاعى, ۇلت كەلەشەگى جولىندا ۇلكەن جاۋاپكەرشىلىككە يە ەكەنىمىزدى ەستەن شىعارمايىق! دوستار, سەنىمدى جانە شاپشاڭ, قان توگىسسىز جانە كاتاكليزمدەرسىز دامىپ كەلە جاتقان, مىقتى جانە تۇراقتى قازاقستان – بۇل ءبىزدىڭ تاڭداۋىمىز. بۇل تاڭداۋدى ءبىز ەل بولاشاعى ءۇشىن جاسادىق – ءبىزدىڭ بولاشاعىمىز ءۇشىن. وسكەمەن.