وتارشىلدىققا قارسى قيان-كەسكى ۇرىستاردىڭ ءبىرى – اقمولا بەكىنىسىن الۋ ءۇشىن بولعان شايقاسقا دا بيىل 180 جىل تولىپ وتىر.
جازىق دالادا قاز-قاتار تىزىلگەن اقشاڭقان كيىز ۇيلەردى كورىپ, ارقا ءتوسىن انگە بولەگەن ادەمى اۋەن ەستىلگەندە, بۇل باسقوسۋدىڭ ءجونى دە, جولى دا ەرەك ەكەنى بىلىنگەندەي ەدى. 500 جىل بۇرىن ءدال وسى قاراەگىن اۋىلى ماڭىنداعى شۇبىرتپالى كولىنىڭ جانىندا تەمىرقوجا بابا دۇنيە ەسىگىن اشقانى, كىندىگىنەن وربىگەن ون اتانىڭ بارلىعىنان ءادىل بيلەر, وت ءتىلدى كوسەمدەر مەن شەشەندەر عانا ەمەس, ءباھادۇر باتىرلار دا كوپتەپ شىققانى تاريحتان بەلگىلى. الماعايىپ زاماندا ازاتتىق كۇرەسىنىڭ اسقار شىڭىنداي كەنەسارى حان باستاعان شايقاستارعا شۇبىرتپالى ەلىنىڭ باتىرلارى قاتىسىپ, ەل بوستاندىعى جولىنداعى كۇرەستىڭ بەل ورتاسىنان تابىلدى.
اتاۋلى داتاعا ارنالعان القالى جيىننىڭ اجارىن اشقان اشىق اسپان استىنداعى ساحنادا تەاترلاندىرىلعان كورىنىستەر كونە تاريحتان سىر شەرتتى. ادەپتى ايتىس, ادەمى انمەن تەربەلگەن دالا ءتوسى جەتىگەن, دومبىرا, سىرناي سياقتى ۇلت اسپاپتارىمەن تۇرلەنە, تەربەلە ءتۇستى. جينالعان جۇرت سىر ەلىنەن كەلىپ, جىردان شاشۋ شاشقان ءا.نوعايباەۆ, م.بەكپەيىسوۆ, ا.نوعايباەۆا سىندى ونەرپازدارعا ءدان ريزا بولسا, ءوڭىردىڭ جاس اقىندارى دا جۇيەلى سوزىمەن ەل ىقىلاسىنا بولەندى.
اسقا كەلگەن ايتۋلى ازاماتتار, مەتسەناتتار قاراەگىن, سابىندى اۋىلدارىنىڭ الەۋمەتتىك تۇرعىدان از قامتىلعان جانە تولىق ەمەس وتباسىلاردىڭ مەكتەپ جاسىنداعى بالالارىنا قاجەتتى كيىم-كەشەك, وقۋ قۇرال-جابدىقتارىن تارتۋ ەتتى. «رۋحاني جاڭعىرۋ» باعدارلاماسى اياسىندا ارقا جۇرتىنىڭ ارقاسىن كەڭگە سالىپ, ەلدىڭ وتكەن تاريحىنا تاعزىم ەتكەن قاراەگىندەگى اسقا ءۇش مىڭعا جۋىق مەيمان جينالدى. ونەر بايگەسىنەن بولەك, جاسوسپىرىمدەر اراسىنداعى قازاق كۇرەسى مەن تۇيە بالۋانداردىڭ دا باسەكەسى تارتىستى ءوتىپ, ايبات سەيتەن, الىبەك زەكەنوۆ, ولجاس شىنكەەۆ سىندى بىلەكتى دە جۇرەكتى جىگىتتەر ولجالى قايتتى. كۇن ەكىندىدەن اۋعاندا باستالعان الامان بايگەدە ءبىرىنشى ورىندى استانالىق تۇلپار ەنشىلەپ, اۆتوكولىك ۇتىپ السا, ەكىنشى جانە ءۇشىنشى ورىندى تارازدان كەلگەن سايگ ۇلىكتەر ەنشىلەدى. ارقا توسىندەگى استى ۇيىمداستىرعان «اعىباي باتىر» قورىنىڭ توراعاسى عابيت مۇسابەكوۆ, مارات دارىبەكوۆ, شاحماردان سىزدىق, بەرىك مىرزاحمەتوۆ, الماي بيمەن سىندى ازاماتتاردىڭ ەرەن ەڭبەگىنە ءدۇيىم حالىق ريزاشىلىق ءبىلدىردى.
ايدا قىدىربايقىزى,
«ەگەمەن قازاقستان»