الماتى قالاسىنداعى دوستىق ۇيىندە رەسپۋبليكالىق بىرىڭعاي مەدياتسيا كۇنىنە ارنالعان اشىق ەسىك كۇنى ۇيىمداستىرىلدى.
ەلىمىزدە سوڭعى جىلداردا قۇقىقتىق داۋلاردى سوتقا دەيىن, ياعني داۋ-دامايلاردى ازاماتتاردىڭ قۇقىعى مەن بوستاندىعىنا زالال كەلتىرمەي, الەمدە قالىپتاسقان تاجىريبەلەر دەڭگەيىندە شەشۋ ءوز ومىرشەڭدىگىن دالەلدەدى. 2011 جىلى «مەدياتسيا تۋرالى» زاڭ قابىلداندى. زاڭ اياسىندا جەكە جانە زاڭدى تۇلعالاردىڭ قاتىسۋىمەن ازاماتتىق, ەڭبەك, وتباسىلىق جانە باسقا دا قۇقىقتىق قاتىناستاردان تۋىندايتىن داۋلاردى, سونداي-اق اۋىر ەمەس دارەجەدەگى قىلمىستىق ىستەر بويىنشا سوت ءوندىرىسى جولعا قويىلدى.
الماتى قالالىق جانە اۋداندىق سوتتاردىڭ, پروكۋراتۋرا ورگاندارىنىڭ, كاسىپوداق سالاسى قىزمەتكەرلەرى, مەدياتسيا ورتالىقتارىنىڭ, قازاقستان حالقى اسسامبلەياسى قۇرىلىمدارىنىڭ وكىلدەرى باس قوسقان شارا اياسىندا رەسپۋبليكا ازاماتتارى اراسىندا تاتۋلىق پەن تۇراقتىلىقتى ساقتاۋمەن قاتار مەدياتسيانىڭ دامۋىنا قاتىستى كوپتەگەن ماڭىزدى ماسەلەلەر تالقىلاندى.
ءىس-شارانىڭ مودەراتورى د.ا.قوناەۆ اتىنداعى ەۋرازيالىق زاڭ اكادەمياسى قحا كافەدراسىنىڭ مەڭگەرۋشىسى ب.باتتالحانوۆ قازاقستان مەدياتسياسىنىڭ تاريحىنا قىسقاشا شولۋ جاساپ, مەدياتيۆتىك كەلىسىمدەردى جاساۋدىڭ بارىسىنا توقتالىپ ءوتتى.
وتاندىق مەدياتسيانى دامىتۋدا ەلىمىزدەگى ەتنوستارارالىق قارىم-قاتىناستاردىڭ ۇلەسى زور ەكەندىگىن اتاپ وتكەن الماتى قالاسى قحا توراعاسىنىڭ ورىنباسارى ك.مامسۋروۆ قازاقستان حالقى اسسامبلەياسى ەلىمىزدەگى نەگىزى مەدياتور رەتىندە تاتۋلىق پەن دوستىق قاتىناستاردىڭ ۇيلەسىمدى بولۋىنا بارىنشا ىقپال ەتۋدە. ك.مامسۋروۆتىڭ ايتۋىنشا, مەدياتسيا قىزمەتى العاش قولدانىسقا ەنگەن جىلداردا داۋلاردىڭ ءبىر پايىزى عانا شەشىمىن تاپسا, بۇگىندە بۇل كورسەتكىش الدەقايدا وسكەن. الماتى قالاسى قحا اياسىندا كاسىپورىندار, وقۋ ورىندارىندا, ت.ب. مەكەمەلەردە ءجيى كەزدەسۋلەر وتكىزىلىپ, ءتۇسىندىرۋ جۇمىستارى تۇراقتى جۇرگىزىلىپ كەلەدى.
الماتى قالاسى بويىنشا قازاقستان حالقى اسسامبلەياسى حاتشىلىعىنىڭ مەڭگەرۋشىسى ن.بالعىمباەۆتىڭ ايتۋىنشا, ەلىمىزدە قۇرىلعان مەديتسيا ورتالىعىنىڭ مىندەتى قوعامدىق كەلىسىمدەردى وركەنيەتتى تۇرعىدا شەشۋگە نەگىزدەلگەن. بۇل باعىتتا قازاقستان حالقى اسسامبلەياسىنا زور جاۋاپكەرشىلىكتەر جۇكتەلىپ وتىر. ادام رەسۋرستارىنا قامقورلىق جاساۋ, قورعاۋ باعىتىندا قۇقىقتىق ساۋاتتىلىقتى ارتتىرۋ, ساندىق تەحنولوگيالاردى ەنگىزە وتىرىپ كورسەتىلەتىن قىزمەتتەر اياسىن كەڭەيتۋ سياقتى قوعامدىق ماسەلەلەردى جەڭىلدەتۋدىڭ كوپتەگەن باعىتتارى جۇمىس ىستەۋدە. مەدياتسيانىڭ ادەپتىلىك تۇرعىسىنداعى ماسەلەلەردى شەشۋدەگى ۇلەسى زور. وسى ورايدا دوستىق ۇيىندە قر پرەزيدەنتى جانىنداعى «قوعامدىق كەلىسىم» رمم مەدياتسيالىق ادىستەمەلىك كابينەتىندەگى كاسىبي مەدياتورلار تاراپىنان وتكەن جىلى 130, ونىڭ ىشىندە 32 ازاماتتىق, 31 قىلمىستىق, 49 اكىمشىلىك, ال بيىلعى جىلدىڭ العاشقى جارتىجىلدىعىندا 29 ءىستىڭ وڭ شەشىمىن تابۋىنا قۇقىقتىق نەگىزدە كەڭەستەر بەرىلگەن. ال كەلەسى جىلى مەدياتسيا قىزمەتىن جەتىلدىرۋگە بايلانىستى الماتى قالاسى اكىمى اپپاراتى «قوعامدىق كەلىسىم» جانىنان ۆيرتۋالدى مەنەدجەر كابينەتىن اشۋ جوسپارلانۋدا. ەلىمىزدەگى مەدياتسيانىڭ ۇلتتار اراسىنداعى تاتۋلىقتى نىعايتۋداعى ەرەكشەلىكتەرىن اتاپ وتكەن «احىسقا» رەسپۋبليكالىق تۇرىك ەتنومادەني ورتالىعى جەتەكشىسىنىڭ ورىنباسارى ش.اسيەۆ جانە ت.ب. بايانداماشىلار زاماناۋي ۇلگىدەگى مەدياتسيانىڭ ماڭىزدىلىعىنا توقتالسا, باق وكىلدەرىنە ارنالعان شەبەرلىك ساعاتتارى اياسىندا مەدياتسيا ءۇردىسىنىڭ ەرەكشەلىكتەرى ءتۇسىندىرىلدى.
ءىس-شارادا سونداي-اق ەڭبەك, زاڭ جانە باسقا داۋلارعا قاتىستى تۋىندايتىن ماسەلەلەرگە وراي قالا تۇرعىندارىنا كەڭەستەر بەرىلدى.
ەلۆيرا سەرىكقىزى,
«ەگەمەن قازاقستان»