وڭىردەگى ەكولوگيا دەپارتامەنتى ەكولوگيالىق ينسپەكتورلاردىڭ مالىمەتىنشە, بيىلعى العاشقى جارتى جىلدىقتا وبلىس كاسىپورىندارى قورشاعان ورتاعا 344,83 مىڭ توننا زياندى قالدىقتار شىعارعان. تالاپ بويىنشا شەك قويىلاتىن دەڭگەي - 968,5 مىڭ توننا.
ينسپەكتورلاردىڭ ايتۋىنشا, قورشاعان ورتانى ساقتاۋ شارالارى اياسىندا جەرگىلىكتى بيۋدجەتتەن دەپارتامەنت زەرتحاناسىن جابدىقتاۋعا 79 ميلليون تەڭگە ءبولىنىپتى. ساتىپ الىنعان كاسكاد-ن 31.1 گاز تالداۋىشى ءوندىرىس ورىندارىنان شىعارىلاتىن قالدىقتاردان زياندى زاتتاردىڭ بار ەكەنىن, حيميالىق ەلەمەنتتەردىڭ بار-جوعىن انىقتاۋعا مۇمكىندىك بەرەدى.
ءوڭىر تۇرعىندارى دەنساۋلىقتارىنا الاڭداۋشىلىق بىلدىرەدى. ءوندىرىس ورىندارىنىڭ ەكولوگيالىق تالاپتاردى قانشالىقتى ساقتايتىنى ويلانتادى. كاسىپورىندار ارنايى بريفينگتەر وتكىزىپ, قورشاعان ورتانى قورعاۋ باعىتىنداعى اتقارىلعان جۇمىستارمەن تانىستىرۋى كەرەك. بىلتىر ءوندىرىس ورىندارى 14 مىڭ جاسىل جەلەك وتىرعىزىلىپتى.
تاعى ءبىر ماسەلە - كاسىپورىنداردىڭ ءوز قالدىقتارىن جاسىرۋى. دەپارتامەنتتىڭ مالىمەتىنشە, ءوندىرىس ورىندارى قالدىقتارىن باسقا كومپانياعا وتكىزىپ, سوڭىندا قالدىقتىڭ قايدا كەتكەنى بەلگىسىز قالادى. وندىرىستىك قالدىقتى شىعارعانى ءۇشىن تولەنۋى ءتيىس ەميسسيادان جالتارادى.
وتكەن التى ايدا ەكولوگيا دەپارتامەنتىنىڭ ماماندارى 80 رەت تەكسەرىس جۇرگىزىپتى. ناتيجەسىندە ەكولوگيالىق زاڭناما تالاپتارىن ساقتاماۋ بويىنشا 116 دەرەك انىقتالىپ, جالپى قۇنى 7 ميلليون 712,9 مىڭ تەڭگەگە ايىپپۇل سالىندى.
سونىمەن بىرگە, دەپارتامەنت جانىنداعى ءموبيلدى توپ زاماناۋي قۇرىلعىلاردىڭ كومەگىمەن جوسپاردان تىس تەكسەرىستەر دە جۇرگىزەدى.
كەلەسى جىلدىڭ 1 قاڭتارىنان ەلىمىزدە جاڭا ەكولوگيالىق نورما ەنگىزىلمەك. نورماعا سايكەس, ەندى كادىمگى تۇرمىستىق قالدىقتار ارنايى پوليگوندارعا تەك سۇرىپتالعان كۇيىندە شىعارىلۋى ءتيىس. ەلىمىزدەگى ەكولوگيالىق احۋالدى جاقسارتىپ, تۇرمىستىق قالدىقتاردى وڭدەۋ ءوندىرىسىن قولعا الۋ ءۇشىن قوقىستى جيناۋ, شىعارۋ جانە پوليگوندارعا جەتكىزۋ ەرەجەلەرىنە وزگەرىستەر ەنگىزىلەدى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن ۆالەري بۋگاەۆ