استانادا «شاباداندار ساياباعى» مەن «يلليۋزيالار گۇلزارى» سالىندى, دەپ حابارلايدى ەلوردا ينفو.
قالالىق قورشاعان ورتانى قورعاۋ جانە تابيعاتتى پايدالانۋ باسقارماسىنىڭ ماماندارى جاڭا گۇلزارلاردىڭ ەرەكشەلىكتەرى تۋرالى ايتىپ بەردى. كرەاتيۆتى گۇلزاردىڭ ءبىرى سارىارقا اۋدانىندا ءبىرجان سال كوشەسى بويىندا مەن رەسپۋبليكا داڭعىلى مەن ى.دۇكەن ۇلى كوشەسىنىڭ قيىلىسىندا ورنالاسقان. «گۇلزاردىڭ اۋماعى تولىعىمەن اباتتاندىرىلىپ, جارىقتاندىرىلدى, سپورتتىق جانە بالالار الاڭدارى ورناتىلعان. ساۋلەتتىك كەڭىستىك قۇرىلىمىنىڭ ارقاسىندا ءاربىر گۇلزاردىڭ وزىنە ءتان قايتالانباس ستيلگە يە», - دەدى باسقارمانىڭ مامانى ەراسىل سەمباەۆ. رەسپۋبليكا داڭعىلى مەن ى.دۇكەن ۇلى كوشەسىنىڭ قيىلىسىندا ورنالاسقان شاعىن ساياباق «يلليۋزيالار گۇلزارى» دەگەن اتاۋعا يە. مۇندا سكەيتدروم, وپتيكالىق يلليۋزيانى جاساۋ ءۇشىن قولدانىلاتىن قيسىق فورماداعى ەيمس بولمەسى, سىرعاناق توبەشىگى جانە بالالار الاڭى بار.
ال ءبىرجان سال كوشەسىندەگى №5 تۇرعىن ءۇيدىڭ جانىنداعى گۇلزار «شاباداندار باعى» دەگەن اتاۋعا يە بولدى. سەبەبى, ول تەمىرجول ۆوكزالىنا جاقىن ورنالاسقان. باق اۋماعىندا شابادان فورماسىندا جاسالعان كىشى ساۋلەت فورمالارى ورناتىلعان. جوبا اۆتورلارى بالالارعا ارنالعان تەمىر جولىن سالۋدى جوسپارلاعان. ال قۇرىلىسشىلار اۆتوردىڭ ويىن جۇزەگە اسىرۋ ءۇشىن ارنايى تەمىردەن رەلس جاسادى. باسقارمانىڭ تابيعاتتى قورعاۋ جوبالارىن باسقارۋ ءبولىمىنىڭ باسشىسى ازامات جاناتاەۆتىڭ ايتۋىنشا, جاڭا باقتىڭ ورنىندا بۇرىن اپاتتىق جاعدايداعى ەكى قاباتتى ەسكى ۇيلەر بولعان.
«جوبالار كرەاتيۆتى, بەلگىلى تاقىرىپقا ارنالعان. بۇل جەردىڭ قۇرىلىسى 2018 جىلدىڭ مامىر ايىندا باستالدى. ۆوكزال ماڭىنداعى باق ۆوكزال تۇرىندە جاسالعان. گۇلزارلار ۇلكەن ەمەس, يلليۋزيالار گۇلزارى - 2 765 شارشى مەتر, ال شاباداندار پاركى 2 293 شارشى مەتر. ەكى جوبانىڭ قۇنى شامامەن 130 ملن تەڭگە», - دەدى ا.جاناتاەۆ. بۇدان بولەك, بيىل قىركۇيەك ايىندا سارىارقا داڭعىلىنداعى 27 ءۇيدىڭ ماڭىندا «تاستار گۇلزارىنىڭ» قۇرىلىسى اياقتالادى. باقتىڭ اۋماعى 2 304 شارشى مەتر. قۇرىلىس جوباسىنىڭ قۇنى شامامەن 55 ملن تەڭگە.
بۇل اۋماق ءتۇرلى كولەمدەگى ۇلكەن تاستارمەن بەزەندىرىلەدى. ترانزيتتىك ايماق دەمالىسقا ارنالعان ءۇش الاڭعا بولىنەدى. ءبىر جاعىندا ءتۇرلى سپورتتىق جابدىقتارى بار سپورت الاڭى, ورتاسىندا الىپ تاستار بولادى. ال ءۇشىنشى جاعىندا تاماقتانۋ مەن ساۋدا پاۆيلوندارى بولادى دەپ جوسپارلانعان.