جاقىندا رەداكتسياعا حابارلاسقان ق.ارمانباەۆا اتتى ازامات ءوزىنىڭ ەڭبەك كىتاپشاسىنىڭ داۋلى بولعان پاراعىن جىبەرىپ, تومەندەگى ءمان-جايدى ءتۇسىندىرىپ بەرۋدى سۇرادى. وندا ەڭبەك پاراقشاسىنىڭ 5 جازباسىندا حات جولداۋشى 24.05.1989 جىلى الماتى «قۇرىلىس» بىرلەستىگىنە قارجىگەر بولىپ قابىلدانعان ەكەن. ال ول جۇمىستان 10.06.1993 جىلى ءوز ەركىمەن بوساعان. بىراق وسى جىلدار ارالىعىندا, ياعني 1991 جىلى قازاقستان ءوز تاۋەلسىزدىگىن جاريالاعانى بەلگىلى. مىنە, وسىنى جەلەۋ ەتكەن زەينەتاقى جانە الەۋمەتتىك قامسىزداندىرۋ ءبولىمى: ء«سىز 10.06.1993 جىلى جۇمىستان شىققاندا پاراققا بۇرىنعى, ياعني ەسكى ءمور باسىلعان, سوندىقتان بۇل ءۇش جىل ءسىزدىڭ زەينەتاقى جىلدارىڭىزعا ەنبەيدى», دەپتى. مۇنداي جاعدايدا مەن نە ىستەۋىم كەرەك دەپ سۇرايدى حات يەسى. جالپى, مۇنداي سيپاتتاعى ماسەلەلەردىڭ كوپتەگەن ادامداردى تولعاندىرىپ جۇرگەنى دە راس. سوندىقتان ءبىز بۇل جاعدايدا نە ىستەۋ قاجەتتىگىن ءبىلۋ ءۇشىن ادۆوكات سەيفۋللا شىڭعىسقا جولىعىپ, زاڭگەرلىك كەڭەس بەرۋىن سۇرادىق.
– قازاقستان رەسپۋبليكاسىنىڭ بۇرىنعى دەنساۋلىق ساقتاۋ جانە الەۋمەتتىك دامۋ ءمينيسترىنىڭ 2015 جىلعى 30 قاراشاداعى «ەڭبەك كىتاپشالارىنىڭ نىسانىن, ولاردى جۇرگىزۋ جانە ساقتاۋ قاعيدالارىن بەكىتۋ تۋرالى» № 929 بۇيرىعىنىڭ 11-تارماعىندا: «ەڭبەك كىتاپشاسىندا قىزمەتكەردىڭ ەڭبەك قىزمەتى تۋرالى جاڭساق نەمەسە ناقتى ەمەس جازبالار انىقتالعان جاعدايدا, وزگەرىستەردى ءتيىستى جازبانى ەنگىزگەن جۇمىس بەرۋشى جۇزەگە اسىرادى», دەپ جازىلعان. وعان قوسا 12-تارماعىندا: «ەگەر جاڭساق نەمەسە ناقتى ەمەس جازبالاردى ەنگىزگەن جۇمىس بەرۋشى – زاڭدى تۇلعا قايتا ۇيىمداستىرىلسا, وزگەرىستەردى ونىڭ قۇقىقتىق ميراسقورى ەنگىزەدى», دەپ تايعا تاڭبا باسقانداي كورسەتكەن.
دەمەك, ق.ارمانباەۆاعا وسى بۇيرىقتىڭ نەگىزىندە, الدىمەن, 1989-1993 جىلدار ارالىعىندا جۇمىس جاساپ كەتكەن مەكەمەنىڭ قۇقىقتىق ميراسقورىن تابۋ كەرەك. ياعني اتاۋى باسقا مەملەكەتتىك ورگان. ەگەر ول مەكەمەنىڭ قۇقىقتىق ميراسقورلارى انىقتالماعان جاعدايدا سوتقا ەڭبەك ءوتىلىن ەسەپتەۋ ءۇشىن بەلگىلى ءبىر كاسىپورىندا نەمەسە باسقا تۇلعادا جۇمىس ىستەۋ فاكتىسىن انىقتاۋ تۋرالى ارىزبەن جۇگىنۋگە قۇقىعى بار. تالاپ ارىزعا ەڭبەك كىتاپشاسىنان بولەك, مەملەكەتتىك مۇراعاتتىڭ انىقتاماسى, زەينەتاقى تاعايىندايتىن مەكەمەنىڭ رەسمي جاۋابى, جۇمىس ورنىنان العان ماراپاتتاۋ قاعازدار جانە باسقا دا قۇجاتتاردى تىركەۋ قاجەت, سونىمەن قاتار سول ۋاقىتتا بىرگە جۇمىس ىستەگەن ارىپتەستەردى كۋا رەتىندە سوتقا شاقىرۋعا بولادى. سوت شەشىمىمەن بۇل كىسىنىڭ سول مەملەكەتتىك مەكەمەدە جۇمىس جاساعاندىعىن انىقتاپ بەرگەن جاعدايدا, زەينەتاقى تاعايىندايتىن مەكەمە زاڭدىق كۇشىنە ەنگەن سوت شەشىمىنىڭ نەگىزىندە ەسەپكە الىنباي قالعان جىلداردى ەڭبەك وتىلىنە جاتقىزادى.
جازىپ العان
الەكساندر تاسبولات,
«ەگەمەن قازاقستان»