ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ جوعارى وقۋ ورىندارىنىڭ ءبىلىم بەرۋ باعدارلامالارىنا باعالاۋ جۇرگىزۋ رەيتينگىنىڭ ءبىرىنشى كەزەڭ ناتيجەلەرىنە ارنالعان ءباسپاسوز ءماسليحاتى ءوتتى.
جيىنعا ءبىلىم جانە عىلىم ۆيتسە-ءمينيسترى تالعات ەشەنقۇلوۆ, «اتامەكەن» ۇكپ باسقارۋشى ديرەكتورى ولجاس ورداباەۆ جانە قۇرىلىس سالاسى بويىنشا ساراپشى الىبەك ماردانوۆ قاتىستى.
«بۇل باعالاۋدى ءبىز «اتامەكەن» ۇكپ-مەن بىرلەسىپ جۇرگىزدىك. وزدەرىڭىزگە بەلگىلى وسى جىلدىڭ باسىندا اتالعان شارانى باستايتىنىمىزدى مالىمدەگەن بولاتىنبىز. وسى جۇمىس بويىنشا 2000-عا جۋىق ءبىلىم بەرۋ باعدارلاماسىن باعالاۋدى ماقسات ەتتىك. بۇگىنگى تاڭدا 33 ماماندىق بويىنشا 784 ءبىلىم بەرۋ باعدارلاماسىن باعالاپ شىقتىق. ول باعالاۋعا نەگىزى تەحنيكالىق ماماندىقتار, الەۋمەتتىك عىلىمدار, ەكونوميكا جانە بيزنەس ماماندىقتارى ەنگىزىلدى. جالپى باعالاۋ ادىستەمەسى بويىنشا ءبىز ەكى كەزەڭگە بولدىك. ءبىرىنشى كەزەڭ ول, ناقتى ستاتيستيكالىق مالىمەتتەر بولسا, ەكىنشى كەزەڭى سول باعدارلامالاردى باعالاۋ. باعالاۋعا جۇمىس بەرۋشىلەردىڭ وكىلدەرىن جانە ارنايى ساراپشىلاردى شاقىردىق. ال ءبىرىنشى باعىت ياعني, ستاتيستيكالىق باعىت بويىنشا ءار جوعارى وقۋ ورنىن بىتىرگەن تۇلەكتەردىڭ جۇمىسقا ورنالاسۋ پايىزىن, سونىمەن بىرگە ولاردىڭ ايلىق جالاقى مولشەرىن, ساۋالناما جۇرگىزۋ ارقىلى جۇرتشىلىقتىڭ جوعارى وقۋ ورنىنا قاناعاتتاناتىنىن نەمەسە قاناعاتتانبايتىنىن نەگىزگە الدىق. سونىمەن قاتار مۇعالىمدەرىنىڭ ساپاسىن, سول ءبىلىم سالاسىنا قۇيىلعان ينۆەستيتسيانىڭ كولەمىن, تاعى دا باسقا ماسەلەلەردى نەگىزگە الا وتىرىپ باعالاۋ جۇمىسىن جۇرگىزدىك», دەدى تالعات ەشەنقۇلوۆ.
سونداي-اق ول, بۇل باعالاۋ نەگە اسەر ەتەدى, قانداي ناتيجە بەرەدى دەگەن سۇراقتار تۋىنداۋى مۇمكىن ەكەنىن العا تارتىپ, كەڭىنەن اقپارات بەردى.
رەيتينگ بويىنشا جۇرگىزىلگەن جۇمىس ناتيجەلەرى الداعى ۋاقىتتا ءبىلىم جانە عىلىم مينيسترلىگىنىڭ جانە «اتامەكەن» ۇكپ-نىڭ سايتتارىندا جاريالانادى», دەدى ۆيتسە-مينيستر.
راۋان قايدار,
«ەگەمەن قازاقستان»