استانا قالاسىنىڭ قوعامدىق كولىكتەرىندەگى جولاقى تولەمىنە وزگەرىس ەنگىزىلدى. بۇل جاڭاشىلدىق ەلورداداعى جولاۋشى تاسىمالداۋشىلار جۇيەسىندە ەلەكتروندى جولاقى تولەمىنىڭ ەنگىزىلۋىنە بايلانىستى تۋىنداپ وتىر. استانا قالاسى اكىمدىگىنىڭ حابارلاۋىنشا, جاڭا جۇيە بويىنشا جولاقى تولەمىنىڭ ەكى ءتۇرى قاراستىرىلعان. ەندى ەلوردانىڭ تۇرعىندارى مەن قوناقتارى قوعامدىق اۆتوبۋستاردا كولىك كارتاسىن پايدالانا الادى نەمەسە ءبىر رەت بەرىلەتىن جول ءجۇرۋ بيلەتى ءۇشىن اقشالاي تولەم جاسايدى. ياعني ەلەكتروندى جولاقى تولەمى جۇيەسىن ەنگىزۋ بارىسىندا جولاۋشىلاردىڭ جولاقى قۇنىن اقشامەن تولەۋ قۇقىعى دا ساقتالعان.
وسىعان وراي سوڭعى كۇندەرى استانالىق قوعامدىق كولىكتى پايدالانۋشىلار اراسىندا بىرقاتار تۇسىنبەستىك جاعدايلار تۋىپ وتىرعانى جاسىرىن ەمەس. ماسەلەن, بۇل جاڭاشىلدىقتان بەيحابار جولاۋشىلاردىڭ اۆتوبۋس كوندۋكتورلارىنا دۇرسە قويا بەرگەنىن نەمەسە الدىن الا اقپاراتتاندىرۋ جۇمىستارىن جۇرگىزبەۋىنە بايلانىستى شاعىمدانىپ جاتقانىن قوعامدىق كولىكتى پايدالانۋشىلار ءجيى بايقايدى. ياعني ۇيرەنشىكتى جولاقى قۇنى 90 تەڭگەنى ۇسىنعان جولاۋشىلاردان استانالىق كوندۋكتورلار تاعى 90 تەڭگە ۇستەمەلەۋىن وتىنەدى. ويتكەنى قالتاڭىزدا ەلەكتروندى كارتا بولماسا, اقشالاي جولاقى قۇنى ەكى ەسەگە كوتەرىلەدى. بۇل رەتتە الدىن الا حالىقتىڭ اراسىندا حابارلاندىرۋ, قۇلاقتاندىرۋ جۇمىستارىنىڭ جەتكىلىكتى جۇرگىزىلمەۋى بايقالادى دەيدى شاعىمدانۋشىلار.
ال استانا قالاسىنىڭ اكىمى اسەت يسەكەشەۆ جاز ماۋسىمى الدىندا جولاقى قۇنى وزگەرمەيتىنىن, تەك جول ءجۇرۋ كارتوچكاسىن قولدانۋدى قالامايتىندار ءۇشىن سارالانعان تاريف رەتىندە 180 تەڭگەلىك تولەماقى قاراستىرىلىپ وتىرعانىن جەتكىزگەن-ءدى. قالا اكىمى استانادا 2014 جىلدان بەرى جولاقى قۇنىندا وزگەرىس بولماعانىن, جاڭا سارالانعان تولەماقى جۇيەسىن ەنگىزۋ الدىندا تولەۋ كەڭسەلەرىن كوبەيتۋ باعىتىندا جۇمىس جۇرگىزىلىپ جاتقانىن اتاپ وتكەن بولاتىن.
ەلەكتروندى جولاقى تولەمى كارتاسىنىڭ جارامدىلىق مەرزىمى – 5 جىل, كەپىلدىك ۋاقىتى – 2 جىل. «كولىك ءاميانىنا» تولتىرىلعان تاريفتى پايدالانۋ ۋاقىتىنا شەكتەۋ جوق.
جۋىردا استانادا قوعامدىق كولىكتە سارالانعان ءتاريفتى ەنگىزۋ تاقىرىبىندا «استانا LRT» جشس بريفينگ تە وتكىزگەن بولاتىن. «استانا LRT» جشس باسقارما توراعاسى بەكمىرزا يگەنبەردينوۆتىڭ ايتۋىنشا, سارالانعان ءتاريفتى ەنگىزۋدىڭ ماقساتى – قوعامدىق كولىك سالاسىنداعى كولەڭكەلى اقشا اينالىمىن تۇپكىلىكتى جويۋ, بيۋدجەت ءتۇسىمىن مولايتۋ جانە قالانىڭ كولىك جۇيەسىن ودان ءارى دامىتۋعا كوبىرەك قاراجات ءبولۋدى كوزدەيدى. استانا قالاسى اكىمدىگىنىڭ سارالانعان تاريف تۋرالى قاۋلىسى نەگىزىندە كولىك كارتاسى ارقىلى تولەماقى داعدىلى قالالىق باعدارلاردا – 90, ەكسپرەسس قالالىق باعدارلاردا – 180, قالا ماڭى باعدارلارىندا 1 شاقىرىم ءۇشىن 8 تەڭگە مولشەرىندە بەلگىلەنسە, اقشالاي تولەۋ كەزىندە داعدىلى قالالىق باعدارلاردا – 180, ەكسپرەسس قالالىق باعدارلاردا – 250, قالا ماڭى باعدارلارىندا 1 شاقىرىم ءۇشىن 11,5 تەڭگە كولەمىندە بەلگىلەندى. سونىمەن قاتار قاۋلىعا سايكەس, جولاقىنى تولەۋدىڭ ەلەكتروندىق جۇيەسى ىستەمەي قالعان جاعدايدا جولاقىنى كولىك كارتاسىمەن تولەيتىن جولاۋشىنىڭ تەگىن جول جۇرۋگە قۇقىعى بار. ەندى كولىك كارتاسىن پايدالاناتىن جولاۋشىلاردا العاشقى ۆاليداتسيا جاساعان ساتتەن باستاپ 60 مينۋت ىشىندە ءبىر رەت تەگىن اۋىسىپ وتىرۋ مۇمكىندىگى بولادى. بۇرىن تەگىن اۋىسىپ وتىرۋ سانى شەكتەۋسىز بولعانى بەلگىلى.
بۇرىن قالادا كولىك كارتالارىن ساتىپ الۋ مەن تولتىرۋعا ارنالعان 6 مامانداندىرىلعان كاسسا جانە 30 RTVM-اۆتومات جۇمىس ىستەگەن بولاتىن. ەندى پايدالانۋشىلار جول اقىسىن Qiwi تەرمينالى ارقىلى تولەي الادى. تاياۋ ۋاقىتتا www.transcard.kz سايتى ارقىلى جانە kaspi.kz ينتەرنەت-بانكينگى ارقىلى تولەم جاساۋ مۇمكىندىگى قولجەتىمدى بولماق.
بەكمىرزا يگەنبەردينوۆتىڭ ايتۋىنشا, كوندۋكتورلاردىڭ ءبىر بولىگى قوعامدىق كولىك سالاسىندا جۇمىسىن جالعاستىرا بەرەدى. «كاسىپتىك شەبەرلىگىن كورسەتكەن كوندۋكتورلار كولىكتىك باقىلاۋ دەپارتامەنتىنە جۇمىسقا شاقىرىلدى. بۇل دەپارتامەنت قوعامدىق كولىك سالاسىنداعى ءتارتىپ بۇزۋشىلىقتاردى انىقتاپ, جويۋدى جۇزەگە اسىرادى. سونىمەن قاتار كوندۋكتورلاردىڭ ءبىر بولىگى اۆتوپاركتەردىڭ باقىلاۋ-جەلىلىك قىزمەتىنە اۋىسادى. ال تاعى ءبىر بولىگى اۆتوبۋستاردا جولاقى تولەۋدىڭ ەلەكتروندى جۇيەسىنىڭ جۇمىسى جونىندەگى كەڭەسشى بولىپ جۇمىس ىستەيتىن بولادى», دەيدى ول.
بۇل تاريفتىك وزگەرىستەردىڭ قالالىق ءماسليحات بەكىتكەن جەڭىلدىگى بار ازاماتتارعا قاتىسى جوق. ياعني «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ «الەۋمەتتىك تولەمدەردى ۆەدومستۆوارالىق ەسەپتەۋ ورتالىعىندا» ەسەپتە تۇرعان ازاماتتار, ماسەلەن, زەينەتكەرلەر, اسىراۋشىسىنان ايىرىلۋ جاعدايىنا جانە جاسىنا بايلانىستى مەملەكەتتىك الەۋمەتتىك تولەماقى الۋشىلار, كوپبالالى انالار, كوپبالالى وتباسىلار, مۇگەدەكتەر, 18 جاسقا تولماعان مۇگەدەك بالالار, ۇلى وتان سوعىسىنىڭ قاتىسۋشىلارى مەن مۇگەدەكتەرى جانە وعان تەڭەستىرىلگەن تۇلعالار اتاۋلى كولىك كارتاسىن پايدالانا الادى.
جالپى, كولىك كارتاسىن قالاي پايدالانۋعا بولادى؟ اتوبۋسقا كىرگەندە جولاۋشى ەلەكتروندى كارتانى ارنايى تەرمينال-ۆاليداتورعا قويادى. قاداعالاۋشى جولاۋشىدان تەكسەرۋ ءۇشىن ۆاليداتسيا ۇدەرىسىن قايتالاۋدى سۇراۋعا قۇقىلى. ال «ايلىق جولاقى» ءتاريفىن ەنگىزۋ ءۇشىن كارتانى ۆاليداتورعا قويىپ, 3-5 سەكۋند ۇستاپ تۇرۋ جەتكىلىكتى. مىندەتتى تۇردە ۆاليداتور ەكرانىنداعى «تولتىرۋ. Ok» حابارلاماسىن كۇتۋ كەرەك. بۇدان كەيىن قايتالاۋ بارىسىندا «ۆاليداتسيا» حابارلاماسى شىعۋى ءتيىس. وسى ۇدەرىستەن سوڭ ادەتتەگىدەي پايدالانا بەرۋگە بولادى.
سونداي-اق استانادا 7 جاستان 15 جاسقا دەيىنگى بالالار مەكتەپتىك كولىك كارتاسىن الا الادى. وقۋشىلاردىڭ جولاقى قۇنى 40 تەڭگەنى قۇرايدى. ولار كولىك كارتاسىن وزدەرى وقيتىن وقۋ ورنىنان الادى. كارتانى رەسىمدەۋ ءۇشىن تۋ تۋرالى كۋالىگى مەن فوتوسۋرەتى قاجەت. العاشقى كارتا تەگىن بەرىلەدى. ال جوعالعان جاعدايدا قايتا شىعارتۋ 400 تەڭگە تۇرادى. مەكتەپ كارتاسى جەكە وقۋشىعا ارنالاتىندىقتان, كەلەسى ادام پايدالانا المايدى. ەگەر مەكتەپتە كارتانى رەسىمدەۋدەن باس تارتسا, اتا-اناسى نەمەسە قامقورشىسى قاجىمۇقان كوشەسىندەگى №14 ۇيدە ورنالاسقان تولەۋ جۇيەسى دەپارتامەنتىنە حابارلاسۋىنا بولادى. ول وزىمەن بىرگە اتا-انانىڭ ءبىرىنىڭ جەكە كۋالىگىن جانە بالانىڭ تۋ تۋرالى كۋالىگىنىڭ تۇپنۇسقاسى مەن قۇجاتتىق فوتوسۋرەتىن الا كەلۋى قاجەت. مۇنداي كارتانى قالاعا كەلگەن باسقا وقۋشىلار دا قولدانا الادى.
جالپى قالا اكىمدىگى بۇل جوبانىڭ سۋبسيديالاۋدى دۇرىس ەسەپتەۋ ماقساتىندا ەنگىزىلگەنىن ايتادى. سەبەبى قالا اكىمدىگى تاسىمالداۋشىلاردىڭ جەڭىلدىكپەن جۇرەتىن جولاۋشىلاردى تاسىمالداۋ شىعىنىنىڭ ءبىر بولىگىن وتەيدى. ال ەلەكتروندى جولاقى كارتاسى جۇيەسى مەن ۆاليداتورلار اۆتوپاركتىڭ قانشا جولاۋشى تاسىمالدايتىنىن ناقتى كورسەتەدى. سونىمەن بىرگە جولاۋشىلار اعىنىنا دا ناقتى تالداۋ جاساۋعا مۇمكىندىك بەرەدى. مۇنىڭ ناتيجەسىندە جاڭا باعدارلار ەنگىزىلىپ, سۇرانىسقا يە باعدارلار بويىنشا ءتيىستى جۇمىس جۇرگىزىلەدى.
ال بۇگىندە تولەم كارتالارىنىڭ تەحنيكالىق اقاۋلارىنا بايلانىستى ورىن الىپ جاتقان كەيبىر كەمشىلىكتەر تۇزەتىلۋدە.
دۋمان اناش,
«ەگەمەن قازاقستان»