ۋكراينانىڭ ودەسسا قالاسىندا بوكستان حالىقارالىق دارەجەدەگى سپورت شەبەرى, كسرو چەمپيوناتى مەن كسرو حالىقتارى سپارتاكياداسىنىڭ جۇلدەگەرى, بىرقاتار حالىقارالىق دودالاردىڭ جەڭىمپازى سەمەن ترەستيندى ەسكە تۇسىرۋگە ارنالعان تۋرنير ءوتتى.
قارا تەڭىز جاعالاۋىندا وتكەن جارىستا قازاقستاننىڭ بەس بوكسشىسى باق سىناپ, سونىڭ ەكەۋى ەلگە جۇلدەمەن ورالدى. ولار – الىشەر اياتقوجانوۆ (49 كيلو) پەن دامير ابدىقادىر (52 كيلو). جارتىلاي فينالدا الىشەر يزرايلدىك داۆيد الاۆەرديانان ۇتىلسا, دامير ۋكرايانلىق دامير فاتيشكە ەسە جىبەردى.
ال اسان ەرۋبەك (60 كيلو), اسقار ەرۋبەك (64 كيلو) جانە ماكسيم مەلتونيان (+91 كيلو) تۇساۋكەسەر كەزدەسۋلەرىندە جەڭىلىس تاپتى. جارىس ناتيجەسى بويىنشا 10 سالماق دارەجەسىندەگى باس جۇلدەنىڭ تەڭ جارتىسىن ۋكراينا قۇراماسى ولجالاسا, گرۋزيانىڭ بوكسشىلارى ەكى باس جۇلدەنى يەلەندى. سونداي-اق, يزرايل, يوردانيا جانە مولدوۆانىڭ وكىلدەرى دە ءبىر-ءبىر رەتتەن توپ جاردى.
عالىم سۇلەيمەن,
«ەگەمەن قازاقستان»