اعىمداعى جىلدىڭ 5 شىلدەسىندە ەلباسى «ادۆوكاتتىق قىزمەت جانە زاڭ كومەگى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا قول قويدى. وسىعان وراي ورتالىق كوممۋنيكاتسيالار قىزمەتىندە ءباسپاسوز ءماسليحاتى ءوتتى.
«اتالعان زاڭدار ازاماتتاردىڭ بىلىكتى زاڭ كومەگىن الۋ كەزىندەگى كونستيتۋتسيالىق قۇقىعىن ىسكە اسىرۋدا ولاردىڭ قۇقىقتارىن, بوستاندىقتارى مەن زاڭدى مۇددەلەرىن قورعاۋدى نىعايتۋعا, سونداي-اق بىلىكتى زاڭ كومەگىن كورسەتۋ مەحانيزمدەرىن جەتىلدىرۋگە باعىتتالعان. زاڭمەن ازاماتتاردىڭ كونستيتۋتسيالىق قۇقىقتارىن جۇزەگە اسىرۋعا جانە كەلەسى ماسەلەلەردى شەشۋگە باعىتتالعان بىرقاتار شارالار كوزدەلگەن. بۇل – زاڭ كومەگىن زاڭگەر ماماندارىنىڭ وكىلدەرىمەن جەتكىلىكسىز ساپادا كورسەتۋ, ازاماتتاردى جوسىقسىز ادۆوكاتتار مەن جەكە تاجىريبەمەن اينالىساتىن زاڭگەرلەردىڭ ارەكەتتەرىنەن قورعاۋ مەحانيزمىنىڭ بولماۋى, ءبىلىمنىڭ جىلدام ەسكىرۋى جانە بىلىكتىلىكتى تۇراقتى كوتەرۋ قاجەتتىلىگى, ادۆوكاتتاردىڭ تاپشىلىعى, ادۆوكاتتار القالارىنىڭ قىزمەتىندە اشىقتىق پەن ايقىندىقتىڭ بولماۋى سياقتى ماسەلەلەر.
زاڭمەن قۇرامىندا 6 ادۆوكات, قوعامنىڭ 3 وكىلى جانە وتستاۆكاداعى 2 سۋدياسى بار تارتىپتىك كوميسسيالاردىڭ ەكى دەڭگەيلى جۇيەسى كوزدەلگەن. بۇل ازاماتتاردىڭ شاعىمدارىن وبەكتيۆتى جانە جان-جاقتى قاراستىرۋدى, اشىقتىق پەن ايقىندىقتى قامتاماسىز ەتەدى. 2020 جىلدان باستاپ ادۆوكاتتاردىڭ, زاڭ كونسۋلتانتتارىنىڭ كاسىبي جاۋاپكەرشىلىگىن مىندەتتى ساقتاندىرۋ ەنگىزىلەدى. بۇل سەنىم بىلدىرۋشىلەرگە بىلىكتى زاڭ كومەگىن الۋعا جانە ساپاسىز زاڭ كومەگى كورسەتىلگەن جاعدايدا كەلتىرىلگەن زياندى وتەۋگە كەپىلدىك بەرەدى. سونىمەن قاتار زاڭناما تۇرعىسىنان جەكە تاجىريبەمەن اينالىساتىن زاڭگەرلەردىڭ قۇقىقتىق مارتەبەسى, قۇقىقتارى مەن مىندەتتەرى بەكىتىلەدى.
بۇگىنگى تاڭدا سوتتا ازاماتتىڭ مۇددەسىن جوعارى زاڭ ءبىلىمى بار كەز كەلگەن ادام بىلدىرەدى, وسى رەتتە وسىنداي كومەك ءجيى ساپاسىز كورسەتىلەدى. سوندىقتان سوتتا ازاماتتاردىڭ مۇددەسىن بىلدىرەتىن تۇلعالار ءۇشىن زاڭ كونسۋلتانتتار پالاتاسىنىڭ مۇشەسى بولۋ مىندەتى كوزدەلگەن, بۇل ءسوزسىز قازاقستانداعى زاڭ قىزمەتتەرىن كورسەتۋ نارىعىنىڭ دامۋىنا, زاڭ كومەگىنىڭ ساپاسىن جانە باسەكەگە قابىلەتتىلىگىن كوتەرۋگە سەبەپ بولادى», دەدى ادىلەت ءمينيسترىنىڭ ورىنباسارى جانات ەشماعامبەتوۆ.
ول زاڭنىڭ نەگىزگى ماقساتى زاڭ كومەگىنىڭ اشىقتىعىن, ادىلدىگىن جانە ساپاسىن كوتەرۋ بولىپ تابىلاتىن بىرقاتار باسقا دا جاڭاشىلدىقتاردى قامتيتىنىن, زاڭ نورمالارى حالىققا جوعارى بىلىكتىلىگى بار ماماندارمەن ساپالى جانە قولجەتىمدى زاڭ كومەگىن كورسەتۋگە باعىتتالعانىن اتاپ ءوتتى.
راۋان قايدار,
«ەگەمەن قازاقستان»