قوستانايدا دەنيسپەن قوشتاسۋ ءراسىمى ءوتتى

ء«بىز كەشە وسى سۋىق حاباردى ەستىگەلى تۇندە وتباسىمىزبەن ۇيقىمىز شالا بولدى, جىلاپ الدىق. دەنيستىڭ ءار ءبىر مۇزعا شىققان ءساتىن قۋانا كۇتەتىن ەدىك, ول سۇلۋلىقتان, پاراساتتىلىقتان جارالعانداي جان ەدى. ول ناعىز جاستاردىڭ  ۇستىنى بولاتىن, وعان مىڭداعان جاس بۇلدىرشىندەر ەلىكتەدى, دەنيستەي بولسام دەپ  ارماندادى.   ەكى سوقتالداي جىگىت سونداي دارىندى, تالانتتى, زيالى ادامعا قالاي پىشاق جۇمسادى دەسەيشى؟! ادامدىقتىڭ ەڭ تومەنگى ساتىسىنان كورىنگەن, انانىڭ ءسۇتىن اقتاماعان مالعۇندار», دەپ كۇيىنە سويلەدى ءمادينا مەن زارينا سالىقوۆا دەگەن ەگىز قىزدار. ەكەۋى قولىنا بىرنەشە اق شار ۇستاپ كەلىپتى,  بۇگىن دەنيستى ەسكە الىپ, قوشتاسۋ ءراسىمى رەتىندە اسپانعا ۇشىراتىندارىن ايتتى.

توبىل جاعاسىنا كەلۋشىلەردىڭ كەشكە قاراي قاراسى مولايا ءتۇستى, ادمدار قولىندا قىزىل گۇل نەمەسە اق شار ۇستاعان. بارلىعى دا مۇڭلى, كەيبىر جاستار ءتىپتى كوز جاسىن دا ىركە المادى. وسىندا فيلوسوفيا عىلىمدارىنىڭ كانديداتى, بەلگىلى عالىم جانە ولكەتانۋشى قالقامان جاقىپ تا بولدى. 

«بار-جوعى 25 جاسىندا اققان جۇلدىزداي كەتىپ بارا جاتقان دەنيس تەننىڭ قازاقستانعا جاساعان ەڭبەگى ۇشان-تەڭىز. سپورتتاعى جەڭىستەرىمەن قازاقستاندى دۇنيەگە تانىتتى. بىراق اڭگىمە ونىڭ تەك تالانتتى سپورتشى ەكەنىندە ەمەس,  ادامگەرشىلىگى مەن تەرەڭ پاراساتىندا ەدى. سوڭعى سۇحباتىندا «سىرتقا شىققاندا ءوزىمدى كورەي ەمەس, قازاق سەزىنەمىن» دەگەن ءسوزى مەنى تاڭعالدىرعان, جۇرەگىمدى ەزىپ كەتكەن ەدى. ول ادامدىقتىڭ اباي ايتقان دەڭگەيىندە بولدى. دەنيستەي تالانتتى, تاماشا بالامىزدان ايىرىلىپ قابىرعامىز قايىسقان كەزدە, وعان پىشاق سىلتەگەن بۇزاقىلاردىڭ ءبىزدىڭ ۇلتتان بولعانى مەنى تاعى كۇيىندىردى. ولار وزدەرىن ەندى كىم سانايدى؟», دەدى ق.جاقىپ. 

دەنيس تەن قوستانايلىقتاردىڭ دا ماڭگى جۇرەگىندە!

ءنازيرا جارىمبەت

«ەگەمەن قازاقستان»

قوستاناي