ەلىمىزدە مەديتسينالىق كومەككە كوڭىلى تولمايتىندار كوپ. جالپى, دەنساۋلىق ساقتاۋ سالاسىنىڭ جۇمىسىنا سىن ءجيى ايتىلادى. ارينە, اۋىقىمى كەڭ, ءارى الەۋەتپەن تىكەلەي جۇمىس ىستەيتىن بىردەن-ءبىر الەۋمەتتىك سالا اياسىندا «اڭگىمە» دە كوپ بولاتىنى راس. بىراق «جەل تۇرماسا ءشوپتىڭ باسى قيمىلدامايتىنى» تاعى بار. بىلايىنشا, مەملەكەت تاراپىنان قولداۋ كوپ, قارجى ءبولىنىپ جاتىر, قولعا الىنعان باعدارلامالار دا بارشىلىق. دەسەك تە, جۇمىس نەگە ماردىمسىز؟ قىزمەت ساپاسى نەگە حالىقتى قاناعاتتاردىرماي ءجۇر. مىنە, وسىنداي ساۋالدارعا قاراپايىم جۇرتشىلىق قانا ەمەس, دەنساۋلىق ساقتاۋ مينيسترلىگى ماماندارى دا «باس قاتىرا» باستادى. ونى مينيسترلىكتىڭ بيىلعى التى ايدىن جۇمىس قورىتىندىلارىنا ارنالعان القالى جيىنىندا دا بايقادىق.
دەنساۋلىق ساقتاۋ ءمينيسترى ەلجان ءبىرتانوۆتىڭ توراعالىعىمەن وتكەن القالى جيىنعا ونىڭ ورىنباسارلارى, دەنساۋلىق ساقتاۋ مينيسترلىگىنىڭ قوعامدىق كەڭەسى مۇشەلەرى, سونداي-اق وبلىستاردىڭ, استانا, الماتى جانە شىمكەنت قالالارىنىڭ دەنساۋلىق ساقتاۋ باسقارمالارىنىڭ, ۆەدومستۆونىڭ اۋماقتىق بولىمشەلەرىنىڭ جانە ۆەدومستۆوعا باعىنىستى ۇيىمداردىڭ باسشىلارى قاتىسىپ, اتقارىپ جاتقان جۇمىستارى جايى ەسەپ بەردى. جيىندا الدىمەن دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن ىسكە اسىرۋدىڭ بيىلعى التى ايداعى قورىتىندىلارى ايتىلدى. باياندالعان مالىمەتتەرگە سۇيەنسەك, ەشكىم «قول قۋسىرىپ» وتىرعان جوق. مەجەلى مىندەتتەر ورىندالىپ, اۋىز تولتىرىپ ايتارلىق جۇمىس جاسالعان. ەلىمىزدىڭ مەديتسينا سالاسى قازىرگى كۇنى بۇرىنعى جاعدايمەن سالىستىرعان الدەقايدا ىلگەرىلەگەن, حالىقارالىق ستاندارتتاردىڭ ءبىرازىن مەڭگەرگەن.
ماسەلەن, دەنساۋلىق ساقتاۋ ۆيتسە-ءمينيسترى ءلاززات اقتاەۆا «دەنساۋلىق» باعدارلاماسى بويىنشا بۇگىندە جەتى باعىتتا جۇمىس ءجۇرىپ جاتقانىن جەتكىزدى. ايتالىق, العاشقى مەديتسينالىق-سانيتارلىق كومەكتى كۇشەيتۋ اياسىندا امبۋلاتورلىق-ەمحانالىق جەلىنى شاعىنداپ ۇيىمداستىرۋ جۇرگىزىلىپ جاتىر ەكەن. ماسەلەن, ەسەپتى كەزەڭدە دارىگەرلىك ۋچاسكەلەر سانى 12 پايىزعا ارتقان, ۋچاسكەلىك دارىگەرلەر جۇكتەمەسى تومەندەپ, بەكىتىلگەن تۇرعىندار سانى 1950 ادامدى قۇراعان. ناتيجەسىندە العاشقى مەديتسينالىق-سانيتارلىق كومەككە جۇگىنۋلەر سانى 23 پايىزعا ارتقان. سونداي-اق قازىر ديسپانسەرلەۋدى اۋرۋلاردى باسقارۋ باعدارلاماسىنا وزگەرتۋ جوسپارلانىپ جاتقانى ايتىلدى. «اۋرۋلاردى باسقارۋ باعدارلاماسى (ابب) پاتسيەنتتەردى وزدەرىنىڭ دەنساۋلىعىن باسقارۋعا بەلسەندى تارتۋعا باعىتتالعان. ونىڭ شەڭبەرىندە حالىق اراسىنداعى ادام ءولىمىنىڭ 70 پايىزىن جانە اۋرۋدىڭ 77 پايىزىن انىقتايتىن 25 سوزىلمالى اۋرۋ بويىنشا پاتسيەنتتەرمەن بىرلەسىپ ديناميكالىق باسقارۋدى ۇسىنادى. وسىعان بايلانىستى بىرقاتار ينفەكتسيالىق ەمەس اۋرۋلار: جۇرەك-قان تامىرى, ونكولوگيالىق, سوزىلمالى رەسپيراتورلىق اۋرۋلار مەن ديابەت ابب-عا كىرگەن. ابب-نى پيلوتتىق ەنگىزۋ تاجىريبەسى وسى ءتاسىلدىڭ جوعارى تيىمدىلىگىن كورسەتتى», دەدى ل.اقتاەۆا.
دەنساۋلىق ساقتاۋ ۆيتسە-ءمينيسترى سونداي-اق كورسەتىلەتىن مەديتسينالىق قىزمەتتەردىڭ ساپاسىن قامتاماسىز ەتۋ ماسەلەلەرىنە دە كەڭىنەن توقتالدى. بۇگىنگى تاڭدا, ونكولوگيالىق اۋرۋلارمەن كۇرەسۋدىڭ كەشەندى جوسپارى بەكىتىلدى, تۋبەركۋلەزبەن كۇرەسۋدىڭ كەشەندى جوسپارى وزەكتەندىرىلدى. حالىقتىڭ كورسەتىلەتىن مەديتسينالىق قىزمەتپەن قاناعاتتانۋ دەڭگەيىن باعالاۋ جونىندەگى زەرتتەۋ, كلينيكالىق حاتتامالار مەن بەيىندىك قىزمەتتەر ستاندارتتارىن ازىرلەۋ ۇكىمەتتىك ەمەس ۇيىمدارعا بەرىلدى. سونداي-اق مەديتسينالىق ۇيىمداردى اككرەديتاتسيالاۋ ستاندارتتارى قايتا قارالدى جانە ونكولوگيالىق, پسيحياتريالىق, نەۆرولوگيالىق, اكۋشەرلىك جانە گينەكولوگيالىق كومەك كورسەتۋدى ۇيىمداستىرۋ جونىندەگى 4 ستاندارت ماقۇلداندى», دەدى ۆيتسە-مينيستر.
سونىمەن قاتار جالپى جىل سايىن ءوسىپ كەلە جاتقان مەديتسينالىق جوعارى وقۋ ورىندارىن بىتىرۋشىلەردىڭ سانى ەسەبىنەن سالاداعى كادر تاپشىلىعىنىڭ ازايىپ كەلە جاتقانىن اتاپ ءوتتى. بۇدان باسقا, شەتەلدىك جەتەكشى ۋنيۆەرسيتەتتەرمەن ستراتەگيالىق سەرىكتەستىك شەڭبەرىندە مەديتسينالىق جوعارى وقۋ ورىندارىنىڭ پروفەسسورلىق-وقىتۋشىلىق قۇرامىن ەلىمىزدە جانە شەتەلدە وقىتۋ جۇرگىزىلۋدە. ل.اقتاەۆا اتاپ وتكەندەي, كەزەك كۇتتىرمەيتىن مەديتسينالىق كومەك كورسەتۋدى حالىقارالىق ستاندارتتارعا جاقىنداتۋ ماقساتىندا جەدەل جاردەم كورسەتۋدىڭ بىرىڭعاي ديسپەتچەرلىك قىزمەتى ەنگىزىلەتىن, شۇعىل ەمەس شاقىرۋلار ەمحانالارعا بەرىلەتىن, قىزمەتكەرلەردى رەانيماتسيالىق كومەك كورسەتۋدىڭ الەمدىك ستاندارتتارىنا كەزەڭ-كەزەڭىمەن وقىتۋ جانە باسقالار جۇزەگە اسىرىلاتىن بولادى. جەدەل جاردەمنىڭ جەتۋ ۋاقىتى 25 مينۋتتان 18 مينۋتقا دەيىن قىسقارتىلعان.
جالپى شارا بارىسىندا دەنساۋلىق ساقتاۋ سالاسىنا قاتىستى بارلىق ماسەلە ايتىلدى. حالىقتى ءدارى-دارمەكپەن قامتۋ, كادر تاپشىلىعىن جويۋ, جالاقى ماسەلەسى, مەديتسينالىق قىزمەت كورسەتۋ ساپاسىن ارتتىرۋ, مىندەتتى الەۋمەتتىك-مەديتسينالىق ساقتاندىرۋدى ەنگىزۋ, سالانىڭ ينفراقۇرىلىمىن جەتىلدىرۋ سياقتى ماڭىزدى ماسەلەلەرى تالقىلاندى. سونداي-اق سالاعا ينۆەستيتسيا تارتۋ, تسيفرلاندىرۋ - ەلەكتروندى فورماتقا كوشۋ, كومپيۋتەرلىك-تەحنيكامەن قامتۋ جايى قارالدى.
جيىن قورىتىندىسىندا دەنساۋلىق ساقتاۋ ءمينيسترى ە.ءبىرتانوۆ ايتىلعان ماسەلەلەرگە قاتىستى جۇمىستاردى بارىنشا جەتىلدىرۋدى تاپسىردى. اسىرەسە, جۇمىسقا دەگەن جاۋاپكەرشىلىكتى ارتتىرىپ, كەمشىلىككە جول بەرگەن باسشىلاردى قاتاڭ جازالاۋ قاجەتتىگىن ەسكەرتتى. كەيبىر ماسەلەلەرگە قاتىستى زاڭنامالاردى, قۇقىقتىق نورمالاردى قايتا قاراپ, جۇمىستى جۇيەلەندىرۋ كەرەكتىگىن باسا ايتتى. باستىسى, دەنساۋلىق ساقتاۋ ءار ادامنىڭ كونستيتۋتسيالىق قۇقىعى ەكەنىن ايتىپ, بۇل رەتتە مينيسترلىكتىڭ جاۋاپكەرشىلىگى, اتقارار مىندەتى زور ەكەنىن جەتكىزدى.
دينارا بىتىك,
«ەگەمەن قازاقستان»